وليمپيادا – ەل مەرەيى
بۇكىل دۇنيە ءجۇزى سپورتتىق شارالار جونىنەن وليمپيادالىق ويىندار دەگەندە بەيتاراپ قالماسى انىق. سوڭعى وتكىزىلگەن بەيجىڭدەگى ءححىح جازعى وليمپيادالىق ويىندار ءالى كۇنگە كوزى قاراقتى سپورتسۇيەر قاۋىمنىڭ كوڭىلىنەن وشە قويعان جوق. بارلىعىمىز دا ونىڭ قۋانىشى مەن كۇيىنىشى جونىندە اركەز ويعا الامىز. ويتكەنى الدا لوندوندا وتەتىن جازعى ويىنداردىڭ ححح وليمپياداسى توبە كورسەتىپ تۇر.
ارينە, وتكەننەن ساباق الماي, الدىعا قاراي قادام باسا الماسىمىز انىق. سوندىقتان, الەمنىڭ ءتورت تاراپىنان, ياعني 200-دەن استام ەلدەن 11 مىڭعا جۋىق سپورتشى قاتىسقان بەيجىڭ وليمپياداسىنىڭ ءدۇبىرىن قايتا اقتارىپ كورسەك. بەيجىڭگە ءبىزدىڭ ەلدەن سپورتتىڭ 22 تۇرىنەن 132 سپورتشى ات قوستى. جىل باسىنان وليمپياداعا كىمدەر بارادى, كىمنىڭ كۇشى, كىمنىڭ مىسى مىقتى دەپ سالماقتاپ ءجۇرىپ اپارعان 132 سپورتشىنىڭ 13-ءى عانا ءۇمىتتى اقتادى. بارعا قاناعات ەتىپ قالعان حالقىمىز «بۇعان دا شۇكىر» دەسەك, باق وكىلدەرى «ەلىمىزدىڭ ەڭسەسىن كوتەرگەن ەرلەرىمىز جارادى!» دەپ جارىسا جازدى. ارينە, قاناعاتشىلدىققا نە جەتسىن. بىراق, «اتتەگەن-ايلاردى» جاسىرا بەرسەك, بۇدان ءارى جاعدايىمىز جاقسارىپ كەتپەيتىنى دە شىندىق.
باسقاسىن بىلاي قويعاندا بەيجىڭ تورىندە ءبىزدىڭ سپورتشىلارىمىزدىڭ ىشىنەن بوكسشىلارىمىز بەن بالۋاندارىمىزعا جانە اۋىر اتلەتتەرگە زور سەنىم جۇكتەلگەن. ويتكەنى وسى سپورت تۇرلەرىنەن ولار بۇدان بۇرىنعى وليمپيادالاردا قانجىعامىزدى مايلاپ, ابىرويىمىزدى اسقاقتاتىپ ەدى. سولاردىڭ ارقاسىندا جالپى كوماندالىق ەسەپتە اتلانتادا 24-ءشى, سيدنەيدە 22-ءشى ورىنعا تابان تىرەگەن بولاتىنبىز. ال بۇل جولى جالپى كوماندالىق ەسەپ بويىنشا 29-شى ورىندى قاناعات ەتتىك. بۇدان بۇرىنعى وتكەن وليمپيادا قورىتىندىلارىمەن سالىستىرار بولساق, مىناداي ناتيجەنى كورگەن بولار ەدىك:
اتلانتادا (1996 جىل): 3 التىن, 4 كۇمىس, 4 قولا (بارلىعى 11 مەدال);
سيدنەيدە (2000 جىل): 3 التىن, 4 كۇمىس (بارلىعى 7 مەدال);
افينىدا (2004 جىل): 1 التىن, 4 كۇمىس, 3 قولا (بارلىعى 8 مەدال);
بەيجىڭدە (2008 جىل): 2 التىن, 4 كۇمىس, 7 قولا (بارلىعى 13 مەدال).
بىلاي قاراعاندا ناتيجە جامان ەمەس. ءار وليمپيادا سايىن جەتىلىپ, ءوسىپ كەلە جاتقانىمىز بايقالادى, بىراق دامۋىمىز قارقىندى ەمەس. اسىرەسە, «ءبىز بىلعارى قولعاپ سپورتىنان كۋبادان كەيىن ەكىنشى ورىندامىز», دەپ بورىكتەرىن اسپانعا لاقتىرعان بوكسشىلارىمىز ءۇمىتتى اقتامادى. ولاردى كۋبا مەن رەسەيدى بىلاي قويعاندا, ۋكراين بوكسشىلارى دا شاڭ قاپتىرىپ كەتكەن جوق پا؟ ەگەر, وزبەك اعايىندار الا قويدى بولە قىرقىپ, باقىت سارسەكباەۆتى «سەن قازاقسىڭ» دەگەندەي, كەۋدەدەن يتەرىپ, ليتسەنزيادان قاعىپ, ءوز ۇلتىنىڭ وكىلىن اپارماعاندا, ءبىزدىڭ قورجىنىمىز بوكستان بوس قايتار ما ەدى, قايتەر ەدى. رينگكە شىققان العاشقى كۇننەن-اق سابىرلى دا سالقىنقاندى كەيپىنەن تانباعان باقىت بارلىق قارسىلاسىن ايقىن باسىمدىلىقپەن جەڭىپ, قازاقى نامىسىنىڭ ارقاسىندا وزبەك بوكسىن «نوكاۋتقا» تۇسىرگەندەي بولدى. ەگەر, ول رينگكە وزبەكستان قۇراماسى قاتارىنان شىققاندا ءدال وسىنداي جەتىستىككە جەتەر مە ەدى, جەتپەس پە ەدى؟
قورجىنىمىزعا ەكى التىن سالعان ەكى سپورتشىمىز – يليا يلين مەن باقىت سارسەكباەۆتىڭ جانارلارىنان وت ۇشقىنداپ, جاستىق جىگەرلەرى مەن نامىسى قاتار ءورىلىپ تۇرعانىن تەلەديدارعا تەلمىرگەن قالىڭ قازاق بايقاماي قالعان جوق. ولار وزدەرىنە سەنىمدى ەدى. 20 جاسقا ەندى عانا اياق باسقان يليا «مەن ءبىرىنشى ورىن الامىن» دەپ, ەكرانعا قايتا-قايتا نىعارلاي ايتقانى, وسى سەرتىندە تۇرىپ, زىلتەمىردى سەرپە كوتەرگەندە, قازاقستاندىقتاردىڭ ءبارى ورىندارىنان ءبىر كوتەرىلىپ تۇرعانى انىق ەدى. «بىردە-ءبىر التىنسىز قالار ما ەكەنبىز» دەپ كوڭىلى كۇپتى بولىپ كۇتكەن حالىقتىڭ ءۇمىتىن اقتاعان يليا ءيليندى ەرەكشە اتاۋ كەرەك. ال باقىتتىڭ جايى بەلگىلى. وزبەكتەردىڭ قياناتىنا شىداماعان نامىسقوي قازاق قانىندا ويناعان نامىسىنىڭ ارقاسىندا التىندى اتا-باباسىنىڭ اتامەكەنىندە قالدىردى. بايراقتى باسەكەدە باق پەن باپ, نامىس جەتەلەيتىنىن دالەلدەدى ولار. ال ءبىزدىڭ جىگىتتەردى بۇدان بۇرىن العان جۇلدەلەرىنىڭ بۋى قىستى ما, الدە, ءوز ەلىمىزدە ءجۇرىپ وزگەگە جالتاقتاۋدان جىگەرى جاسىپ قالعان با, ايتەۋىر, جانارلارى سولعىن, ەڭسەلەرى ەڭكىش قالپى ەلىمىزگە ورالدى. وسىعان قاراپ, ءبىزدىڭ بوكسشىلارىمىزدا توقمەيىلسۋ باسىم بولدى-اۋ دەگەن ويعا قالاسىڭ.
جوعارىدا جازعانداي, ءبىز ءۇمىت كۇتكەن بوكسشىلاردىڭ جەڭىسكە جەتپەۋىنە قازىلاردىڭ توبىقتان قاققانى سەبەپ بولدى دەپ اقتالىپ-اق جاتىرمىز. بىراق, اۋەلگىدە قىتاي بوكسشىسىنان ۇتىلىپ, شيرەك فينالعا شىعا الماعان مەرەي اقشالوۆتىڭ كەبىن كيمەۋ ءۇشىن قالعان بوكسشىلارىمىز بەلدى بەكەم بۋ كەرەك ەدى. سىنىققا سىلتاۋ تابىلعانداي بار مۇمكىندىكتەرىن پايدالانۋدىڭ ورنىنا, «تورەشىلەردىڭ بۇيرەگى قىتايعا بۇرىپ كەتتى» دەپ دارمەنسىزدىك تانىتۋ قازاق جىگىتتەرىنە جاراسپايتىن-اق قىلىق. ەلىمىزدەن اتتاناردا تەرىلەرىنە سىيماي, جەڭىسسىز قايتپايمىز دەگەن جىگىتتەر, جەرەبە تارتىلعان كۇنى «جەرەبە بىزگە ءساتسىز شىقتى» دەپ قارسىلاستارىنىڭ قارىمىن كورمەي جاتىپ, اتىن ەستىگەنىنەن-اق شوشىعانى كوڭىلگە كۇدىك ۇيالاتىپ ەدى. سوندا ولاردىڭ «ءبىزدى ءبىر جەڭسە, كۋبالىقتار عانا جەڭەدى» دەپ جەلپىنىپ جۇرگەندەرى بەكەر بولعانى دا؟! ويتكەنى, قىتاي بوكسشىلارى وسى ۋاقىتقا دەيىن بىردە-ءبىر وليپيادادا توپ جارىپ العا شىقپاپتى. سوندىقتان, بىلعارى قولعاپ شەبەرلەرىنىڭ بۇل اقتالۋلارى ءجونسىز, ارينە.
ءبىر قۋانارلىعى, وليمپيادا ويىندارىندا العاش رەت دزيۋدودان جۇلدەگەر اتاندىق. 100 كەلىگە دەيىنگى سالماقتا اسحات جىتكەەۆ كۇمىستەن القا تاقتى. ەركىن كۇرەس پەن گرەك-ريم كۇرەسى شەبەرلەرىنىڭ ونەرىمەن جەتكەن جەتىستىكتەرىن ايتپاي كەتۋگە بولماس. ويتكەنى ولار ءبىزدىڭ قورجىنىمىزعا تۇسكەن 13 مەدالدىڭ سانىن تولىقتىرعاندار. مىسالى, ەركىن كۇرەسشىلەرىمىز 1 كۇمىس, 1 قولا جۇلدەگە يە بولسا, گرەك-ريم كۇرەسشىلەرىمىز 2 قولا جۇلدەنى ەنشىلەدى. تاەكۆوندودا دا تۇڭعىش رەت وليمپيادا ويىندارىندا جۇلدەگە يە بولدىق. 80 كيلودان جوعارى سالماق دارەجەسىندە نامىستى قولدان بەرمەگەن, ءبىر جاعىنان بابىنان گورى باعى باسىم بولعان ارمان شىلمانوۆ قولا مەدالعا يە بولدى.
وليپياداعا تۇڭعىش رەت قاتىسقان قول دوبى مەن ۆولەيبول سياقتى سپورتتىق ويىنداردا ويسىراي جەڭىلگەن قىزدار كومانداسى قىتايعا بارىپ قايتقاندارىن عانا ماقتانىش ەتتى. ءويتكەنى, وسى سالاداعى سپورتشىلارىمىز الەمدىك دەڭگەيدە ونەر كورسەتۋگە جەتە قويعان جوق ەدى. سونداي-اق, بۇل وليمپيادا قازاق بالاسىنا ءۇشىن كۇرەس پەن بوكستان دا باسقا سپورت تۇرلەرى بار ەكەندىگىن, ماسەلەن, ستەندتىك اتۋ, قازىرگى بەسسايىس, سينحروندى ءجۇزۋ, ساداقپەن اتۋ, ۆەلوسپورت, اكادەميالىق ەسۋ, ۇستەل تەننيسى, بايداركا جانە كانوە ەسۋ دەگەن سياقتى سپورت تۇرلەرىنە كوڭىل ءبولۋ كەرەك ەكەنىن ەسكە سالعانداي بولدى.
ازيادا ارماندارعا جول اشتى
«جاسامپازدىقتىڭ جيىرما جىلى» دەپ اتالعان اعىمداعى جىلدىڭ بەتاشارى دا الەم نازارىن قازاق ەلىنە اۋدارتقان ساياسي ماڭىزدى شارالارمەن قاتار الەمدىك سپورتتىق ءىس-شارالارمەن باستالعان بولاتىن.
الەمدىك سپورتتا قىسقى وليمپيادا ويىندارىنىڭ ءوتۋى ماڭىزدى وقيعالاردىڭ ءبىرى بولىپ سانالادى. 1956 جىلى يتاليانىڭ كورتينا د امپەتستسو قالاسىندا وتكەن VII قىسقى وليمپيادا ويىندارىنا قازاقستان العاش رەت قاتىستى. جالپى قىسقى وليمپيادا ويىندارىنا 206 قازاقستاندىق سپورتشى قاتىسقان. ونىڭ ىشىندە 5 سپورتشى وليمپيادا جەڭىمپازى اتاندى. 2010 جىلى قازاقستاندىق سپورتشىلار ۆانكۋۆەردە وتكەن وليمپيادا ويىندارىنىڭ 9 تۇرىنە قاتىسۋ ءۇشىن 40 ليتسەنزيا جەڭىپ الدى. قازاقستاندىق سپورتشىلاردىڭ ۆانكۋۆەر-2010 قىسقى وليمپياداسىنا قاتىسۋى ەلىمىزدەگى قىسقى سپورت تۇرلەرىنىڭ دامۋىنا سەپتىگىن تيگىزدى.
سپورت الەمىندەگى ۇزدىكسىز العا جىلجۋ مەن بيىك سپورتتىق باعىندىرۋلار ناتيجەسى قىسقى ازيا ويىندارىنىڭ تەك قانا سپورتتىق ماعىناداعى عانا ەمەس, جوعارى ءدارەجەدەگى قوعامدىق-ساياسي ءارى مادەني وقيعا رەتىندە قابىلداناتىن دەڭگەيگە كوتەرىپ وتىر. وعان ءبارىمىز دە بيىلعى جىلى الماتى مەن استانا قالالارىندا وتكىزىلگەن شارالار بارىسىندا ءتانتى بولدىق. بيىلعى جىلى الەمنىڭ 27 ەلدەن كەلگەن كىلەڭ «سەن تۇر مەن اتايىن» دەيتىن ساڭلاق سپورتشىلاردىڭ الدىندا ابىرويدان ايرىلماۋ ەڭ باستىسى دەسەك تە, وسى ويىنداردى ۇيىمداستىرۋعا بار كۇشى مەن قايراتىن جۇمساعان قازاق ەلىنىڭ مارتەبەسىن ءوسىرۋ دە باستى ماقسات بولدى. بۇل ەكى جاعدايدان دا قازاقتىڭ مۇرتى قيسايماي وتكەنى بارشاڭىزعا ءمالىم.
بۇل دوداعا ءوز ەلىمىزدەن 164 سپورتشى قاتىستى. سپورتتىڭ 11 تۇرىنەن: شاڭعىمەن تۇعىردان سەكىرۋ, شورت-ترەك, تاۋ شاڭعىسى, شاڭعىمەن باعدارلاۋ, كونكي تەبۋ, بياتلون, مانەرلەپ سىرعاناۋ, دوپتى جانە شايبالى حوككەي سياقتى ءبىرىن بىلسەك, ءبىرىن بىلمەيتىن سپورت تۇرلەرىنەن ون كۇن بويى سايىس ءوتتى.
حوككەيدەن, اسىرەسە, قىزدار ويىنى تارتىستى ءوتتى. قازاقستان كومانداسى ءاپ دەگەننەن-اق, وزدەرىنىڭ شەبەر قيمىلدارىمەن, قارسىلاستارىنان قارىمتا قايتارا الارلىقتاي قاۋقارى بار ەكەندىكتەرىن تانىتتى. قورجىنىمىزعا العاشقى التىندى سالعان دا سولار بولدى.
قازاق سپورتى تاريحىندا بۇرىن-سوڭدى بولماعان الامانعا ءتۇسۋ كىم-كىمگە دە سىن. الماتى قالاسىنىڭ «تاباعان» سپورت كەشەنىندە وتكەن فريستايل سپورت سايىسىندا قازاقتىڭ قارا كوز قىز-جىگىتى نامىستى قولدان بەرمەۋگە تىرىستى. سپورتتىڭ بۇل ءتۇرىنەن تاجىريبەمىز از دەسەك تە, وڭتۇستىك قازاقستان وبلىسىنىڭ قوس بىردەي فريستايلشىسى جىبەك اراپباەۆا مەن رۋسلان ءابىلياتيپوۆتىڭ ءبىرى قولا, ەندى ءبىرى كۇمىس جۇلدەنى قورجىنعا سالدى.
شاڭعىمەن باعدارلاۋ, بياتلون, تاۋ شاڭعىسى جارىستارىندا دەمالىسسىز قاتىسقان سپورتشىلار قانشا شارشاسا دا شاشاسىنا شاڭ جۇقتىرماي, قارسىلاستارىن قار قاپتىرىپ كەتتى.
راس, ءوز ەلىندە كىم دە بولسا «ارىق سويلەپ, سەمىز شىعاتىنى» اقيقات. دەسەك تە, تىكەلەي ەفير ارقىلى بەرىلىپ جاتقان سايىستارعا جانكۇيەرلىك ەتكەن كۇللى كورەرمەننىڭ ءجىتى كوزىن الداۋ مۇمكىن ەمەس. ءبىزدىڭ سپورتشىلار شىنىندا دا ەرلەدى. ءسويتىپ, وڭتۇستىك كورەيا قۇراماسى 13 التىن, 12 كۇمىس, 13 قولا مەدالمەن ءۇشىنشى ورىندى, جاپونيا 13 التىن, 24 كۇمىس, 17 قولا مەدالمەن ەكىنشى ورىننان كورىندى. ال قازاقستان قۇراماسى ءوز قورجىنىنا 32 التىن, 21 كۇمىس, 17 قولا سالىپ, جەڭىستىڭ بيىك شىڭىنان ورىن تەپتى. وسىلايشا, ءVىى قىسقى ازيا ويىندارىندا قازاق ەلىنىڭ ءانۇرانى 32 رەت شىرقالىپ, 32 مارتە كوك بايراعىمىز كوكتە جەلبىرەدى.
تاۋەلسىزدىك مەرەكەسىنە جاڭا سپورتتىق قاداممەن
بيىلعى جىلعى 20 تامىزدا استانا قالاسىنىڭ «ءداۋلەت» سپورت كەشەنىندە تاۋەلسىزدىكتىڭ 20 جىلدىعى اياسىندا قازاقستان رەسپۋبليكاسى پرەزيدەنتىنىڭ جۇلدەسى ءۇشىن قازاق كۇرەسىنەن «قازاقستان بارىسى» اتتى رەسپۋبليكالىق جارىس وتكىزىلدى. بيىل تۇڭعىش رەت وتكىزىلگەن ايتۋلى جارىستا 14 وبلىس, استانا, الماتى قالالارىنان ۇزدىك دەپ تانىلعان 64 بالۋان بەلدەستى. ابسوليۋتتىك سالماق دارەجەسىندە كۇرەسكەن بالۋاندار اراسىندا «قازاقستان بارىسى» اتاعى مەن 150 مىڭ اقش دوللارى ساراپقا سالىندى. جارىس قورىتىندىسى بويىنشا ءى ورىندى, «قازاقستان بارىسى» اتاعىن جانە 150 مىڭ اقش دوللارىن ۇلان رىسقۇل (قىزىلوردا وبلىسى) جەڭىپ السا, «كۇمىس بەلبەۋ» مەن 30 مىڭ اقش دوللارى ءىى ورىندى يەلەنگەن بەيبىت ىستىباەۆقا (جامبىل وبلىسى) تابىس ەتىلدى, ءىىى ورىندى – «قولا بەلبەۋ» مەن 10 مىڭ اقش دوللارىن شالقار جولامانوۆ (شىعىس قازاقستان وبلىسى) جەڭىپ الدى. سونىمەن قاتار, جۇلدەگەر سپورتشىلاردى دايىنداعان جاتتىقتىرۋشىلارعا تيىسىنشە 50 مىڭ, 10 مىڭ جانە 5 مىڭ اقش دوللارى تاپسىرىلدى.
سونداي-اق, اعىمداعى جىلدىڭ تامىز ايىنىڭ 19-20 كۇندەرى استانا قالاسىنىڭ بەيبىتشىلىك پەن كەلىسىم سارايىندا «تاۋەلسىزدىكتىڭ 20 جىلدىعى اياسىندا سپورت كۇنى – كاسىبي مەرەكەسىنە ورايلاستىرىپ, قوعامنىڭ, مەملەكەتتىڭ جانە بيزنەستىڭ قاتىسۋىمەن ءى سپورتتىق فورۋم وتكىزىلدى.
سونىمەن بىرگە, اۋىل سپورتىن دامىتۋعا باعىتتالعان «ەل قايراتى» رەسپۋبليكالىق اۋىلدىق دەنە شىنىقتىرۋ-سپورت قوعامى» قوعامدىق بىرلەستىگىنىڭ تۇساۋكەسەر جينالىسى ءوتتى.
مەملەكەت تاراپىنان بيىلعى مەرەكەلىك جىلدا وتكىزىلەتىن شارالار لەگى ءبىر بۇل ەمەس. ولاردىڭ ىشىنەن اۋىز تولتىرىپ ايتار جاڭالىعى «تاۋەلسىزدىك جىلدارى قازاقستان سپورتىنا ۇلەس قوسقان ەلدىڭ اتاقتى سپورتشىلارىمەن مەملەكەت باسشىسىنىڭ كەزدەسۋىن ۇيىمداستىرۋ» جانە تاۋەلسىزدىكتىڭ 20 جىلدىعىنا ارنالعان ۇلتتىق سپورت تۇرلەرى فەستيۆالىن وتكىزۋ بولىپ وتىر.
فەستيۆالدى وتكىزۋدەگى ماقسات – قازاقستان پرەزيدەنتىنىڭ حالىققا جولداۋىندا ايقىندالعان مىندەتتەردى ورىنداۋ, ۇلتتىق سپورت تۇرلەرىن, سونىڭ ىشىندە اۋىل سپورتىن تانىتۋ جانە دامىتۋ, جاستاردى سپورتپەن شۇعىلدانۋعا تارتۋ, حالىق اراسىندا سالاماتتى ءومىر سالتىن ناسيحاتتاۋ.
فەستيۆالدى ساپالى وتكىزۋ ءۇشىن شۇعىل شتاب مۇشەلەرىنىڭ, قر ۇلتتىق سپورت تۇرلەرى قاۋىمداستىعى, سپورت تۇرلەرىنەن فەدەراتسيا باسشىلارىنىڭ, مەملەكەتتىك جاتتىقتىرۋشىلاردىڭ قاتىسۋىمەن اتالعان كەشەندى ءىس-شارانى دايىنداۋ مەن وتكىزۋ جونىندە وتىرىس 14 ماۋسىم كۇنى وسكەمەن قالاسىندا وتكىزىلدى.
فەستيۆالدىڭ رەگلامەنتىنە سايكەس وعان 14 وبلىستىڭ, استانا مەن الماتى قالالارىنىڭ ەڭ مىقتى سپورتشىلارى قاتىسادى. اقتىق جارىسقا 1700 سپورتشى قاتىسادى. فەستيۆال شىعىس قازاقستان وبلىسى اكىمدىگى, اۋىل شارۋاشىلىعى مينيسترلىگى, قازاقستان حالقى اسسامبلەياسى, «نۇر وتان» حالىقتىق-دەموكراتيالىق پارتياسى جانە رەسپۋبليكالىق ۇلتتىق سپورت تۇرلەرى قاۋىمداستىعىنىڭ قولداۋىمەن وتەدى.
ال قورىتىندى شارالار رەتىندە تاۋەلسىزدىكتىڭ 20 جىلدىعىنا ورايلاستىرىلعان سپورت كەشەندەرى مەن ورتالىقتارى اشىلۋىنىڭ سالتاناتتى راسىمدەرىن وتكىزۋ جىل سوڭىنا جوسپارلانىپ وتىر. قازاقستان رەسپۋبليكاسى تاۋەلسىزدىگىنىڭ 20 جىلدىعىن وتكىزۋ بويىنشا ءىس-شارالار جوسپارىنىڭ تارماعىن ورىنداۋ شەڭبەرىندە مينيسترلىك سالىنعان جانە سالىنىپ جاتقان سپورت كەشەندەرى مەن سپورت نىساندارى بويىنشا بەلگىلى جۇمىس جۇرگىزۋدە.
سونىمەن قاتار بيىلعى 4 جەلتوقساندا «سەرگەكتىك» ۇرانىمەن رەسپۋبليكا ايماقتارىندا حوككەي كورتتارىن, شاڭعىمەن جاپپاي سىرعاناۋ ءۇشىن شاڭعى تراسسالارى مەن مۇز ايدىندارىن اشۋ جوسپارلانىپ وتىر. تۋريزم جانە سپورت مينيسترلىگى وبلىستاردىڭ, استانا جانە الماتى قالالارىنىڭ اكىمدىكتەرىمەن بىرگە «دەنساۋلىق – زور بايلىق» ۇرانى بويىنشا سالاماتتى ءومىر سالتىن ناسيحاتتاۋ جونىندەگى سپورتتىق-بۇقارالىق ءىس-شارالار وتكىزبەك.
بەيبىتكۇل توقاباەۆا.
(ماقالا تۋريزم جانە سپورت مينيسترلىگىنىڭ تاپسىرىسى بويىنشا جازىلدى).