مەملەكەت باسشىسىنىڭ بيىلعى جولداۋىندا دەنساۋلىق ساقتاۋ سالاسىنا قاتىستى ماڭىزدى ماسەلەلەر ايتىلىپ, بىرقاتار تاپسىرمالار جۇكتەلدى. ەلباسى قازىرگى دەنساۋلىق ساقتاۋ ءىسى قىمباتقا تۇسەتىن ستاتسيونارلىق ەمگە ەمەس, نەگىزىنەن اۋرۋدىڭ الدىن الۋعا باعىتتالۋ كەرەكتىگىن, سالانى كادرلارمەن قامتاماسىز ەتۋ جانە ولاردى ساپالى دايارلاۋ ماسەلەلەرىن العا تارتتى. سوندىقتان بۇل قۇجات ەلدىڭ دەنساۋلىعىن تۇزەتۋگە جاۋاپتى مەكەمەلەر مەن ماماندارعا ۇلكەن جاۋاپكەرشىلىك ارتقانى انىق.
پرەزيدەنت اتاپ وتكەندەي, مەديتسينالىق تەحنولوگيالاردىڭ دامۋىنا بايلانىستى مەديتسينالىق قىزمەت كورسەتۋگە دەگەن سۇرانىس كولەمى دە ارتا تۇسەدى. دەمەك, مەديتسينانىڭ قاي سالاسى بولسىن, زامان تالابىنا ساي جۇمىس ىستەپ, پاتسيەنتتەرگە ەڭ جوعارى ساپالى قىزمەت كورسەتۋگە, ۇيىمدى سوڭعى ۇلگىدەگى قۇرال-جابدىقتارمەن قامتاماسىز ەتۋگە ۇمتىلۋى كەرەك.
ءوز باسىم استانا قالاسىنداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىن 17 جىلدان بەرى باسقارىپ كەلەمىن. وسى ۋاقىتتىڭ ىشىندە تراۆماتولوگيا سالاسى دا ۇلكەن وزگەرىستەردى باستان كەشتى. مىسالى, كەزىندە ورتان جىلىكتىڭ موينى سىنعان ادامدارعا سالعان كەڭەستىك پروتەزدەردىڭ تەحنولوگياسىنىڭ ساپاسى تىم تومەن ەدى. تەمىر زاتتارى تەز جەلىنىپ, ۇزاققا جاراماي مورت سىنىپ كەتەتىن. پروتەزدى قايتا-قايتا اۋىستىرىپ, پىشاققا ءتۇسۋ ناۋقاستارعا دا وڭاي بولعان جوق. مۇنىڭ ءبارى وسى سالاعا جاڭا تەحنولوگيا كەرەكتىگىن اڭعارتتى. ءبىزدىڭ ماماندار ادام ەمدەۋمەن عانا ەمەس, ءوز سالالارىنا قاتىستى زەرتتەۋلەر جۇرگىزىپ, تىڭ جاڭالىقتار الىپ كەلۋگە ۇمتىلدى. وسى سالاداعى ەڭ ۇزدىك تەحنولوگيالاردى زەرتتەدىك. الەمدىك تراۆماتولوگيا سالاسىنداعى سوڭعى تابىستاردى سارالاي كەلە تۇيگەنىمىز, پروتەز جاساۋ ىسىندە نەمىستەردەن ارتىق ەشكىم جوق ەكەنىنە كوزىمىز جەتتى. گەرمانيانىڭ بۋىن اۋىستىرۋداعى ءادىس-تاسىلدەرىن ەركىن مەڭگەرگەن دارىگەرلەرىمىز ءنوۆوسىبىردىڭ عىلىمي-زەرتتەۋ ينسيتيتۋتى ماماندارىمەن بىرلەسىپ, ومىرتقانى كونسترۋكتسيامەن بەكىتۋدىڭ قىر-سىرىن يگەردى. مۇنداي زاماناۋي تەحنولوگيانىڭ تيىمدىلىگىن ەل كوردى.
بۇرىن ومىرتقاسى سىنعان ادام بىرنەشە ايلاپ, اۋرۋحانا توسەگىندە تاڭىلىپ جاتسا, جاڭا تەحنولوگيا كەلگەلى بىرنەشە كۇننەن كەيىن-اق اياعىنان تۇرىپ كەتەتىن بولدى. بيىك قۇرىلىستان قۇلاپ, ومىرتقاسىن سىندىرعان ادامداردىڭ ءبارى دە بەس اي كولەمىندە جۇمىسىنا قايتا ورالدى.
سونداي-اق ەلىمىزدەگى تراۆماتولوگيا سالاسىنداعى كۇردەلى وپەراتسيالاردى جاسايتىن ينستيتۋتقا پروتەز سالدىرعىسى كەلەتىن سىرقات جاندار بۇرىن كەزەگىن بىرنەشە جىل بويى سارىلا كۇتەتىن. ال قازىر نەبارى 8-9 ايدىڭ ىشىندە شاقىرتۋ الاتىن بولدى. مىنە تىڭ تەحنولوگيانىڭ قۇدىرەتى دەگەنىمىز وسى. سونداي-اق ابايسىزدا شابىلعان, كەسىلگەن ساۋساقتاردى جۇمساق ەتتەرىنىڭ جىڭىشكە تامىرلارى ارقىلى قوسىپ, قالپىنا كەلتىرەتىن ءادىستى دە ەنگىزدىك. اسقان شىدامدىلىق پەن شەبەرلىكتى قاجەت ەتەتىن مۇنداي وپەراتسيالاردى جاسايتىن حيرۋرگيالىق بولىمشەلەر تۇتاس زاماناۋي قۇرىلعىلارمەن جابدىقتالعان. مۇندا جاراقاتتانعان جەردى سەگىز ەسەگە دەيىن ۇلكەيتىپ كورسەتەتىن رەنتگەن اپپاراتتارى, سۇيەكتى قاي جەرىنەن, قانداي كولەمدە الۋ كەرەكتىگىن ەسكەرتىپ, ونداعى قىسىمنىڭ دەڭگەيىن كورسەتىپ تۇراتىن ارنايى ناۆيگاتسيالىق جۇيە ورناتىلعان.
ارينە, مەديتسينا سالاسىندا قولدانىلاتىن ءاربىر جاڭا تەحنولوگيا – ەڭ الدىمەن ادامداردىڭ يگىلىگى ءۇشىن پايدالانىلادى. مۇنداي قادام, جولداۋدا ايتىلعانداي, مەديتسينادا اۋرۋلاردى دياگنوستيكالاۋ مەن ەمدەۋدىڭ تيىمدىلىگىن ايتارلىقتاي ارتتىرادى. مىسالى, تراۆماتولوگيا جانە ورتوپەديا عىلىمي-زەرتتەۋ ينستيتۋتىنداعى ەندوپروتەزدەۋ, كەۋدە قۋىسىنىڭ بۇزىلىستارى مەن سكوليوزدار حيرۋرگياسى, ۆەرتەبروپلاستيكا سالاسىنداعى زاماناۋي ەمدەۋ تاسىلدەرى مەن قۇرىلعىلاردىڭ ءبارى پاتسيەنتتەرگە جوعارى ساپالى قىزمەت كورسەتۋگە ىقپال ەتپەك. كادرلارىمىزدىڭ بىلىكتىلىگىن ارتتىرۋدى دا نازاردان تىس قالدىرماي, ماماندارىمىز يزرايل, گەرمانيا, شۆەيتساريا, اقش, اۋستريا, پولشا, بەلگيا جانە رەسەيدىڭ الدىڭعى قاتارلى ورتالىقتارىندا تۇراقتى تۇردە وقۋ كۋرستارىنان ءوتىپ كەلەدى. قازىرگى تاڭدا عالىمدارىمىز جامباس بۋىنىن اۋىستىرۋعا ارنالعان جاڭا ەندوپروتەزدى ازىرلەۋمەن اينالىسۋدا. بۇل قۇرىلعى جاستاۋ ازاماتتارعا ارنالعان. وعان ۇلتتىق پاتەنت الۋ ءۇشىن ءوتىنىش بەرىلدى. ودان كەيىن ەۋرازيالىق پاتەنتتى يەلەنۋگە كۇش سالاتىن بولامىز.
پرەزيدەنتتىڭ جولداۋىندا حالىق مەملەكەت تاراپىنان كەپىلدىك بەرىلمەگەن قىزمەتتەردى مىندەتتى الەۋمەتتىك مەديتسينالىق ساقتاندىرۋ جۇيەسىنىڭ قاتىسۋشىسى رەتىندە نەمەسە ەرىكتى مەديتسينالىق ساقتاندىرۋ, سونداي-اق بىرلەسە تولەۋ ارقىلى الا الاتىنىن اتاپ ءوتتى. بۇل – وتە ماڭىزدى ماسەلە. مىسالى, تىرەك-قيمىل جۇيەسىنە زاقىم كەلگەن سىرقات كەزەگىن كۇتكىسى كەلمەسە, وندا وزىنە قاجەتتى پروتەزدى مەردىگەر-فيرمادان الىپ, جوعارى تەحنولوگيالىق مەديتسينالىق كومەكتى الا بەرۋىنە بولادى. ال ونىڭ ستاتسيوناردا جاتۋ اقىسىن, پروتەزدى قويۋ جانە ەمدەۋدى مەملەكەت تولىق ءوز موينىنا الادى. ال ەندوپروتەزدى الۋعا جاعدايى كەلمەيتىندەر كەزەگىن اياعىنا دەيىن كۇتۋگە تۋرا كەلەدى. ەسەسىنە, پروتەزدىڭ, باسقا دا قاجەتتى كونسترۋكتسيالاردىڭ اقىسى مەملەكەت ەسەبىنەن تولەنەدى. بۇل دا سىرقاتتارعا كورسەتىلىپ جاتقان ۇلكەن قولداۋ. وسى تۇرعىدان العاندا, مەن ەلباسى اتاپ وتكەن مىندەتتى مەديتسينالىق ساقتاندىرۋ جۇيەسىن ەنگىزۋدى قولدايمىن.
نۇرلان باتپەنوۆ, مەملەكەتتىك سىيلىقتىڭ لاۋرەاتى, «تراۆماتولوگيا جانە ورتوپەديا عىلىمي-زەرتتەۋ ينستيتۋتى» رمك ديرەكتورى
استانا