جاڭا جىل قارساڭىندا وسكەمەندە «شىعىس قازاقستان وبلىسىنىڭ قۇرمەتتى ازاماتى» اتاعىن العاندار مەن وبلىستىق «جومارت جۇرەك» بايقاۋىنىڭ جەڭىمپازدارىن ماراپاتتاۋ ءراسىمى ءوتتى.
ايماق باسشىسى دانيال احمەتوۆ «شىعىس قازاقستان وبلىسىنىڭ قۇرمەتتى ازاماتى» اتاعىن سەمەي قالالىق ارداگەرلەر كەڭەسىنىڭ توراعاسى امانتاي دوعالاقوۆقا, زىريان اۋدانىنداعى «سرەديگورنەنسكي» جشس-ءنىڭ ديرەكتورى پەتر دياگلەۆكە, ەكولوگيالىق قاۋىپسىزدىك ورتالىعىنىڭ مامانى يۋري كۋدينوۆكە جانە مەديتسينا عىلىمدارىنىڭ دوكتورى, پروفەسسور تولەباي راحىپبەكوۆكە سالتاناتتى تۇردە تابىس ەتتى.
ال «جومارت جۇرەك» بايقاۋىنىڭ جەڭىمپازدارى «رۋحاني جاڭعىرۋ» باعدارلاماسى اياسىندا 10 اتالىم بويىنشا ماراپاتتالدى. ءۇيى ورتەنگەن وتباسىعا قارجىلاي قولداۋ كورسەتىپ, ءوز قاراجاتىنا كوپىرلەر مەن ارىقتاردى جوندەپ بەرگەن ءۇرجار اۋدانىنداعى «نەكراسوۆكا جانە ك» شارۋا قوجالىعىنىڭ باسشىسى باقىتبەك مۇساباەۆ «جۇرەكتەن-جۇرەككە», «مەكتەپكە جول» اكتسياسى شەڭبەرىندە بالالارعا 1 ميلليون 754 مىڭ تەڭگەنىڭ جاردەمىن جاساعان ريددەرلىك جەكە كاسىپكەر گالينا گيلدەرمان «جىلدىڭ قايىرىم جاساۋشىسى» اتالىمىنا يە بولدى.
2016 جىلى اۋداندىق جانە قالالىق اۋرۋحانالارعا, وبلىستىق اۋرۋحاناعا قۇرال-جابدىق الۋ ءۇشىن 311 ميلليون تەڭگە اۋدارعان, قازىرگى كەزدە رەسپۋبليكالىق گەماتولوگيالىق ورتالىقتىڭ قۇرىلىسىن قارجىلاندىرىپ جاتقان «ۆوستوكتسۆەتمەت» جشس «دەنساۋلىق ساقتاۋ سالاسىن دامىتۋعا قوسقان ۇلەسى ءۇشىن» اتالىمىمەن ماراپاتتالدى. سونىمەن قاتار پارلامەنت ءماجىلىسىنىڭ دەپۋتاتى نۇرتاي سابيليانوۆ پەن «كامىشينسكوە» شارۋا قوجالىعىنىڭ جەتەكشىسى ۆلاديمير اكۋلوۆ «تۋعان ولكەمە – مەنىڭ جوبام», «ەلحون» جشس-ءنىڭ ديرەكتورى, وبلىستىق ءماسليحات دەپۋتاتى لۇقبەك تۇماشينوۆ «مادەنيەت سالاسىن دامىتۋعا قوسقان ۇلەسى ءۇشىن», زايساندىق جەكە كاسىپكەر باقىتگۇل بايمۇحانبەتوۆا ء«بىلىم سالاسىنا قولداۋ كورسەتكەنى ءۇشىن», سەمەيلىك «تاندەم ترەيد كومپاني» جشس-ءنىڭ ديرەكتورى ارمان ءماشىموۆ «سپورتتى دامىتۋعا قوسقان ۇلەسى ءۇشىن», «باقىرشىق تاۋ-كەن يگەرۋ كاسىپورنى» جشس «جىلدىڭ الەۋمەتتىك جاۋاپتى ۇيىمى» اتالىمدارىن ەنشىلەدى.
ازامات قاسىم,
«ەگەمەن قازاقستان»
وسكەمەن