بيىل قازاقستان مەن ءازىربايجان رەسپۋبليكاسى اراسىنداعى ىنتىماقتاستىق قارىم-قاتىناسقا 25 جىل. وسىعان وراي, اقتاۋدا ەكى ەل وكىلدەرىنىڭ قاتىسۋىمەن سالتاناتتى شارا ءوتتى.
ەلباسىمىز نۇرسۇلتان نازارباەۆ اتاپ وتكەندەي «قوس مەملەكەت اراسىندا بۇرىننان تاريحي جانە مادەني بايلانىستارعا نەگىزدەلگەن ءداستۇرلى دوستىق سيپاتىنداعى ەكىجاقتى قارىم-قاتىناس قالىپتاسقان». جىل وتكەن سايىن ساياسي, ساۋدا-ەكونوميكالىق جانە مادەني-گۋمانيتارلىق بايلانىستىڭ دامۋى دا ارتىپ كەلەدى. قازاقستان مەن ءازىربايجان اراسىندا بۇگىنگە دەيىن جۇزدەگەن قۇجاتقا قول قويىلىپ, ەكونوميكالىق ىنتىماقتاستىق جونىندەگى ورتاق پارلامەنتارالىق كومميسياسى تابىستى جۇمىس اتقارۋدا.
قوس مەملەكەت اراسىنداعى ىنتىماقتاستىقتىڭ ماڭىزدى اسپەكتىلەرىنىڭ ءبىرى - ترانزيتتىك الەۋەت. ماسەلەن, ءازىربايجان ارقىلى وتەتىن كاۆكازدىق باعىت قازاقستانعا ەۋروپالىق نارىققا شىعۋعا مۇمكىندىك بەرەدى. ال قازاقستان ازەربايجانعا ورتالىق ازيا مەن قىتاي نارىعىنا شىعۋعا جول اشادى.
10 جىل بويى باكۋدە جىلىنا 350 مىڭ تونناعا دەيىن اۋىستىرىپ تيەۋ قۋاتى بار جانە ءبىر مەزگىلدە 15 مىڭ توننا استىق ساقتاي الاتىن سىيىمدىلىعى بار «باكۋ استىق تەرمينالى» جشق بىرلەسكەن كاسىپورنى جۇمىس جاساپ كەلەدى. ءازىربايجاندى جوعارى ساپالى استىقپەن قامتاماسىز ەتۋمەن قاتار, كاسىپورىندا قازاقستاندىق استىقتى كاۆكاز جانە قارا تەڭىز وڭىرلەرىنىڭ مەملەكەتتەرىنە, ەو ەلدەرىنە ەكسپورتتايدى.
يندۋستريالاندىرۋ كارتاسى اياسىندا ازەربايجان كومپانياسى – «ازەرسۋن ءوندىرىس جانە لوگيستيكا ورتالىعى» جشس-ءنىڭ «اقتاۋ تەڭىز پورتى» اەا-دا ازىق-ت ۇلىك تاۋارلارىن ساقتاۋ ءۇشىن اۋدانى 178,7 مىڭ شارشى مەتر بولاتىن قويمالىق ورىنجايلار قۇرۋ جوباسى ىسكە استى. جوبانىڭ جالپى قۇنى 1,4 ملرد.تەڭگەنى قۇرايدى.
قازاقستان ازىربايجانعا تەمىرجول جانە ترامۆاي لوكوموتيۆىنىڭ جابدىقتارىن, قارا مەتالل, جانار-جاعارماي, قۇرىلىس ماتەريالدارىن ەكسپورتتايدى. يمپورتتىڭ نەگىزگى بولىگىن قانت جانە كونديتەرلىك ونىمدەر, قارا مەتالدان جاسالعان ونىمدەر, كوكونىس پەن داندەر, تەكستيل ونىمدەرى مەن ەلەكتر قۇرال-جابدىقتارى قۇرايدى.
ەكى ەل ءۇشىن دە ماڭىزدى جوبا - قۇرىق پورتى. كيەلى ماڭعىستاۋ جەرىنەن ارتىلعان جۇك ءازىربايجان ارقىلى كاۆكاز, تۇركيا جانە ەۋروپا ەلدەرىنە جول تارتادى. الداعى ۋاقىتتا دا ءدال وسى قۇرىق پورتى ارقىلى بايلانىس ارتا تۇسپەك.
ماڭعىستاۋ وبلىسى مەن ءازىربايجان رەسپۋبليكاسى اراسىنداعى ىشكى ساۋدا اينالىمى 2017 جىلدىڭ قاڭتار-قازان ايلارى بويىنشا 41,2 ملن. اقش دوللارىن قۇرادى. ونىڭ ىشىندە 26,1 ملن. اقش دوللارى ەكسپورت ۇلەسىنە, 15,1 ملن. اقش دوللارى يمپورتقا تيەسىلى. بۇگىندە ايماقتاعى 52 مەكەمەدە ازىربايجاندىق كومپانيالاردىڭ ۇلەسى بار.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى