تاۋەلسىزدىك جىلدارىنداعى ءبىزدىڭ اۋىز تولتىرىپ ايتارلىق جەتىستىكتەرىمىز كوپ. جارقىن كورىنىستەرىمىز ىشكى-سىرتقى ساياسات پەن ەكونوميكالىق باعىتتاردا دا بارشىلىق. بۇل رەتتە ءبىر عانا جەتىستىكپەن شەكتەلۋ قيىن. ال ەندى جەكە پىكىرىم رەتىندە ايرىقشا اتاپ وتكىم كەلەتىنى, ول – شەكارامىزدىڭ قۇقىقتىق تۇرعىدا شەگەندەلۋى.
ناقتىلاي تۇسسەك, قازاقستان كورشى مەملەكەتتەرمەن شەكتەسەتىن جەرلەرىنىڭ بارلىعىن دا حالىقارالىق تالاپقا ساي شەڭبەردە زاڭداستىرىپ ۇلگەردى. ياعني قىتاي, رەسەي جانە ورتالىق ازيا ەلدەرىمەن ءوز شەكارامىزدى انىقتاپ, قاجەتتى بارلىق كەلىسىمدەرگە قول قويىپ, قۇقىقتىق تۇرعىدان رەتتەدىك. مۇنى نەگىزگى جەتىستىگىمىزدىڭ ءبىرى رەتىندە سانايتىنىم, بۇل − ەلدىڭ تاۋەلسىزدىگى مەن قاۋىپسىزدىگىنىڭ مەملەكەتتىك تۇرعىدا مويىندالعاندىعىن ايقىندايتىن تەتىك.
ال ەندى سالىستىرمالى تۇردە الار بولساق, ماسەلەن, كەڭەس وداعىنىڭ ءوزى قانداي الپاۋىت ەل بولسا-داعى, قىتايمەن اراداعى شەكارانى قۇقىقتىق تۇرعىدا ءبىر كەلىسىمگە كەلىپ, رەتتەي المادى. وسى ورايدا, تاۋەلسىزدىگىمىزدى العان سوڭ ۋاقىت سوزباي قىتايمەن شەكارامىزدى انىقتاۋىمىز ۇلكەن جەتىستىك. سول سياقتى رەسەيمەن دە بۇل ماسەلەنىڭ تۇبەگەيلى شەشىلگەنى كوڭىلگە دەمەۋ تۇتارلىق دۇنيە. ورتالىق ازيا ەلدەرىمەن دە شەكارا سىزىعىمىز ناقتىلانعان. مۇنىڭ ءبارى دە قازاقستاننىڭ ىرگەلەس ەلدەرمەن مەملەكەتتىك تۇرعىدا دامۋىنا, ساياسي-ەكونوميكالىق قارىم-قاتىناستاردى رەتتەۋىنە وڭ اسەرىن تيگىزەدى. وسىلايشا, تاۋەلسىزدىك جىلدارىندا جۇيەلى بايلانىستاردىڭ بەكي ءتۇسىپ, بارىس-كەلىسىمىز كەمەلدەنۋ ۇستىندە دەپ ايتۋعا تولىق نەگىز بار.
الەمدە شەكارا ماسەلەسىن ءالى كۇنگە شەشە الماي جاتقان تالاي مەملەكەت بار ەكەندىگىن ەسكەرسەك, وسى تۇستا ەلباسىمىزدىڭ ەرەن ەڭبەگىنە لايىقتى باعاسىن بەرۋىمىز كەرەك. مۇنى كورشى ەلدەردىڭ باسشىلارىمەن ساياسي ديپلوماتيالىق قارىم-قاتىناستاردا سالماقتى ءسوز ايتىپ, ىسكەرلىك قابىلەتىن تانىتا بىلگەن مەملەكەت باسشىسىنىڭ قاجىر-قايراتى مەن تاباندىلىعىنىڭ ارقاسىندا ورىن العان جەتىستىك دەپ باعالاۋعا بولادى.
جۋىردا عانا ءبىز تۇرىكمەنستانمەن دەماركاتسيا ماسەلەسىن شەشۋگە باعىتتالعان زاڭ جوباسىن ماقۇلداپ, سەناتقا جىبەردىك. وسى جەردە دەماركاتسيالاۋ جايىنا توقتالىپ وتكىم كەلەدى. ويتكەنى, شەكارا ماسەلەسىندە دەماركاتسيا جانە دەليميتاتسيا دەگەن تۇسىنىكتەر بار. دەليميتاتسيا دەگەنىمىز, شەكارانى كارتادا انىقتاپ الۋ. حالىقارالىق تاجىريبەدە ەڭ نەگىزگى قۇجات وسى دەليميتاتسيا ماسەلەسى بولىپ سانالادى. ال دەماركاتسيا تەحنيكالىق پروتسەس بولىپ تابىلادى. ياعني جالپاق تىلمەن ايتقاندا, كارتادا ايقىندالعان سىزىقتار بويىنشا شەكارا سىزىعىنىڭ تۇيىسكەن تۇسىندا شەكارا باعاندارىن تۇرعىزىپ, سىنالاردى قاعىپ شىعۋ.
ماۋلەن اشىمباەۆ, ءماجىلىس دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى