پارلامەنت سەناتىنىڭ دەپۋتاتى رىسقالي ابدىكەروۆ قاراعاندىدا ازاماتتاردى قابىلدادى. سەناتورمەن كەزدەسۋگە ءارتۇرلى الەۋمەتتىك ماسەلەلەر تولعاندىرعان وبلىس ورتالىعىنىڭ تۇرعىندارى كەلدى, دەپ حابارلادى سەناتتىڭ ءباسپاسوز قىزمەتى.
قاراعاندى قالاسىنىڭ تۇرعىنى ت. شۋتوۆانى تولىق ەمەس وتباسىلارىندا ءوسىپ كەلە جاتقان كامەلەتكە تولماعان بالالاردىڭ ماتەريالدىق جاعدايى مازالايدى. ول بالالاردىڭ كوپشىلىگى بەلگىلەنگەن اليمەنتكە قول جەتكىزە الماي وتىر. سوندىقتان ونداي بالالاردى قولداۋ ءۇشىن ارنايى قور اشۋ ۇسىنىلدى. قاراعاندى قالاسىنىڭ ەكىنشى تۇرعىنى و. گارنيتسكي قالانىڭ كەيبىر اۋداندارى ورتالىق جىلۋ قۇبىرىمەن قامتاماسىز ەتىلمەگەنىن, ىستىق سۋ مەن گاز دا جوق ەكەنىن ايتىپ, وسى ماسەلەلەردىڭ شەشىمىن تابۋعا كومەك سۇرادى.
«قورعاۋ» ارداگەرلەر كەڭەسىنىڭ مۇشەسى ۆ. چايكا قالا مەن وبلىستى دامىتۋداعى اعا بۋىن وكىلدەرىنىڭ ءرولى تۋرالى ايتا كەلىپ, ولاردىڭ جاستار تاربيەسىنە اتسالىسۋى كەرەكتىگى تۋرالى ءوز ويىن ورتاعا سالدى. ول سونىمەن بىرگە ارداگەرلەر اتىنان دەپۋتاتاتتاردى «ارداگەرلەر تۋرالى» زاڭدى قابىلداۋعا شاقىردى.
جالپى العاندا, دەپۋتاتقا 11 ازامات قابىلداۋعا كەلىپ, ەكى شاعىم بويىنشا قابىلداۋ كەزىندە وڭ شەشىم قابىلداندى. قابىلدانعان 5 شاعىم ءتيىستى مەكەمەلەرگە جىبەرىلدى. سونداي-اق 4 ازاماتتى تولعاندىرعان ماسەلەلەر بويىنشا ءتيىستى ءتۇسىندىرۋ جۇمىستارى جۇزەگە اسىرىلدى. ايتىلعان بارلىق شاعىمداردىڭ شەشىمىن تابۋىن سەناتور ر. ابدىكەروۆ نازاردا ۇستايتىن بولدى.