سولتۇستىك كورەيانىڭ حوككەيشى قىزدارىنان قۇرالعان دەلەگاتسيا قىسقى وليمپياداعا دايىندالۋ ءۇشىن وڭتۇستىك كورەياعا باردى.
وسىعان دەيىن قوس كورەيا ءبىر تۋدىڭ استىندا شىعاتىنى, حوككەيشىلەرى ءبىر قۇرامادا ونەر كورسەتەتىنى حابارلانعان. بۇگىن سولتۇستىكتىڭ 12 حوككەيشىسى وڭتۇستىكتەگى ارىپتەستەرىنە قوسىلىپ, جاتتىعۋعا كىرىستى.
كورەي حالىق دەموكراتيالىق رەسپۋبليكاسىنىڭ (كحدر) قىسقى وليمپياداعا قاتىساتىنى باستاپقىدا بەلگىسىز بولعان. الايدا, كحدر باسشىسى كيم چەن ىن جاڭاجىلدىق قۇتتىقتاۋىندا پەنچانگتاعى ويىندارعا قاتىسۋ ماسەلەسىن قاراستىرىپ جاتقانىن مالىمدەدى. بۇل ويدى وڭتۇستىك كورەيانىڭ پرەزيدەنتى مۋن چجە ين جىلى قابىلداپ, ماسەلەنى تالقىلاۋ ءۇشىن كەلىسسوز وتكىزۋدى ۇسىندى. ال كەلىسسوز 9 قاڭتار كۇنى ءساتتى اياقتالدى. قورىتىندىسى بويىنشا وليمپيادانىڭ اشىلۋىندا قوس كورەيا ءبىر تۋدىڭ استىندا شىعادى.
كەلىسسوز بويىنشا وليمپيادا كەزىندە ءار ماتچقا كەمىندە ءۇش سولتۇستىككورەنيالىق حوككەيشى شىعۋى ءتيىس. وڭتۇستىك كورەيا حوككەيشىلەرى باستاپقىدا بۇعان نارازىلىق تانىتقان. وعان نەگىزگى سەبەپتىڭ ءبىرى – وڭتۇستىك سپورتشىلارىنىڭ ويىن پراكتيكاسى ازايۋى.
«سولتۇستىك كورەيا حوككەيشىلەرىن قاتارىمىزعا قوسۋ تۋرالى كەلىسسوزدەر ءجۇرىپ جاتىر. بۇل بىزگە ۇناماي تۇرعانى جاسىرىن ەمەس. سەبەبى وڭتۇستىك كورەيا قۇراماسىنىڭ 23 ويىنشىسى وليمپياداعا جولداما الدى. ولار وسى جارىسقا قاتىسۋ ءۇشىن بارىن سالدى. ەندى وزگە حوككەيشىلەر قاتارىمىزدى تولتىرسا, قۇراما ساپىنداعى قىزداردىڭ ءبىرازى وليمپيادادان تىس قالۋى مۇمكىن عوي. سوندىقتان قىزدارىمىز وسىعان الاڭداپ وتىر», دەگەن ەدى حوككەيدەن وڭتۇستىك كورەيا ايەلدەر قۇراماسىنىڭ جاتتىقتىرۋشىسى سارا ميۋررەي.
دەگەنمەن حالىقارالىق وليمپيادا كوميتەتى وڭتۇستىك كورەيانىڭ 23 حوككەيشىسىنە كحدر-ءدىڭ 12 سپورتشىسىن قوسۋ تۋرالى ۇسىنىسقا كەلىسىمىن بەردى.
«كوماندانىڭ ساياسي ماقساتتا قولدانىلۋى قيىن جاعداي. بىراق بۇل بىزگە عانا ەمەس, بارىمىزگە ماڭىزدى», دەدى سارا ميۋررەي.
الەمدىك ساراپشىلار سولتۇستىك كورەيانىڭ قىسقى وليمپياداعا قاتىسۋى حالىقارالىق سانكتسيالاردىڭ جۇمسارۋىنا اكەلۋى مۇمكىن دەگەن بولجام جاساپ وتىر.