2013 جىلدىڭ 25 اقپانىنا دەيىن اۋباكىروۆتەر اۋلەتى ەل قاتارلى, ۋايىم-قايعىسىز تىرشىلىك كەشىپ جاتقان-دى.
ءتورت بالانىڭ كەنجەسى, 20 جاستاعى پەريزات جوعارى وقۋ ورنىن ءبىتىرىپ, جۇمىسقا ورنالاسىپ, اعىلشىن ءتىلىن ۇيرەنىپ, بيمەن شۇعىلدانىپ, ءانىن سالىپ الاڭسىز جۇرگەن بولاتىن. سول كۇنى ول اياق استىنان ىستىعى كوتەرىلىپ, اۋرۋحاناعا تۇسەدى. «اۋرۋحاناعا تۇسكەننەن كەيىن قولى مەن اياعى جانسىزدانىپ, كوزىنىڭ كورۋى ناشارلادى. دارىگەرلەر كوپكە دەيىن ناقتى دياگنوز قويا الماي, اقىرىندا وپتيكوميەليت (ورتالىق نەرۆ جۇيەسىنىڭ بۇزىلۋى) دەگەن دياگنوز قويدى. دارىگەرلەرگە قارالىپ, ءسال وڭالعانداي بولعاندا ء«بىر اينالدىرسا شىر اينالدىرادى» دەگەندەي, 2015 جىلى قىستا سەمەيگە ەمحاناعا كورىنۋگە بارا جاتقاندا كولىك اۋدارىلىپ, جاراقات الماسا دا مۇلدە قوزعالىسسىز قالدى. قازىر ول كۇنى-ءتۇنى توسەكتە جاتادى, جاقىندا اقىرىنداپ ورىندىققا وتىرا باستادى», - دەيدى پەريزاتتىڭ اپكەسى مەرۋەرت.
پەريزاتقا ماسكەۋدەگى ەمحانالاردىڭ بىرىندە دياگنوستيكا جاساتىپ, ەم الۋ ءۇشىن 4 ميلليون تەڭگە قاجەت بولىپتى. ەكى جارىم ميلليون تەڭگەنى جاقىن-جۋىقتارى مەن تانىستارى, باسقا دا جاناشىر جانداردىڭ كومەگىمەن اۋپىرىمدەپ ءجۇرىپ جيناپتى. قالعان 1 جارىم ميلليون تەڭگەنى قايدان تابامىز دەگەندە «قازتسينك» كومپانياسى ۇيىمداستىرعان بايقاۋ تۋرالى ەستىپ, قاتىسۋعا بەل بايلاپتى. «ۇيالى تەلەفوندى ۇتىپ الساق, ساتىپ, اقشاسىن پەريزاتتىڭ ەمىنە جۇمسايمىز» دەپ ۇيعارادى. الايدا ۇيىمداستىرۋشىلار اۋباكىروۆتەر اۋلەتى بايقاۋدا جەڭىمپاز بولسا دا, بولماسا دا 1 جارىم ميلليون تەڭگەنى كومەك رەتىندە بەرۋ جونىندە شەشىم قابىلدايدى. «بىزگە «كەلىڭىزدەر» دەپ تەلەفون شالعاندا نە سەنەرىمىزدى, نە سەنبەسىمىزدى بىلمەدىك. قۋانىشىمىزدى سوزبەن جەتكىزۋ مۇمكىن ەمەس. «قازتسينك» كومپانياسىنا ايتار العىسىمىز شەكسىز. اكە-شەشەمىز دە اڭ-تاڭ. بۇل قارجى پەريزاتتىڭ دەنساۋلىعىن جاقسارتۋعا سەپتىگىن تيگىزەدى دەگەن سەنىمدەمىز. اپايىم وسى سىرقاتتان جازىلسام, ەرىكتى بولامىن دەيدى. ونىڭ بۇل ارمانى ورىندالىپ, اياعىنان قاز تۇرىپ, قيىن جاعدايعا تاپ بولعاندارعا كومەكتەسەتىن مامان بولارىنا سەنگىمىز كەلەدى», - دەيدى بايقاۋعا قاتىسقان پەريزاتتىڭ تاعى ءبىر اپكەسى ينديرا اۋباكىروۆا.
ازامات قاسىم,
«ەگەمەن قازاقستان»
وسكەمەن