ەلوردادا جاڭا تۋعان ءار نارەستەگە ءبىر ءتۇپ اعاشتان وتىرعىزىلاتىن بولادى

2018 جىلدىڭ العاشقى كۇندەرىنەن باستاپ ەلوردانىڭ دەنساۋلىق ساقتاۋ نىساندارىنىڭ پەرزەنتحانا بولىمدەرى دۇنيە ەسىگىن اشقان نارەستەلەرگە ىشىندە وتىرعىزىلعان اعاشتاردىڭ سىزباسى مەن قۇتتىقتاۋ بۋكلەتتەرى بار كونۆەرتتەردى تابىستاۋدا. استانانىڭ تابيعي رەسۋرستار جانە تابيعاتتى پايدالانۋدى رەتتەۋ مەن دەنساۋلىق ساقتاۋ باسقارمالارى بىرلەسىپ جۇزەگە اسىرىپ جاتقان «جاڭا تۋعان ءار نارەستەگە ءبىر اعاشتان» اكتسياسى قوعامدى قورشاعان ورتانى قورعاۋعا, تاريحي ءداستۇردى ساقتاۋعا شاقىرۋدى, ەكولوگيالىق ءبىلىمدى ءىس جۇزىندە ناسيحاتتاۋدى, وسكەلەڭ ۇرپاقتىڭ قورشاعان ورتاعا, سالاۋاتتى ءومىر سالتىنا دەگەن سۇيىسپەنشىلىك سەزىمىن وياتۋدى, قوعامنىڭ ەكولوگيالىق مادەنيەتىن ارتتىرۋدى, جاستاردى ەل يگىلىگى ءۇشىن يگى ىستەر جاساۋعا شاقىرۋدى كوزدەيدى.

ەكولوگيالىق اكتسيانى ۇيىمداستىرۋشىلاردىڭ اقپاراتىنا قاراعاندا, ەلوردادا تۋعان نارەستەلەردىڭ قۇرمەتىنە وتىرعىزىلعان كوشەتتەر «استانا قالاسىنىڭ جاسىل بەلدەۋىنىڭ» اۋماعىندا ورنالاسسا كەرەك. 

«ەكولوگيالىق ناۋقانعا دايىندىق 2017 جىلى باستالدى. ونىڭ اياسىندا قۇتتىقتاۋ حاتتارىن, نومىرلەرى بار اعاشتاردىڭ ورنالاسۋ سحەمالارىن ازىرلەۋ, «استانا قالاسىنىڭ جاسىل بەلدەۋىنىڭ» اۋماعىندا 4-5 جىل بۇرىن وتىرعىزىلعان بيىكتىگى ءبىر مەترگە جۋىق كوشەتتەر بار ۋچاسكەلەردى انىقتاۋ سياقتى قىرۋار جۇمىس اتقارىلدى. 

1 اقپانداعى جاعدايعا سايكەس جاسىل بەلدەۋدىڭ ورىنداۋ سىزباسى بويىنشا «قارقارالى» تاس جولى جاعىنان ورنالاسقان «قاراپايىم شەگىرشىن» كوشەتتەرى بار بىرىنشىدەن جەتىنشىگە دەيىنگى ىقتىرمالار انىقتالدى. ەكولوگيالىق اكتسياعا بارلىعى 35 ىقتىرما ءبولىندى», - دەپ مالىمدەدى استانانىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىندا. 

ايتا كەتەيىك, «جاڭا تۋعان ءار نارەستەگە ءبىر اعاشتان» اكتسياسىنىڭ باسىنان استانا قالاسىنىڭ №1, №2, №3 پەريناتالدى ورتالىقتارىندا دۇنيەگە كەلگەن سابيلەردىڭ اتا-انالارىنا 1704 قۇتتىقتاۋ حاتى تاپسىرىلدى.