«استانا وپەرا» مەملەكەتتىك وپەرا جانە بالەت تەاترى ساحناسىندا وتكەن «ۆوكال سيقىرى» اتتى ونەر كەشىندە الەمدىك وپەرانىڭ ءىنجۋ-مارجاندارى شىرقالدى. پاريجدىك «گراند وپەرادا» قازاقستاننىڭ اتىنان العاش رەت ونەر كورسەتكەن سوليست مايرا مۇحامەدقىزى بۇل جولى ۇستازدىق ۇلاعاتىمەن جاڭا بيىكتەن كورىندى. ولاي دەيتىن سەبەبىمىز, قاشان بولسىن جاستارعا قولداۋ كورسەتۋگە ءازىر جۇرەتىن ءانشى ءوز قولىمەن جەتەلەپ اكەلىپ, شاكىرتى ايگەرىم سارسەنوۆانى قالىڭ جۇرتشىلىققا تانىستىردى.
بۇگىندە ايگەرىم سارسەنوۆا ۆەنالىق ا.كاراندجەلو بەلكانتو اكادەمياسى مەن فورتەپيانو ونەرى ينستيتۋتىنىڭ ستۋدەنتى. يتاليا مەن چەحياداعى كونتسەرتتەر مەن شەبەرلىك ساباقتارىنا قاتىسا ءجۇرىپ, كاسىبي بىلىكتىلىگىن شىڭداعان جاس تالانت الدىمەن وسكەن ەل, تۋعان جۇرتىنىڭ باتاسىن الىپ, العىسىنا كەنەلۋدى ءجون ساناپتى. «ايگەرىم ءوز ەلىنىڭ كيەلى ساحناسىندا العاش رەت جەكە كونتسەرتىن بەرىپ وتىر. «ۇستازدان شاكىرت وزار» دەگەندەي, ايگەرىم ەكەۋمىزدىڭ ونەرگە دەگەن تالاپ پەن جىگەرىمىز دە ۇقسايدى. تالانتتى شاكىرتتەرىمىزبەن قالايشا ماقتانبايمىز. ەندىگى جولىڭ جارقىن بولسىن», دەپ اق جول تىلەگەن ۇستازى مايرا مۇحامەدقىزىنىڭ شاكىرتى ايگەرىممەن بىرگە شارىقتاتا ءان سالۋى كەشتىڭ ناعىز كوركىنە اينالدى دەرسىز.
تاڭداناتىنى جوق, موتسارتتىڭ «دون جۋانى» قاشاندا وپەرانىڭ شىڭى سانالىپ كەلگەن بولسا, «فيگارونىڭ ۇيلەنۋ تويى» تىڭدارماندار ءۇشىن ەڭ ءبىر سۇيىكتى شىعارمالاردىڭ بىرەگەيىنە اينالعان. كەز كەلگەن ترۋپپانىڭ رەپەرتۋارىنان تابىلاتىن ەسكىدەن كەلە جاتقان اتاقتى وپەرا مەرەكەلىك اتموسفەراسىمەن ميلليونداعان تىڭدارماننىڭ جۇرەگىن جاۋلاپ العانى راس. اتالعان كەشتە ءدال وسى «فيگارونىڭ ۇيلەنۋ تويى» وپەراسىنان گرافينيا كاۆاتيناسىن ورىنداۋ ارقىلى ايگەرىم سارسەنوۆا تالعامدى تىڭدارماننىڭ كوڭىل پەرنەسىن ءدوپ باستى. ول ليريكالى-درامالى سوپرانوسىمەن سىزىلتا ورىنداپ باستاعاندا-اق دەمىن ىشىنە العان زال ءبىر ءسات تىنىپ قالعان. مانەرلى اۋەن لەبىمەن استاسقان كەيىپكەر سوزدەرىنىڭ جۇمساقتىعى مەن جىلۋى قاتار ەسكەندە پەيزاج قانىقتىعى ايقىندالا ءتۇسىپ, جارقىن دا نازىك اريا ەكپىندى ۇمتىلىسپەن اياقتالعاندا بارىپ, الگىندەگى تىنىشتىق «باسە» دەسىپ جەلپىنىسكەن قاۋىمنىڭ ريزاشىلىققا تولى قوشەمەتىنە ۇلاستى. ودان كەيىنگى كەزەكتە الەمدىك وپەرا رەپەرتۋارىنان ۆ.بەللينيدىڭ «كاپۋلەتتي مەن مونتەككي» وپەراسىنان دجۋلەتتا ارياسى, ا.كاتالانيدىڭ «ۆاللي» وپەراسىنان ۆاللي ارياسى, «مانون لەسكو» وپەراسىنان مانون ارياسى, «بوگەما» وپەراسىنان ميۋزەتتا ءۆالسى قاتارىنان شىرقالدى.
كەشتىڭ سىيلى قوناقتارى – يتاليادان كەلگەن ايگىلى ورىنداۋشىلار – تەنور انتونيو كاراندجەلو مەن كونترالتو بيليانا كوۆاچتىڭ دۋەتتينوسى دۋماننىڭ شىرايىن كىرگىزدى. ال ماەسترو انتونيو كاراندجەلونىڭ «استانا وپەرا» تەاترى ساحناسىندا العاش رەت ونەر كورسەتكەنىن ەرەكشە ايتا كەتۋىمىز كەرەك. ول وپەرا ءسوليسى عانا ەمەس, سونىمەن بىرگە ۆەناداعى اتاقتى The Carangelo Belcanto Academy ورداسىنىڭ ۇستازى. ال فورتەپيانودا انسامبلدە ويناعان تانىمال چەح كونتسەرتمەيستەرى ماريا لەكسوۆا تازا دا تۇنىق كاسىبيلىگىمەن دارالاندى.
ايا ءومىرتاي,
«ەگەمەن قازاقستان»