سەنات دەپۋتاتتارى قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىنىڭ جۇمىسىمەن تانىستى.
ءىس-شاراعا سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا جانە تالعات مۇساباەۆ, دارحان كالەتاەۆ سىندى كوميتەتتىڭ بىرقاتار وكىلدەرى قاتىستى.
حالىق قالاۋلىلارى زاماناۋي وقۋ ورنىنداعى كافەدرالارداعى زەرتحانالاردى ارالادى. قازىرگى تاڭدا ءبىلىم ورداسىندا وقىتۋدىڭ جاڭا تاسىلدەرى مەن ۇلگىلەرى جۇزەگە اسىپ جاتىر. ماسەلەن جاڭا زەرتحانا گرافيكالىق, ماتىندىك جانە مۋلتيمەديالىق اقپاراتپەن جەدەل الماسۋعا, جۇمىس كارتاسىن جۇرگىزىپ, اسكەري قۇرىلىمداردى باسقارۋ جونىندە شەشىم قابىلداۋعا مۇمكىندىك بەرەدى.
سونىمەن قاتار دەپۋتاتتار ۋنيۆەرسيتەتتەگى كىتاپحانا قورىمەن تانىستى. وندا اسكەري سالالاردىڭ ءتۇر-تۇرىنە ارنالعان زاماناۋي الەمدىك مونوگرافيالار, عىلىمي ماقالالار, وقۋ قۇرالدارى بار. ءبىلىم ورداسىنىڭ باسشىلىعى كىتاپحانانىڭ جىل سايىن تولىعىپ, جاڭارىپ وتىراتىنىن ايتادى.
ء«بىزدىڭ قارۋلى كۇشتەرىمىز – جاڭا قارۋ-جاراقپەن قامتاماسىز ەتىلگەن زاماناۋي اسكەر. سالاعا تسيفرلى جۇيە مەن جاڭا تەحنولوگيانى ەنگىزۋىمىز كەرەك. بۇگىندە اسكەردى تسيفرلاندىرۋدىڭ ماڭىزى زور. ەلىمىز بۇل جولعا ەندى ءتۇسىپ كەلەدى, ايتسە دە قازىردىڭ وزىندە كوكجيەگىمىز كەڭ ەكەنى بايقالادى. ال بۇل ۋنيۆەرسيتەت زامان تالابىنا ساي ءبىلىم بەرەدى», دەدى سەنات دەپۋتاتى تالعات مۇساباەۆ.
ۋنيۆەرسيتەت باسشىلىعىنىڭ ايتۋىنشا, وقۋ ورنىندا ءتالىم الاتىن ستۋدەنتتەرگە بارلىق جاعداي جاسالعان. ولاردى زاماناۋي بىلىممەن قامتاماسىز ەتۋ ءۇشىن اعىلشىن ءتىلى كۋرسى دا ۇيىمداستىرىلىپتى. ءبىلىم ورداسىندا ماگيستراتۋرا, دوكتورانتۋرا دەڭگەيىن الۋعا مۇمكىندىك بار.
سەنات دەپۋتاتتارى اسكەري عىلىمي-زەرتتەۋ ورتالىعىنىڭ جۇمىسىمەن دە تانىسىپ, ەلىمىزدىڭ قورعانىس-ونەركاسىپتىك كەشەنىن ازىرلەۋ بارىسىن باقىلاپ قايتتى. شارا سوڭىندا كوميتەت توراعاسى د.نازارباەۆا قۇرمەت كىتابىنا ءوز تىلەگىن قالدىردى.
اباي اسانكەلدى ۇلى, «ەگەمەن قازاقستان»