كەشە مەملەكەت باسشىسى نۇرسۇلتان نازارباەۆ مادەنيەت ءمينيسترى مۇحتار قۇل-مۇحاممەدتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
م.قۇل-مۇحاممەد پرەزيدەنتتى «مادەني مۇرا» باعدارلاماسىن, تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىن, قازاقستان رەسپۋبليكاسى ءتاۋەلسىزدىگىنىڭ 20 جىلدىعىن مەرەكەلەۋدى وتكىزۋ ءجونىندەگى مەملەكەتتىك كوميسسيانىڭ جالپىۇلتتىق جوسپارىن, وبلىستاردىڭ ءمادەنيەت كۇندەرىن جانە مينيسترلىك قىزمەتىنىڭ وزگە دە باسىم باعىتتارىن ىسكە اسىرۋ بارىسىنان حاباردار ەتتى.
مەملەكەت باسشىسى مينيسترلىك ۇلكەن جۇمىستار جاساپ جاتقانىنا توقتالدى. سونىمەن بىرگە, پرەزيدەنت شىعارماشىلىق وداقتارمەن, زيالى قاۋىم وكىلدەرىمەن تىعىز جۇمىس جۇرگىزۋ قاجەتتىگىن, ولاردىڭ ەلىمىزدە اتقارىلىپ جاتقان شارۋالاردان سىرت قالماۋى ءتيىستىگىن اتاپ ءوتتى. نۇرسۇلتان نازارباەۆ ۇلتتىق كينونىڭ ءمىندەتتەرىنىڭ ءبىرى – حالىقتىڭ سالتى مەن قازىرگى زامانعى قازاقستاندىقتاردىڭ ادامي قاسيەتىن اشىپ كورسەتەتىن, قازاقستاننىڭ بۇگىنگى كۇردەلى تاريحي جولى, حالىقتىڭ بىرلىگى تۋرالى فيلمدەردى ءتۇسىرۋ ەكەنىنە ەرەكشە توقتالدى.
پرەزيدەنت مينيسترلىككە تاريحي جانە مادەني مۇرالاردى ساقتاۋ, ەل تاۋەلسىزدىگىنىڭ ەلەۋلى جەتىستىكتەرىن اشىپ كورسەتۋ سياقتى اۋقىمدى ماسەلەلەر بويىنشا زيالى قاۋىممەن جانە شىعارماشىلىق وداقتارىمەن جۇمىستى جانداندىرۋدى تاپسىردى.