ابايدىڭ «جيدەباي-ءبورىلى» مەملەكەتتىك قورىق-مۋزەيىندە «اقجول» دەموكراتيالىق پارتياسى جانە شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ بىرىككەن جوباسى بويىنشا «الاش» ۇلتتىق اۆتونومياسىنىڭ 100 جىلدىعىنىڭ قۇرمەتىنە» ارنالعان ەستەلىك مەدالىمەن ماراپاتتاۋ ءراسىمى ءوتتى.
وسى اتالعان مەدالدى ەل مۇددەسى جولىندا ەڭبەك ەتىپ كەلە جاتقان وڭىرىمىزگە تانىمال ءبىر توپ زيالى قاۋىمعا سەمەي ايماقتىق «اقجول» پارتياسىنىڭ توراعاسى راحات التاي ارنايى تابىستادى. الاشوردا ۇكىمەتىنىڭ نەگىزىن قالاعان ارىستارىمىزدىڭ تاۋەلسىزدىك جولىندا جانكەشتى ەڭبەكتەرىن جان-جاقتى ناسيحاتتاپ كەلە جاتقان جەرلەستەرىمىز دە از ەمەس. ەستەلىك مەدالمەن اباي قورىق-مۋزەيىنىڭ ديرەكتورى بولات جۇنىسبەكوۆ, ابايتانۋشى-فيلوسوف اسان وماروۆ, الاشتانۋشى تۇرسىن شاڭباي, ە.جەتىباەۆ, ا.مۇحامەدچينوۆ, س. سىپاتاي سىندى ازاماتتار ماراپاتتالدى.
سونىمەن قاتار, شىعىس قازاقستان وبلىسى «اقجول» پارتياسى فيليالى توراعاسىنىڭ ورىنباسارى بۇركىت سۇلتانوۆ الاش قوزعالىسىنىڭ 100 جىلدىعىن اتاپ ءوتۋ شاراسىنا ۇيىمداستىرۋ جۇمىستارىنا بەلسەنە اتسالىسقاندارعا قر مادەنيەت جانە سپورت ءمينيسترى ارىستانبەك مۇحامەدي ۇلىنىڭ جانە «اقجول» قازاقستان دەموكراتيالىق پارتياسىنىڭ توراعاسى ازات پەرۋاشەۆتىڭ العىس حاتىن قالامىزعا بەلگىلى الاشتانۋشى عالىمدارعا, الاش قوزعالىسىنىڭ 100 جىلدىعى قارساڭىندا قولداۋ كورسەتكەن تۇلعالارعا تابىستادى. شارا بارىسىندا مۇقان تولەباەۆ اتىنداعى مۋزىكالىق كولەدجىنىڭ ۇستازى, ءانشى-سازگەر سامات سىپاتاي سەرىك قۇسانباەۆتىڭ سوزىنە جازىلعان «ارىستار قايدا؟» ءانىن ورىنداپ, كوپشىلىكتى ەرەكشە اسەرگە بولەدى.
سونداي-اق, اباي شاڭىراعىنىڭ اقىندارى قايرات سابىرباي, ب.احمەر تاۋەلسىزدىككە ارنالعان ولەڭدەرىن وقىدى. شاراعا قاتىسۋشى قوناقتار «م.اۋەزوۆ – الاش ارىستارى» مۋزەيىنىڭ ەكسپوزيتسياسىن جانە اباي مۋزەيىندە ورنالاسقان ش.قۇدايبەردى ۇلىنىڭ 160 جىلدىعىنا ارنالعان «ارقاشان ۇمىتىلماسقا...» كورمەسىن تاماشالادى. شارا سوڭىندا جيىلعان قاۋىم الاش كوسەمى الەيحان بوكەيحان ۇلىنىڭ ەسكەرتكىشىنە گۇل شوقتارىن قويىپ, بابا رۋحىنا تاعزىم جاسادى.
راۋشان نۇعمانبەكوۆا, سۋرەتتەردى تۇسىرگەن اۆتور
سەمەي