وڭتۇستىك جاستارىن شەتەلدىڭ وقۋ ورىندارى شاقىرادى

ونىڭ ءبىر سەبەبى رەتىندە حالىقتىڭ «بولاشاق» باعدارلاماسى تۋرالى اقپاراتپەن قانىقپاعانى ايتىلۋدا. «حالىقارالىق باعدارلامالار ورتالىعى» اق-ى وسى ماسەلەنى شەشۋ, وزگە ەلگە بارىپ ءبىلىم الاتىنداردىڭ قاتارىن كوبەيتۋ ماقساتىندا الەمنىڭ دامىعان ەلدەرىنىڭ جانە وتاندىق جوعارى وقۋ ورىندارىنىڭ وكىلدەرىن شاقىرىپ, شىمكەنتتەگى «Rixos Khadisha Shymkent» قوناقۇيىندە ءبىلىم كورمەسىن ۇيىمداستىردى. «قازىرگى تاڭدا وزگە ەلدەردە وقيتىن جاستاردىڭ 85 پايىزى استانا, الماتى قالالارىنا تيەسىلى. ەندى وڭتۇستىكقازاقستاندىق جاستاردىڭ سانىن ارتتىرساق دەگەن جوسپار بار», - دەيدى ج.مەلدەشوۆ.

ءبىلىم جانە عىلىم مينسترلىگىنىڭ قولداۋىمەن وتكەن «حالىقارالىق ءبىلىم بەرۋ – 2018» كورمەسىنە وبلىس اكىمى جانسەيىت تۇيمەباۆ قاتىسىپ, قوناقتارعا ءوڭىردىڭ ءبىلىم سالاسىنداعى مۇمكىندىكتەرى مەن الەۋەتىن تانىستىردى.

«ەلباسى ءاردايىم ءوزىنىڭ حالىققا ارناعان جولداۋلارىندا جاستاردىڭ ءبىلىمدى دە, باسەكەگە قابىلەتتى بولۋ كەرەكتىگىن ايتىپ كەلەدى. مىنە, وسى ماقساتتا «بولاشاق» حالىقارالىق ستيپەندياسى قۇرىلدى. اتالعان باعدارلاما اياسىندا الەمنىڭ 35-تەن استام ەلىندە 12 مىڭنان استام قازاقستاندىق ازامات ءبىلىم الدى. بۇگىندە باعدارلاما بويىنشا ءبىلىم العان 300-دەن استام وڭتۇستىكقازاقستاندىق جاس ەلىمىزدىڭ ەكونوميكالىق دامۋىنا ءوز ۇلەستەرىن قوسۋدا. حالىق سانى جاعىنان كوش باسىندا تۇرعان وڭىرىمىز «بولاشاق» باعدارلاماسىنا قاتىسۋ بويىنشا دا ءبىرىنشى ورىندا بولۋ كەرەك دەپ ويلايمىن», - دەدى جانسەيىت قانسەيىت ۇلى.

كورمەگە اقش, ۇلىبريتانيا, ەۋروپا مەن ازيا جانە تمد ەلدەرىنىڭ 83 جوعارى وقۋ ورىندارى, ءتىل ۇيرەتۋ مەكتەپتەرى مەن ءبىلىم اگەنتتىكتەرى قاتىستى. ولار شارا بارىسىندا شەت تىلدەرىندە ەركىن سويلەيتىن, قابىلەتتى جاستاردى وقۋعا شاقىردى. كورمەگە ءبىرىنشى كۇننىڭ وزىندە شەتەلدە وقۋدى ارماندايتىن 4 مىڭنان استام جاس كەلدى.

سونداي-اق, كورمە اياسىندا قازاقستاندىق جانە شەتەلدىك جوعارى وقۋ ورىندارىنىڭ ءبىلىم اگەنتتىكتەرى اراسىندا كەزدەسۋ ۇيىمداستىرىلىپ, «بولاشاق» باعدارلاماسىن پايدالانۋ اۋقىمىن كەڭەيتۋ جايى تالقىلاندى.

عالىمجان ەلشىباي, «ەگەمەن قازاقستان»