قوعامنىڭ باستى بايلىعى ادام ءومىرىن ساقتاۋ ماڭىزدى ماسەلەلەر قاتارىندا ەكەندىگى انىق. ومىردە كەزدەيسوق وقيعالار كەزدەسىپ, ءومىردىڭ قىل ۇستىندە قالاتىن كەزى دە بولادى. سول ساتتە دونور قانى ادام ءومىرىنىڭ نارىنە اينالاتىنى اقيقات شىندىق. وسى ىزگى ماقساتتى كوزدەگەن قازاقستان كوممۋنيستىك حالىقتىق پارتياسىنىڭ ۇيىمداستىرۋىمەن تالدىقورعان قالاسىندا ماڭىزدى شارا ءوتتى.
وبلىستىق قان ورتالىعىنداعى «دونور - 2011» اكتسياسىنا اتالعان پارتيا مۇشەلەرى قاتىسىپ, تەگىن قان تاپسىرۋ ارقىلى حالىقپەن بايلانىستارىن جاقىنداتا ءتۇستى. نەگىزىنەن قان بەرۋشىلەردىڭ باسىم بولىگىن زارداپ شەككەندەردىڭ تۋعان-تۋىستارى عانا قۇرايدى ەكەن. ويتكەنى, ەرىكتى دونورلار سانى جىلدان-جىلعا كەمىپ بارادى. «سوڭعى بەس جىلدا قان ورتالىعىنا ايىنا ورتا ەسەپپەن 400-500 ادام كەلسە, بۇرىن ولاردىڭ سانى 700-دەن اسىپ جىعىلاتىن», دەيدى ورتالىق دارىگەرلەرى. دەمەك, وسىنداي اكتسيالاردىڭ قانعا ءزارۋ ادامدار ءۇشىن ماڭىزى زور. قازاقستان كوممۋنيستىك حالىقتىق پارتياسى يگىلىكتى شارا وتكىزۋ ارقىلى وزگەلەرگە ۇلگى بولعانىن ايتقان ءجون.
پارتيانىڭ وبلىستاعى فيليالىنىڭ حاتشىسى روزا ابدراحمانوۆا قانعا ءزارۋ, دەنساۋلىعى سىر بەرگەن ادامدارعا كومەككە كەلۋگە جاساعان ۇمتىلىستارىنىڭ ناتيجەسى وسىلاي جالعاسقانىن ايتادى. سونىمەن قاتار, جاس ۇرپاقتى ىزگىلىك پەن ادامگەرشىلىككە, وزگەگە قامقور قولىن سوزۋعا باۋلۋ. شارانى بيىل العاش رەت قولعا الساق, جىل سايىن وتكىزۋدى ويلاستىرۋدامىز, دەيدى ول.
جالپى, قان وتكىزۋ ءاربىر ازاماتتىڭ ازاماتتىق بورىشى بولۋى ءتيىس. ءوزىم ءتورتىنشى مارتە قان وتكىزىپ وتىرمىن. مۇنىڭ قورقىپ, ۇرەيلەنەتىن جاعىمسىز جاعى جوق. ادام ءۇشىن قاننىڭ جاڭارعانى پايدالى ەكەنى ايتىلادى مەديتسينادا. مۇنداي ءىس-شارالاردى وتكىزۋدەن تىس قالمايمىز, دەيدى جاس پارتيا مۇشەسى دانيار تاريحوۆ.
كۇمىسجان بايجان,
الماتى وبلىسى.