قر سىرتقى ىستەپ مينيسترىگى قازاقستان رەسپۋبليكاسى مەن چەح رەسپۋبليكاسى, سونداي-اق قازاقستان رەسپۋبليكاسى مەن سلوۆاك رەسپۋبليكاسى اراسىنداعى ديپلوماتيالىق قارىم-قاتىناستار ورناعاندىعىنىڭ 25 جىلدىعىنا جاسالعان كومميۋنيكەنى جاريالادى.
2018 جىلعى 1 قاڭتاردا قازاقستان رەسپۋبليكاسى مەن چەح رەسپۋبليكاسى اراسىنداعى ديپلوماتيالىق قارىم-قاتىناستار ورناۋىنىڭ 25 جىلدىعىن اتاپ وتەمىز.
وتكەن شيرەك عاسىر ارالىعىندا بارلىق سالالارداعى ىنتىماقتاستىق سەنىم مەن ۇزدىكسىز دامۋ دەڭگەيىندە جانە ەكىجاقتى ءوزارا ءىس-قيمىل اۋقىمىندا ءوتتى. سەنىمدى ساياسي ديالوگ ورناتىلدى, ءوزارا ساۋدا كولەمى بىرنەشە ەسە ۇلعايدى, قارىم-قاتىناستاردىڭ شارتتىق-قۇقىقتىق بازاسى كەڭەيتىلدى, مادەني-گۋمانيتارلىق جانە ءبىلىم بەرۋمەن الماسۋ ءوسىپ كەلەدى.
ەكى جاقتى قارىم-قاتىناستار دامۋىنىڭ باستى كەزەڭدەرىنە 2004 جىلى چەح رەسپۋبليكاسىنىڭ پرەزيدەنتى ۆاتسلاۆ كلاۋستىڭ قازاقستانعا, 2012 جىلى قازاقستان رەسپۋبليكاسىنىڭ پرەزيدەنتى ن.نازارباەۆتىڭ چەح رەسپۋبليكاسىنا, 2014 جىلى چەح رەسپۋبليكاسىنىڭ پرەزيدەنتى ميلوش زەماننىڭ قازاقستانعا رەسمي ساپارلارى جانە 2017 جىلى چەح كوشباسشىسى م.زەماننىڭ استاناداعى ەكسپو-2017 حالىقارالىق مامانداندىرىلعان كورمەسىنىڭ اشىلۋ سالتاناتىنا قاتىسۋ ماقساتىندا قازاقستانعا جۇمىس ساپارى كىرەدى.
ەكى ەل اراسىندا پارلامەنتارالىق دوستىق توبىنىڭ قىزمەتىنە نەگىزدەلە وتىرىپ جوعارى زاڭ شىعارۋشى ورگاندار دەڭگەيىندە بەلسەندى ىنتىماقتاستىق ورناتىلدى. چەحيا پارلامەنتى ەۋروپالىق وداق ەلدەرىنىڭ اراسىندا 2016 جىلى 15 قىركۇيەكتە قر مەن ەو اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمدى راتيفيكاتسيالاعان العاشقى ەلدەردىڭ ءبىرى.
ەنەرگەتيكا, ماشينا جاساۋ, اۋىل شارۋاشىلىعى, لوگيستيكا, ءبىلىم جانە تۋريزم كىرەتىن ەكونوميكالىق ءوزارا ءىس-قيمىلدىڭ اسا باسىم سالالارى ايقىندالعان جانە جوسپارلى يگەرىلۋدە.
وسى باعىتتاعى جۇمىستىڭ ىلگەرىلەۋىنىڭ باستى مەحانيزمى 2005 جىلى قۇرىلعان ەكونوميكالىق, ونەركاسىپتىك جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيا بولىپ تابىلادى. 2009 جىلى چەحيانىڭ قازاقستاندى ساۋدا-ەكونوميكالىق 12 باسىم ارىپتەستەرىنىڭ تىزىمىنە ەنگىزۋىنىڭ ارقاسىندا ساۋدا جانە ينۆەستيتسيا سالاسىنداعى مۇمكىندىكتەر ەداۋىر كەڭەيتىلدى.
ەكى ەل اراسىندا وزگەشە كوپىر رەتىندە قازاقستاندىق تۋريستەردىڭ چەحياعا تۇراقتى تۇردە كەلۋىن اتاپ وتۋگە بولادى. چەح رەسپۋبليكاسىنىڭ جوعارى وقۋ ورىندارى قازاقستاندىق جاستار ءۇشىن تارتىلىس ورتالىعىنا اينالدى. ءوز كەزەگىندە چەح ازاماتتارى 2017 جىلعى 1 قاڭتاردان باستاپ قازاقستانعا 30 كۇن ىشىندە ۆيزاسىز كەلىپ كەتۋگە مۇمكىندىك الدى.
قازاقستان رەسپۋبليكاسى مەن چەح رەسپۋبليكاسى بۇۇ, ەقىۇ ج2نە باسقا ۇيىمدار جەلىسى بويىنشا جاھاندىق قاۋىپسىزدىك پەن بەيبىتشىلىكتى نىعايتۋعا ءوز ۇلەسىن قوسۋعا ۇمتىلا وتىرىپ, حالىقارالىق ارەنادا سىندارلى وزارا ىس-قيمىلدى جۇزەگە اسىرادى.
قازاقستان چەح رەسپۋبليكاسىمەن ودان ءارى دوستىق پەن سەنىم قاتىناستارىن جان-جاقتى دامىتۋعا جانە نىعايتۋعا باعدارلانعان سىرتقى ساياسي باعىتىن جالعاستىرۋدى نيەت ەتىپ وتىر.
سونىمەن قاتار, 2018 جىلعى 1 قاڭتاردا قازاقستان رەسپۋبليكاسى مەن سلوۆاك رەسپۋبليكاسى ديپلوماتيالىق قارىم-قاتىناستار ورناۋىنىڭ 25 جىلدىعىن اتاپ وتەدى.
دوستىق پەن ارىپتەستىكتىڭ شيرەك عاسىرى ىشىندە ەكى ەل اراسىندا سەنىمدى ساياسي ديالوگ ورناتىلىپ, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋ ءۇشىن قولايلى جاعدايلار جاسالدى, شارت-قۇقىقتىق بازا كەڭەيتىلدى.
سلوۆاك رەسپۋبليكاسىنىڭ پرەزيدەنتى ر.شۋستەردىڭ 2001 جىلعى قاراشادا قازاقستانعا جاساعان ءبىرىنشى رەسمي ساپارى ەكىجاقتى ىنتىماقتاستىقتى كەڭەيتۋدى ماڭىزدى كەزەڭى بولدى. اتالعان ساپار بارىسىندا ەكى ەل اراسىنداعى ءوزارا قارىم-قاتىناس نەگىزدەرى تۋرالى دەكلاراتسياعا قول قويىلدى.
قازاقستان رەسپۋبليكاسىنىڭ پرەزيدەنتى ن.نازارباەۆتىڭ 2007 جىلعى قاراشادا سلوۆاكياعا جاساعان رەسمي ساپارى جانە سلوۆاك رەسپۋبليكاسىنىڭ پرەزيدەنتى ي.گاشپاروۆيچتىڭ 2010 جىلعى ناۋرىزدا قازاقستانعا جاساعان رەسمي ساپارى, سونداي-اق ونىڭ 2010 جەلتوقساندا ەقىۇ سامميتىنە قاتىسۋ ءۇشىن قازاقستانعا جاساعان جۇمىس ساپارى ىنتىماقتاستىقتى نىعايتۋعا ەلەۋلى سەرپىن بەردى.
پارلامەنتتىك ديپلوماتيا ەكىجاقتى ءوزارا ءىس-قيمىلدى نىعايتۋعا ماڭىزدى ۇلەس قوسۋدا. ەكى ەلدىڭ جوعارعى زاڭ شىعارۋشى ورگاندارىندا دوستىق پارلامەنتتىك توپتار قۇرىلعان. دەپۋتاتتار اراسىندا تۇراقتى تۇردە ساپار الماسۋلار جۇزەگە اسادى. سلوۆاكيا پارلامەنتى ەۋروپالىق وداقتىڭ ەلدەرى ىشىندە العاشقى ەلدەردىڭ ءبىرى بولىپ, قر مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى راتيفيكاتسيالادى.
ساياسي ديالوگتى ودان ءارى كۇشەيتۋگە ماڭىزدى ۇلەسىن سلوۆاك رەسپۋبليكاسىنىڭ سىرتقى جانە ەۋروپالىق ىستەر ءمينيسترى م.لايچاكتىڭ 2016 جىلعى قاراشادا قازاقستانعا جاساعان رەسمي ساپارى قوستى. سونداي-اق سىرتقى ساياسي ۆەدومستۆولار باسشىلارىنىڭ تۇراقتى كەزدەسۋى مەن سىمارالىق كونسۋلتاتسيالاردىڭ وتكىزىلۋى ەكىجاقتى ىنتىماقتاستىقتى ىلگەرىلەتۋدىڭ ءتيىمدى تەتىگى بولدى.
ساۋدا-ەكونوميكالىق سالاداعى قارىم-قاتىناستار دايەكتى جانە ۇدەمەلى تۇردە دامىپ كەلەدى. ەنەرگەتيكا, ماشينا جاساۋ, ەلەكتروتەحنيكا, اۋىل شارۋاشىلىعى, فارماتسەۆتيكا, كولىكتىك ينفراقۇرىلىمدى دامىتۋ, ءبىلىم جانە تۋريزم سالالارى ەكونوميكالىق ءوزارا ءىس-قيمىلدىڭ پەرسپەكتيۆالىق باعىتتارى بولىپ تابىلادى. ەكى ەلدىڭ ىسكەر توپتارىنىڭ جاقىنداسۋىن ىلگەرىلەتۋدە ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسياسىنىڭ ءرولى زور, بۇگىنگە ونىڭ 6 وتىرىسى ءوتتى.
قازاقستان مەن سلوۆاكيا نەگىزگى حالىقارالىق ماسەلەلەر بويىنشا ۇقساس ۇستانىمداردى قابىلدايدى جانە بۇۇ, ەقىۇ مەن باسقا حالىقارالىق ۇيىمدار اياسىندا جاھاندى قاۋىپسىزدىك پەن بەيبىتشىلىكتى نىعايتۋعا ءوز ۇلەستەرىن قوسۋ ءۇشىن حالىقارالىق ارەنادا سىندارلى ءوزارا ءىس-قيمىلدى جۇزەگە اسىرادى.
قر ازاماتتارى ءۇشىن ەو تاراپىنان ۆيزالىق ءتارتىپتى جەڭىلدەتۋ ماسەلەسى بويىنشا سلوۆاكيا رەسمي تۇردە قازاقستانعا قولداۋ كورسەتىپ وتىر. ءوز كەزەگىندە, 2017 ج. 1 قاڭتاردان باستاپ سلوۆاك ازاماتتارىنا قازاقستاندا 30 كۇن بويى ۆيزاسىز بولۋ مۇمكىندىگى بەرىلدى.
قازاقستان مەن سلوۆاكيا ەكى ەل حالىقتارىنىڭ يگىلىگى ءۇشىن الداعى ۋاقىتتا ەكىجاقتى قارىم-قاتىناستاردى جان-جاقتى نىعايتۋعا جانە دامىتۋعا باعدارلانعان سىرتقى ساياسي باعىتتى ودان ءارى جالعاستىرۋعا نيەتتى.