الىپ الاتاۋدىڭ ارعى بەتى مەن بەرگى بەتىن ەن جايلاعان قازاق پەن قىرعىز ەجەلدەن توسكەيدە مالى, توسەكتە باسى قوسىلعان حالىق. ايىر قالپاقتى اعايىندارمەن ءبىزدىڭ رۋحاني تۋىستىعىمىز تاعى بار. ۇلى عالىم شوقان ءۋاليحانوۆتىڭ ىستىقكول ساپارىن جازۋى, ماناس جىرىن حاتقا ءتۇسىرۋى, ءسۇيىنباي مەن قاتاعاننىڭ ايتىسى, شىڭعىس ايتماتوۆتىڭ ايگىلى مۇحتار اۋەزوۆكە شاكىرت بولۋى, ءبارى دە ەكى ەلدىڭ رۋحاني بايلانىسىن كورسەتەدى. ال جامبىل مەن توقتاعۇل ەسىمدەرىنىڭ قاتار اتالۋى دا رۋحاني بەرىكتىكتىڭ دالەلى. بۇل تۇرعىدا قازاق پەن قىرعىز دوستىعى كۇن ساناپ ارتىپ كەلەدى.
جامبىل وبلىسىنىڭ قورداي اۋدانى قىرعىز رەسپۋبليكاسىنىڭ بىشكەك قالاسىمەن, جامبىل اۋدانى تالاس وبلىسىمەن شەكتەسەدى. جاقىندا ەكى ەلدىڭ بايلانىسىن ودان ءارى نىعايتۋ, رۋحاني تۋىستىقتى ارتتىرۋ ماقساتىندا قىرعىز ەلىنىڭ تالاس وبلىسىندا «دوستىقتا جوق شەكارا» اتتى دوستىق پەن ىنتىماقتاستىق فەستيۆالى ءوتتى. اتالعان فەستيۆالگە اۋليەاتا وڭىرىنەن جامبىل وبلىستىق قازاقستان حالقى اسسامبلەياسى حاتشىلىعىنىڭ وكىلدەرى باحروم مۋمينوۆ, ۇلتۋار باباقۇلوۆا, قازاق ەتنومادەني بىرلەستىگى توراعاسىنىڭ ورىنباسارى ايگۇل قابيەۆا, قىرعىز ەتنومادەني بىرلەستىگىنىڭ جەتەكشىسى انار سۇلەيمەنقىزى, «دنەپرو» ۋكراين ەتنومادەني بىرلەستىگىنىڭ توراعاسى فەدور كليمەنكو جانە جامبىل وبلىسى اكىمى اپپاراتىنىڭ «قوعامدىق كەلىسىم» مەكەمەسى ادىستەمەلىك ءبولىمىنىڭ مەڭگەرۋشىسى ساۋلە قۇرماناليەۆا سىندى ازاماتتارمەن قاتار, وبلىستىق فيلارمونيانىڭ ونەرپازدارىنان قۇرالعان 60 ادام باردى.
جامبىلدىقتاردى تالاس وبلىسى, ماناس اۋدانى اكىمىنىڭ ءبىرىنشى ورىنباسارى زامير قۇرماناليەۆ باستاعان قىرعىز اعايىندار اۋدان شەكاراسىنان كۇتىپ الىپ, قوناقجايلىلىق تانىتتى. بۇدان كەيىن ەكى ەلدىڭ ازاماتتارى «ماناس اتا» كەسەنەسىنە بارىپ, ارۋاققا قۇران باعىشتادى. سونىمەن قاتار تالاس وبلىسى گۋبەرناتورىنىڭ ورىنباسارى ءازيات جارقىناليەۆا جول باستاپ, اۋليەاتالىقتار «ماناس اتا» تاريحي-تانىمدىق مۋزەيىن ارالادى.
جامبىلدىق ونەرپازدار تالاس وبلىسىنىڭ قاپار مەدەتبەكوۆ اتىنداعى مۋزىكالىق دراما تەاترىندا «قازاقستان – دوستىق پەن تاتۋلىقتىڭ مەكەنى» اتتى كونتسەرت بەرىپ, قىرعىز جەرىن انمەن تەربەتتى. ءوز سوزىندە تالاس وبلىسىنىڭ گۋبەرناتورى مارات مۇراتاليەۆ بۇگىندە قازاق پەن قىرعىز تاتۋلىعى جاراسقان ەلدەر ەكەنىن, قازىرگى تاڭدا ەكى ەلدىڭ ساياسي-ەكونوميكالىق ىنتىماعىنىڭ دا جوعارى ەكەنىن اتاپ ءوتتى. بۇدان كەيىن اۋليەاتالىق دەلەگاتسيانى باستاپ كەلگەن باحروم مۋمينوۆ پەن ۇلتۋار باباقۇلوۆا ءسوز سويلەپ, مارات مۇراتاليەۆكە العىس ايتتى.
كونتسەرتتە جامبىل جەرىنەن بارعان «اقكەربەز» بيشىلەر ءانسامبلىنىڭ, «الاتاۋ» فولكلورلىق ءانسامبلىنىڭ ونەرى قىرعىز اعايىنداردى ءتانتى ەتتى. سونداي-اق جاس ونەرپازدار ديدار باسىعاراەۆ پەن توعجان شاعىرباەۆانىڭ كۇي سايىسىنا, اعايىندى مارعۇلان مەن سۇلۋجان دۋەتىنىڭ, عاني ماتەباەۆ, وڭال ازاماتوۆا, جاننا اسانقۇلوۆا جانە وزگە دە ونەرپازداردىڭ ونەرىنە كوپشىلىكتىڭ قۇرمەتى جوعارى بولدى.
حاميت ەسامان, «ەگەمەن قازاقستان»
جامبىل وبلىسى