وتكەن عاسىردىڭ 60-جىلدارى كەڭەس وداعىنا قاراستى تۋۆا رەسپۋبليكاسىنىڭ وۆيۋر اۋدانى جانە ەرەكشە مۋنيتسيپالدى اكىمشىلىك بىرلىك تەس-حەم ولكەسى مەن موڭعوليانىڭ باتىسىندا ورنالاسقان ۇبىس ايماعى اراسىندا مال جايىلىمىنا قاتىستى شەكارا داۋى تۋىندايدى.
وسى ماسەلەنى رەتتەۋ ءۇشىن بۋرياتيا اسسر-ءنىڭ جوعارعى كەڭەس توراعاسى حوحلوۆ باستاعان وكىلدەر ۇبىس ايماعىنا كەلەدى. بۇل ايماقپەن بايولكە ەلى ءبۇيىرى جابىسقان ەجەلگى كورشى. جوعارىداعى رەسمي دەلەگاتسيا قۇرامىندا قازاقستان كوممۋنيستىك پارتياسى ورتالىق كوميتەتىنىڭ مۇشەسى, قازاق كسر جوعارعى كەڭەسىنىڭ دەپۋتاتى, كسرو جازۋشىلار وداعىنىڭ باسقارما مۇشەسى, بەدەلدى جازۋشى ءسابيت مۇقانوۆ تا بولعان ەكەن.
مەملەكەتارالىق ماسەلە وڭتايلى شەشىلگەن سوڭ سابەڭ قولسوزىم ىرگەدە تۇرعان بايولكە ايماعىنا سوقپاي كەتۋگە ءداتى جەتپەي, دەلەگاتسيا باسشىسىن وندا 2-3 كۇن ايالداۋعا كوندىرگەن ەكەن.
ءسويتىپ 1966 جىلدىڭ قوڭىر كۇزىندە قوبدا بەتىندەگى از قازاقتىڭ شوعىرى ءومىر ءسۇرىپ جاتقان ولگەي قالاسىنا اتاقتى جازۋشى ءسابيت مۇقانوۆ كەلىپ تۇسەدى. سابەڭنىڭ مۇندا كەلۋى بايولكەلىك قازاقتار ءۇشىن كوكتەن عايسا تۇسكەندەي اسەر قالدىردى, دەپ جازادى كوپپەن بىرگە جازۋشىنى كۇتىپ الۋشىلار قاتارىندا بولعان, بۇگىندەرى استانا تۇرعىنى, فيلولوگيا عىلىمدارىنىڭ دوكتورى قابيداش قالياسقار ۇلى.
ويتكەنى سول جىلدارى قاي قازاق بولسىن سابەڭنىڭ «بوتاكوز» رومانىن وقىپ شىققان, «سۇلۋشاش» پوەماسىن ەكىنىڭ ءبىرى جاتقا ايتاتىن, ناعىز ءبىر رۋحاني جۇتىنىپ تۇرعان زامان ەدى.
حالىق سابەڭنەن نەسىن اياسىن, جازۋشىعا سالەم بەرە كەلگەن 70-80 اقساقالدىڭ بارىنە توستىك قاقتاتامىز دەپ وسىنشاما قوي سويىپتى. مۇنى كورگەن جازۋشى باسىن شايقاپ: «ىسىراپقا بارماڭدار, اسىرە تىم اقكوڭىل ەكەنسىڭدەر», دەگەن دەيدى. قىسقاسى بايولكەلىك قازاقتار ءسابيت مۇقانوۆقا توبەسىندە ۇكىلى, سىرمالى جەلدىك باۋمەن نوقتالانعان اق بوتا سىيلاعان ەكەن (سۋرەتتە).
جارىقتىق جازۋشى اتامىز قونالقاعا حوحلوۆ ەكەۋىنە ارنايى دايىنداعان قوناق بولمەگە ءبىر قاراپ, «قازاقتارىم ءاتىر ساسىعان ورىستىڭ قاسىندا كۇندە قونىپ ءجۇرمىن عوي, ودان دا مەنى انا ەكى شالدىڭ قاسىنا اپارىڭدارشى» دەگەن ەكەن. سابەڭ ايتقان ەكى شال دا وسال ەمەس, ءبىرى – سوتسياليستىك ەڭبەك ەرى, شوپان, شەجىرەشى سەرىكباي جۋانعان ۇلى بولسا, ەكىنشىسى داڭعىل اقىن – اقتان بابي ۇلى.
ساپارى اياقتالعاننان كەيىن سابەڭ جولاي مەملەكەت باسشىسى يۋ.تسەدەنبالعا جولىعىپ, مۇنداعى قازاقتارعا قاتىستى ۇستانىپ وتىرعان پارتيا ساياساتىنا ۇلكەن راحمەت ايتىپتى. قازاقستانعا ورالعان سوڭ بۇل ساپارى جايلى «سوتسياليستىك قازاقستان» گازەتىنە شاعىن ماقالا جازىپتى.
بەكەن قايرات ۇلى, «ەگەمەن قازاقستان»