بۇگىنگى كۇنى تۇرعىن ءۇي قۇرىلىس جيناق بانكى تسيفرلى تەحنولوگيالاردى جۇمىس بارىسىندا بەلسەندى تۇردە قولدانۋدا. سەبەبى مۇنداي تەحنولوگيالار حالىققا قىزمەت كورسەتۋ پروتسەسىن بۇرىنعىدان دا قولجەتىمدى, جەڭىل جانە ايقىن ەتە تۇسەدى. بانكتىڭ كليەنتتەرگە ۇسىنىپ وتىرعان تسيفرلى سەرۆيستەرى ازاماتتاردىڭ ۋاقىتىن ايتارلىقتاي ۇنەمدەپ, بولىمشەگە بارماي-اق, قاشىقتان بانك وپەراتسيالارىن جۇرگىزۋگە مۇمكىندىك بەرەدى.
ماسەلەن, تسيفرلى تەحنولوگيالاردى قولدانۋ ارقىلى بانك تۇرعىن ءۇي قۇرىلىس جيناعى تۋرالى كەلىسىمشارتتى اشۋ ۋاقىتىن 5 ەسە قىسقارتۋعا قول جەتكىزە الدى (بۇرىن بۇل 30 مينۋت ۋاقىتتى الاتىن, قازىر 7 مينۋتقا دەيىن ازايدى). بۇدان بولەك نەسيە ءوتىنىمىن قاراستىرۋ دا 1,5 كۇنگە دەيىن قىسقاردى (بۇرىنعىعا قاراعاندا 4,5 ەسە از).
بۇل زاماناۋي تەحنولوگيالاردى قولدانۋعا قاتىستى شاعىن مىسال عانا. اۋقىمدى جوبالار تۋرالى كەلەسىنى ايتۋعا بولادى.
2017 جىلدىڭ كۇزىندە قتقجب بىرەگەي سەرۆيسىن, اتاپ ايتقاندا, Baspana.kz جىلجىمايتىن م ۇلىك پورتالىن ىسكە قوستى. تۇڭعىش رەت مەملەكەتتىك باعدارلامالار اياسىندا سالىناتىن تۇرعىن ۇيلەردىڭ بارلىعى ءبىر جەرگە بىرىكتىرىلدى. بۇل جاي عانا اقپاراتتىق سايت ەمەس, بۇل – قىزمەت كورسەتۋ پورتالى. مۇندا ەلدە قانداي تۇرعىن ءۇي كەشەندەرىنىڭ سالىنىپ جاتقانى تۋرالى مالىمەتتەردى ءبىلىپ قانا قويماي, مەملەكەتتىك باعدارلاماعا قاتىسۋعا ءوتىنىش بەرۋگە, وسىدان كەيىن جوباعا قاتىسۋشى ساتىپ العىسى كەلەتىن ناقتى ءبىر پاتەردى تاڭداۋدان باستاپ مەملەكەتتىك باعدارلاما بويىنشا زاەم رەسىمدەۋگە دەيىنگى بارلىق كەزەڭدەردەن ءوتىپ شىعۋعا بولادى.
قازىرگى ۋاقىتتا پورتالدا «نۇرلى جەر» مەملەكەتتىك باعدارلاماسىنىڭ اياسىندا اكىمدىكتەر جانە «بايتەرەك دەۆەلوپمەنت» كومپانياسى سالعان نەمەسە سالىپ جاتقان 200-دەن استام نىسان تۋرالى اقپارات بار.
بۇدان بولەك Baspana.kz پورتالىندا قازىر بانكتىڭ ء«وز ءۇيىم» اتتى جەكە باعدارلاماسىنا كىرەتىن نىساندار جايىندا مالىمەتتەر ەنگىزىلۋدە. كەلەسى كەزەڭ رەتىندە پورتالدا قتقجب ارقىلى ساتىلاتىن نارىقتاعى بارلىق جاڭا ۇيلەر تۋرالى اقپاراتتى جاريالاۋ جوسپارلانىپ وتىر.
بۇگىنگى كۇنى بانكتە كەڭەسشىلەردىڭ الەۋمەتتىك جەلىسى تولىققاندى جۇمىس ىستەپ جاتىر. ول قتقجب-نىڭ شتاتتان تىس اگەنتتەرىنە بانك قىزمەتىنە قىزىعۋشىلىق بىلدىرگەن ادامنىڭ جۇمىس ورنىنا نەمەسە ۇيىنە بارىپ, قاشىقتان تۇرعىن ءۇي قۇرىلىس جيناق بانكى دەپوزيتىن اشۋعا مۇمكىندىك بەرەدى. ول ءۇشىن كەڭەسشىگە ينتەرنەتكە قوسىلعان پلانشەت جەتكىلىكتى. وسى جىلدان باستاپ بانك كەڭەسشىلەرى قاشىقتان سالىمداردى بىرىكتىرۋ, شوتتى باسقا ادامنىڭ اتىنا اۋدارۋ, سونداي-اق نەسيە الۋ ءۇشىن كليەنتتەن ءوتىنىش قابىلداۋ سياقتى قىزمەتتەردى دە اتقارا الاتىن بولاتىن.
سونىمەن قاتار بانكتە تولەم قابىلداۋدىڭ بالاما جولدارىنىڭ تولىققاندى جۇيەسى جولعا قويىلعان. وسىنىڭ ارقاسىندا كليەنتتەر باسقا بانكتەردىڭ ينتەرنەت-بانكينگى, ەلەكتروندى تولەم جۇيەلەرى, قازپوشتا, ۇيالى بايلانىس وپەراتورلارى سياقتى وزدەرىنە ىڭعايلى ادىستەرمەن دەپوزيت تولىقتىرىپ, زاەم اقىسىن وتەي الادى. بارلىعى 20-دان استام بالاما تولەم جولى بار. بانك ولاردىڭ ءبارىن ءتيىمدى قولدانۋدا. مىسال رەتىندە كەلەسى ستاتيستيكانى قاراستىرۋعا بولادى: 2016 جىلى 621 مىڭ ونلاين-تولەم جۇرگىزىلگەن, ال 2017 جىلدىڭ قورىتىندىسى بويىنشا اتالعان كورسەتكىش 1 248 288-گە جەتتى. ياعني بانك كليەنتتەرى جۇرگىزەتىن تولەمدەردىڭ شامامەن 35%-ى وسى بالاما تولەم ادىستەرى ارقىلى اۋدارىلادى.
قتقجب جەكە ينتەرنەت-بانكينگىن دە دامىتۋ ۇستىندە. قازىر بۇل سەرۆيستى 300 مىڭداي ادام پايدالانادى, ولاردىڭ ءبىر بولىگى – مەملەكەتتىك تۇرعىن ءۇي باعدارلامالارىنا قاتىساتىن سالىمشىلار. شوت تولىقتىرۋدان بولەك ينتەرنەت-بانكينگ كليەنتكە ونلاين-رەجىمدە سالىم مەن سىياقى كولەمىن, باعالاۋ كورسەتكىشىن باقىلاپ وتىرۋعا, بانك بولىمشەلەرىنە بارۋ ءۇشىن كەزەككە جازىلۋعا, پۋلعا قاتىسۋ ءۇشىن ءوتىنىش بەرۋگە مۇمكىندىك تۋعىزادى.
وسى جىلى تۇرعىن ءۇي قۇرىلىس جيناق بانكى بەينەبانكينگ اتتى بىرەگەي سەرۆيستى دامىتۋدى جالعاستىرادى. كليەنتتەر بۇل قىزمەتتىڭ كومەگىمەن بەينەبايلانىس ارقىلى بانك مەنەدجەرىنە حابارلاسىپ, قاشىقتان كەڭەس الا الادى.
قازىرگى ۋاقىتتا بەينەبانكينگ الماتى جانە ورال قالالارىنداعى بولىمشەلەردە تەستىلەۋدەن وتۋدە. الداعى ۋاقىتتا بانك ەكى تيپتەگى بەينەبانكينگتى قولدانىسقا ەنگىزۋدى جوسپارلاپ وتىر. ولاردىڭ ءبىر ءتۇرى بانك بولىمشەلەرىندە, ال ەكىنشىسى سايتتا ورنالاستىرىلادى. بەينەبانكينگ ارقىلى بولاشاقتا دەپوزيت جانە نەسيە بويىنشا كەڭەس; جاڭا كەلىسىمشارت اشۋ; شوت بويىنشا كوشىرمە الۋ; پوستدەپوزيتتىك وپەراتسيالار; انىقتاما رەسىمدەۋ قىزمەتتەرىن الۋعا بولادى.
2018 جىلى قتقجب «تسيفرلى قازاقستان» باعدارلاماسىنا بەلسەندى تۇردە قاتىسادى. بانك اقپاراتتىق جۇيەلەرىن اتتەستاتسيالاپ, بارلىق مەملەكەتتىك مالىمەتتەر بازالارىنا قوسىلۋدى جوسپارلاپ وتىر. وسىنىڭ ارقاسىندا كليەنتتەردەن سۇرالاتىن قۇجاتتار مەن انىقتامالار سانى ازايادى, قىزمەت كورسەتۋ, ونىڭ ىشىندە زاەم بەرۋ بويىنشا شەشىم قابىلداۋ ۋاقىتى قىسقارادى.
ءلاززات يبراگيموۆا, «قازاقستاننىڭ تۇرعىن ءۇي قۇرىلىس جيناق بانكى» اق باسقارما ءتورايىمى
الماتى