الماتىدا ورتالىق ازياداعى ميكرو, شاعىن جانە ورتا كاسىپورىنداردى (مشوك) قولداۋعا باعىتتالعان شاعىن بيزنەستى دامىتۋ جونىندەگى ايماقتىق باعدارلامانىڭ تۇساۋى كەسىلدى.
بۇل باعدارلامانى ەۋروپالىق وداق قارجىلاندىرادى ءارى ول ورتالىق ازياداعى قارجى ينستيتۋتتارىنىڭ قىزمەتكەرلەرىن ونلاين وقىتۋعا مۇمكىندىك بەرەدى. باعدارلامانى ازىرلەۋشىلەر ءدارىس الۋشىلارعا ىڭعايلى بولۋ ءۇشىن دەربەس قۇرىلعىلاردا وقىتۋدى دا ەسكەرگەن.
وسىناۋ ايماقتىق باعدارلاما شاعىن بيزنەستى قارجىلاندىرۋ سالاسىنا نوۋ-حاۋ ەنگىزۋدى قاراستىرادى.
باعدارلامانىڭ تۇساۋكەسەرىنە ەو, ەقدب, قازاقستان ۇكىمەتى مەن ۇلتتىق بانكى, حالىقارالىق ۇيىمدار جانە قارجى وكىلدەرى قاتىسىپ, «بانك سالاسىنىڭ بولاشاعى جانە قارجى قىزمەتتەرىن ۇسىنۋ» تاقىرىبىندا پىكىر الماستى.
سول سياقتى وسى باعدارلاما شەڭبەرىندە ورتالىق ازيادا ميكرو, شاعىن جانە ورتا كاسىپورىنداردى قارجىلاندىراتىن قارجى ينستيتۋتتارىنا ارنالعان ءبىلىم الماسۋ پلاتفورماسى دا ىسكە قوسىلماق. سايت جەرگىلىكتى قارجى ينستيتۋتتارىنا وسى سالاداعى ەقدب تاجىريبەسىمەن تانىسىپ, ءتۇرلى تاقىرىپتاعى ترەنينگتەردەن وتۋگە جول اشادى.
قازىردىڭ وزىندە پلاتفورما شاعىن جانە ورتا كاسىپورىنداردىڭ نەسيە تولەۋگە قابىلەتتىلىگىن ساراپتايتىن ترەنينگتەر ۇسىنۋدا. بىراق ءبىلىم الماسۋ باعدارلاماسى ءىشىنارا قولجەتىمدى. الداعى كۇندەرى ورتالىق ازيا ەلدەرىندە ونلاين وقىتۋدىڭ جۇيەسى تولىققاندى جۇمىس ىستەيتىن بولادى. بيىلعى جىلدىڭ ورتاسىنا قاراي قىزمەتكەرلەردى سەرتيفيكاتتاۋدىڭ ونلاين-باعدارلاماسى ىسكە قوسىلادى.
باعدارلاما كەڭەسشىسى – IPC (Internationale Projekt Consult GmbH) كومپانياسى. IPC شاعىن جانە ورتا بيزنەستى قارجىلاندىرۋعا بايلانىستى جوبالار مەن وقىتۋ باعدارلامالارىن جاساۋ جانە جۇزەگە اسىرۋدا مول تاجىريبەگە يە كومپانيا.
سونداي-اق بۇل باعدارلاماعا قازاقستانداعى «دامۋ» كاسىپكەرلىكتى دامىتۋ قورى» اق سەرىكتەس بولادى. اتالمىش قوردىڭ ەلىمىزدىڭ بۇكىل ايماعىندا فيليالدارى بار. ءارى «دامۋ» بيزنەسپەن, قوعامدىق ۇيىمدارمەن جانە جەرگىلىكتى اتقارۋشى بيلىكپەن ىنتىماقتاستىقتا ايتارلىقتاي تاجىريبە جيناقتاپ ۇلگەرگەن.
تۇساۋكەسەر بارىسىندا ەۋروپالىق وداقتىڭ قازاقستانداعى وكىلدىگىنىڭ سەنىمدى وكىلى زولتان سالاي «قازاقستانداعى ميكرو, شاعىن جانە ورتا كاسىپورىنداردىڭ ەڭ باستى قيىندىقتارىنىڭ ءبىرى قارجىعا قول جەتكىزۋ. مشوك-تى قولداۋ ەكونوميكانى ءارتاراپتاندىرۋ مەن يننوۆاتسيانى ىلگەرىلەتۋدە وتە ماڭىزدى. بۇعان دەيىن ەو جانە ەقدب كومەگىمەن باسقا ايماقتاردا جۇزەگە اسقان باستاما جاقسى ناتيجەلەرگە قول جەتكىزدى. ءبىز ورتالىق ازياداعى شاعىن بيزنەستى دامىتۋ باعدارلاماسى قازاقستاندا تۋرا سونداي جەمىستى بولاتىنىنا سەنىمدىمىز», دەدى.
ەقدب-نىڭ قازاقستانداعى باسشىسى اگريس پرەيمانيستىڭ سوزىنە قاراعاندا, بۇعان دەيىن شاعىن جانە ورتا بيزنەستى قارجىلاندىرۋ جونىندەگى وقىتۋ باعدارلامالارى ورتالىق ازيانىڭ قارجىلىق ينستيتۋتتارى اراسىندا ايرىقشا تانىمال بولعان. ويتكەنى باعدارلاما زاماناۋي تەحنولوگيالاردى پايدالانىپ قانا قويماي, ورتالىق ازيانىڭ اۋقىمدى اۋديتورياسىن قامتۋدى كوزدەيدى. ناتيجەسىندە بۇل مشوك-تى قارجىلاندىرۋعا قاتىستى باعدارلامالاردى جاقسارتىپ, ءتيىمدى ەتپەك.
«دامۋ» قورىنىڭ باسقارما توراعاسى اباي سارقۇلوۆ «ميكرو, شاعىن جانە ورتا بيزنەستى قارجىلاندىرۋ جانە ولارعا قىزمەت كورسەتۋ سالاسىندا ءبىلىم الماسۋ, وقىتۋ جانە تەستىلەۋ ءۇشىن تسيفرلى پلاتفورما قۇرۋ – قارجى سەكتورى ماماندارىنا بيزنەستى دامىتۋ ماقساتىنداعى قارجىلىق جوبالاردى دايىنداۋ بارىسىندا ىرىكتەۋ نەگىزدەرىن دۇرىس تۇسىنۋگە مۇمكىندىك بەرەدى», دەيدى.
ايناش ەسالي,
«ەگەمەن قازاقستان»
الماتى