...يۋليا اكەسى ەۆگەني الەكساندروۆيچ گالىشەۆتان ەرتە ايىرىلدى. ول قىزىن ەرەكشە جاقسى كورەتىن. ءبىر ءۇيدىڭ جالعىز بالاسى بولعان سوڭ اناسى سۆەتلانا گەننادەۆنا دا قىزىن ەركەلەتىپ, بەتىنەن قاقپاي ءوسىردى. ەلگەزەك قىز التى جاسىندا بي ۇيىرمەسىنە قاتىستى. ءبىرازدان كەيىن ءبيدى ۇناتپاي, وسكەمەننەن ون شاقىرىم جەردەگى ەندى عانا ۇيىمداستىرىلا باستاعان فريستايل سەكتسياسىنا جازىلدى. توبىقتاي عانا قىزدىڭ كوزىنەن وتتى بايقاعان العاشقى باپكەرى اننا كورنىشەۆا اكەسى مەن اناسىنا «يۋليانىڭ فريستايلدى تاڭداۋى قۋانتادى, بىراق بۇل اسا كۇردەلى دە قاۋىپتى سپورت ءتۇرى. قۇلاپ قالىپ, نەمەسە جاراقات الىپ جاتسا, ماعان رەنجىمەڭىزدەر» دەپ قىسقا قايىردى. ءبىر-بىرىنە اڭتارىلا قاراعان ەۆگەني الەكساندروۆيچ پەن سۆەتلانا گەننادەۆنا, «وكپە ايتۋ ورىنسىز عوي, قىزىم وجەت, العان بەتىنەن قايتپايدى» دەپ سەندىرە سويلەدى.
ۋاقىت جۇردەك. اننا كورنىشەۆا ەكى جىلدان كەيىن تۇرمىس قۇرىپ, المانياعا قونىس اۋداردى. العاشقى باپكەرى يۋلياعا بار بىلگەنىن جالىقپاي ۇيرەتتى. شىدامدىلىق پەن تاكتيكالىق شەبەرلىكتىڭ قىر-سىرىنا قانىققان دارىندى قىزدى العاشقى جاتتىقتىرۋشىسى بالالار مەن جاسوسپىرىمدەر سپورت مەكتەبىنىڭ باپكەرى ۆيكتور پاۆلوۆيچ لەمەشكوعا تاپسىرىپ كەتتى. ال لەمەشكو فريستايلدىڭ ناعىز تاجىريبەلى باپكەرى بولاتىن.
11 جاسار تالانتتى قىز 2003 جىلى رەسەيدىڭ سانكت-پەتەربۋرگ قالاسىنداعى ءدۇبىرلى جارىسقا قاتىسىپ, چەمپيوندىق اتاققا يە بولىپ, كۋبوكتى جەڭىپ الدى. ارادا ءۇش جىلدان كەيىن جاسوسپىرىمدەر اراسىنداعى ەل بىرىنشىلىگىندە كۇمىس القانى يەلەنىپ, سپورت شەبەرى اتاندى. فريستايلدىڭ موگۋل تۇرىنە ەكىنىڭ ءبىرى بارا بەرمەيدى. كەدىر-بۇدىرلى تاۋدان تومەن قاراي زىمىراعان كەزدە بۇرىلىستا قاتە قيمىل جاساپ قويساڭ, وماقاساسىڭ. ارينە, تالاي ءدۇبىرلى جارىستاردا يۋليا قاتەلىكتەرگە جول بەرىپ الدى. بىراق جاسىمادى, قايتا ورشەلەنىپ, شەبەرلىگىن شىڭداي ءتۇستى. 15-كە ەندى تولار كەزدە الەم چەمپيوناتىنا قاتىسىپ, العاشقى وندىققا تابان تىرەدى.
يۋليانىڭ جەڭىستى قادامى 2008 جىلدان باستالدى. ول بۇل ۋاقىتتا ەۋروپانىڭ ەكى دۇركىن چەمپيونى اتاندى. 2009 جىلى جاپونيادا وتكەن الەم چەمپيوناتىندا تاماشا ونەر كورسەتكەن بويجەتكەن باپكەرلەردىڭ كوزىنە ىلىكتى. بىرلەسىپ ونەر كورسەتۋدە الەم چەمپيونى اتاندى. كانادانىڭ ۆانكۋۆەر قالاسىندا وتكەن قىسقى وليمپيا ويىندارىندا جولى بولمادى, ءسال قاتەلىك جاساپ ەدى, كانادا, اقش ەلىنىڭ قازىلارى تومەن قاراي سىرعىتا سالدى. سوچي وليمپياداسىنا قاتىسىپ, جەرلەسىمىزدىڭ ونەرىن كوزبەن كورگەن ەدىك. يۋليانىڭ جەڭىس تۇعىرىنا كوتەرىلسەم دەگەن ارمانىن تاعى دا مۇحيتتىڭ ارعى جاعىنان كەلگەن تورەشىلەردىڭ قيعانىنا كۋا بولدىق. كەرەمەت شەبەرلىك كورسەتكەن يۋليانى قازىلار جەتىنشى ورىنعا سىرعىتا سالىپ, فينالدىق ايقاستان شەتتەتتى. ول ول ما, تاعى ءبىر جەرلەسىمىز دميتري رەيحەردتىڭ بالىن تومەندەتىپ, ءۇشىنشى ورىندى رەسەيلىك فريستايلشىعا بەرە سالعان كەزدە وزەگىمىزدى ءورت شالدى. اتتەڭ!..
بۇدان كەيىن يۋليا جەرلەستەرىن ابىرويعا بولەدى. فرانتسيانىڭ مەريبەل قالاسىندا وتكەن الەم كۋبوگىندا التىننان القا تاقتى. 2015-2016 جىلدارى الەم چەمپيوناتىنىڭ قولاسىن, بىرنەشە رەت الەم كۋبوگى سايىستارىندا توپ جاردى, جۇلدە تەردى.
...2011 جىلدىڭ قاڭتارى. الماتىدا ءVىى قىسقى ازيا ويىندارى ءوتىپ جاتىر. وڭتۇستىك استانادا بىردە قار جاۋسا, كەلەسى كۇنى اق جاۋىن تولاسسىز سىركىرەيدى. قالىڭ تۇمان تۇمشالاعان كەزدە جارىستار بىرنەشە رەت وتپەي قالدى. اقىرى اۋا رايى اشىلعان سوڭ يۋليالار سايىسقا ءتۇسىپ, جەكە موگۋلدە, پاراللەلدى موگۋلدە ازيا ويىندارىنىڭ ەكى دۇركىن چەمپيونى اتاندى. ول ول ما, بىلتىر امەريكادا الەم كۋبوگى جارىسىندا 2-ورىندى, بيىل الماتىدا وتكەن دۇنيەجۇزىلىك ءححVىىى قىسقى ۋنيۆەرسيادا ويىندارىندا چەمپيون اتاندى. جاپونيانىڭ ساپپورو قالاسىندا جالاۋىن كوتەرگەن ازيا ويىندارىندا دا يۋليانىڭ جۇلدىزى جاندى.
2017 جىل تالانتتى جەرلەسىمىز ءۇشىن جەڭىسكە تولى بولدى. جاقىندا عانا يۋليا قىتايدا وتكەن الەم كۋبوگىنىڭ كەزەكتى سايىسىندا ءبىر التىن, ءبىر كۇمىسكە يە بولىپ, الەمدىك رەيتينگتە ەكىنشى ورىنعا جايعاستى. 25 جەلتوقساندا ءبىر توپ وسكەمەندىك يۋليانى اۋەجايدان قارسى الدى. ول بىرەر كۇنگە ەلگە ورالىپ, ودان سوڭ كانادادا وتەتىن الەم كۋبوگىنا اتتانباق.
– فينليانديانىڭ رۋكا قالاسىندا وتكەن الەم كۋبوگىندا جولىم بولمادى. ەسەسىن قىتاي ەلىندە قايتاردىم دەپ ويلايمىن. ارمانىم – پحەنچحاندا وتەتىن اق وليمپيادادا قازاقستاننىڭ تۋىن جەلبىرەتۋ. مەنىمەن بىرگە جەرلەستەرىم دميتري رەيحەرد, 16 جاستاعى وسكەمەندىك ورەن اياۋلىم امىرەنوۆا ەلىمىزدىڭ نامىسىن قورعايدى. فريستايلدىڭ موگۋل ءتۇرى كانادا مەن امەريكادا قاتتى دامىعان. وليمپيا ويىندارىنىڭ بارلىعىندا سول ەلدەردىڭ ماماندارى تورەشىلىك ەتەدى. ۆانكۋۆەردە, سوچيدە دە مەدال الۋعا بىردەن-ءبىر ۇمىتكەر ەدىم. امال بار ما, مۇحيتتىڭ ارعى جاعىنان كەلگەن تورەشىلەر كوپە-كورىنەۋ قيانات جاسادى, توبىقتان قاقتى. مەنىڭ العا قاراي ۇمتىلىپ, سەكىرەتىن ءادىسىمدى الەمدە بىردە-ءبىر فريستايلشى جاساي المايدى. وسى جولى كورەي ەلىندە جۇلدىزىم جانار دەگەن ۇمىتتەمىن, – دەدى يۋليا بىزبەن اڭگىمەلەسكەندە.
بۇل – يۋليانىڭ ءۇشىنشى وليمپياداسى. الەم كۋبوگى جارىستارىندا سان مارتە جەڭىمپاز اتانعان, الەم چەمپيوناتىنىڭ قولا جۇلدەگەرى, بىرنەشە دۇركىن ازيا ويىندارى مەن ۋنيۆەرسيادادا توپ جارعان وسكەمەندىك ساڭلاق قىزدان التىن القا كۇتەتىنىمىزدى نەسىن جاسىرايىق.
وڭداسىن ەلۋباي
وسكەمەن
سۋرەتتى تۇسىرگەن اۆتور