جالپى, ءبىز ءبىلىم جانە عىلىم مينيسترلىگىنىڭ ءبىلىم سالاسىنا ەنگىزىپ جاتقان جاڭالىقتارىن, سونىڭ ىشىندە, جاڭارتىلعان باعدارلاما ماسەلەلەرىن قۇپتايمىز. جاڭارتىلعان باعدارلاما – جاس جەتكىنشەكتەردىڭ دامۋىنا, وقۋشىنىڭ وي-ءورىسىنىڭ وسۋىنە, ونىڭ فۋنكتسيونالدىق ساۋاتتىلىعىن ارتتىرۋعا داڭعىل جول اشىپ وتىر.
وعان قوسا, وقۋلىقتار مەن وقۋ-ادىستەمەلىك كەشەندەردىڭ قوعامدىق پىكىردى, اتا-انالاردىڭ تالاپتارى مەن ەل زيالىلارىنىڭ كوزقاراستارىن ەسكەرە وتىرىپ, جىل سايىن قايتا شىعارىلۋىن دا قۇپتارلىق ءىس دەپ سانايمىز.
ايتكەنمەن, جاڭارتىلعان باعدارلاما جوبا رەتىندە مەكتەپتەرگە جول تارتقاندا, ول مۇعالىمگە ۇلكەن جۇك بولىپ جەتىپ وتىر. جالپى, مەكتەپتەرگە جوبا ەمەس, ونىڭ جان-جاقتى ويلاستىرىلعان نۇسقاسى كەلۋى كەرەك ەدى.
بۇرناعى جىلى كەي ماسەلەلەر ءالى تۇسىنىكسىز بولدى, ءبىرى ورىندالىپ, ءبىرى ىسكە اسپاي جاتتى. ال ۇستازدار تاپ بىلتىرعىداي قينالا قويماعان ەدى. وتكەن جىلى ماسەلەگە جان-جاقتى قاراپ, بارلىق جۇمىستى قولعا العان كەزدە جاعداي كۇردەلەنىپ كەتتى. رەسپۋبليكا بويىنشا توپ قۇرىپ, ءبىر-بىرىمىزبەن بايلانىسقا شىققالى تاجىريبەلى مۇعالىم ءۇشىن دە, جاس مامان ءۇشىن دە ۇيقىسىز تۇندەر مەن شاراسىز ارەكەتتەر جۇيكەگە كۇش بولىپ ءتۇستى. كۇندى تۇنگە ايىرباستاعان كەي ارىپتەستەرىمىز تۇنگى ەكى-ۇشتە حابارلاسىپ جاتادى.
ءبىز ءۇشىن بۇگىندە نە قيىن؟ بىرىنشىدەن, ءار ءىس-ارەكەتىمىزگە ەسەپ بەرۋ, ءار وتكىزگەن جۇمىسىمىزعا ساراپتاما جانە مودەراتسيا جاساۋ; ەكىنشىدەن, قاپتاعان قاعازداردى شىعارۋ. سوندىقتان سالالىق مينيسترلىكتەن مىنا ماسەلەلەردى جەڭىلدەتۋ شارالارىن قاراستىرۋدى سۇرار ەدىك. ءبىزدىڭ تامىز ايىندا ۇزاق مەرزىمدى جوسپار جاساۋعا, بيىلعى وقۋ جىلىنا ارنالعان ۇلگىلىك وقۋ جوسپارى مەن جاڭا وقۋ جىلىنا نۇسقاۋلىقتى شىعارىپ الۋعا شامامىز جەتەدى. ال ورتا مەرزىمدى جوسپار (وقۋ جوسپارى) تىم كوپ بولعاندىقتان, ەلەكتروندى نۇسقاسىن پايدالانۋعا, قىسقا مەرزىمدى جوسپاردىڭ ورنىنا جان-جاقتى تالدانىپ جاسالعان (اۆتورلارعا الىس!) وقۋلىققا ادىستەمەلىكتەردى قولدانۋعا رۇقسات ەتىلسە دەگەن تىلەگىمىز بار. ال بۇگىنگى وتكەن ساباققا ساراپتاما, مودەراتسيا, اتا-اناعا رۋبريكا ءتارىزدى جۇمىستار مۇلدەم الىپ تاستالسا, نۇر ۇستىنە نۇر بولار ەدى. سونداي-اق وقۋشى پورتفوليوسىنىڭ تالاپتارىن جەڭىلدەتۋ, جوعارىدان كەلىپ جاتقان تەكسەرىستەردىڭ ادىستەمەلىك كومەككە اۋىستىرىلۋى سۇرالادى. بۇعان قوسا, تەستتىك جۇمىستار ءۇشىن وقۋشىعا جانە ۇستازعا جەكە داپتەر شىعارىلعانى ءجون بولار ەدى. سىنىپتاعى 25 بالاعا ءبىر تەستتىك جۇمىس ءۇشىن (اتا-اناعا رۋبريكانى قوسقاندا ءار وقۋشىعا كەمىندە ءۇش بەت) 75 پاراق قاعاز كەرەك, ءبىر توقساندا ازى 20 تەست, ناتيجەسىندە, 1500 پاراق قاعاز (3 پاشكە) قاجەت. ءار ۇستاز كارتريدجدىڭ بوياۋىن ەسەپتەمەگەندە, ءبىر توقساندا 6-7 پاشكە قاعاز جۇمسايدى. جاس مامان ءۇشىن بۇل ۇلكەن شىعىن.
بۇدان باسقا قيىندىقتار مەن شىعىنداردى (كۇندەلىك.كز; مەكتەپتە عالامتوردىڭ ناشار ىستەۋى; جەكە كومپيۋتەردىڭ جەتىسپەۋشىلىگى; ينتەربەلسەندى تاقتالاردىڭ جوقتىعى نەمەسە تولىققاندى ىستەمەۋى; ەلەكتروندى قۇرىلعىلاردىڭ ەسكىرۋى نەمەسە ۋاقتىلى انتيۆيرۋس قوسۋعا قارجى بولىنبەۋى) ەسەپتەمەگەن كۇننىڭ وزىندە, ەگەر جوعارىداعى ايتىلعان ماسەلەلەر شەشىلسە, ءار ۇستاز «بۇگىنگى ساباقتى قالاي وتكىزسەم, قانداي رەسۋرستار ىزدەسەم» دەۋمەن وقۋشىنىڭ الدىنا جاقسى كوڭىل حوشىمەن بارار ەدى.
ۇستاز ءۇشىن ساباقتى قىزىقتى ەتىپ وتكىزۋ; جەتكىنشەكتەردى رۋحاني تۇرعىدا تاربيەلەۋ; ەرتەڭگىلىكتەر وتكىزۋ; وقۋشىلاردىڭ دامۋىنا جاعداي جاساپ, ءتۇرلى شارالارعا, مەكتەپىشىلىك جۇمىستارعا قاتىستىرۋ; داپتەرلەرى مەن كۇندەلىكتەرىن تەكسەرۋ; اتا-انالارمەن جۇمىس ىستەۋ; ءوز ءبىلىمىن كوتەرۋ; جوعارىدان كۇندەلىكتى كەلىپ جاتقان نۇسقاۋلاردى ورىنداۋ; ت.ب. ءىس-ارەكەتتەر كۇن سايىن اتقارىلاتىن جۇمىستار. الايدا, قازىرگى تاڭدا ارقاسىنا ەسەلەپ ارتىق جۇك تۇسكەن (جاس مامانداردى بىلاي قويعاندا) تاجىريبەلى مۇعالىمدەردىڭ ءوزىنىڭ جۇرەگى شايلىعىپ وتىرعان جاعداي بار.
ءبىلىم جانە عىلىم مينيسترلىگى رەسپۋبليكا بويىنشا ساباق بەرەتىن 2-سىنىپ ۇستازدارىنىڭ وسى حاتىن اياقسىز قالدىرمايدى عوي دەپ ۇمىتتەنەمىز. جامال سماعۇل, 2-سىنىپ مۇعالىمى
اقمولا وبلىسى, ءبىرجان سال اۋدانى, ساۋلە اۋىلى