قازاقستان رەسپۋبليكاسى مەملەكەتتىك ورتالىق مۋزەيى مەن تەمىربەك جۇرگەنوۆ اتىنداعى قازاق ۇلتتىق ونەر اكادەمياسى ستۋدەنتتەرى قازاقستان رەسپۋبليكاسىنىڭ تاۋەلسىزدىگى كۇنىنە ارنالعان «تۋعان جەر تىنىسى» اتتى شىعارماشىلىق كورمەسىن وتكىزدى.
كورمەنىڭ اشىلۋ سالتاناتىندا قر موم ديرەكتورىنىڭ عىلىمي جۇمىستار جونىندەگى ورىنباسارى عاليا تەمىرتون, قازاقستاننىڭ ەڭبەك سىڭىرگەن قايراتكەرى جۇماقىن قايرامباەۆ, قازاقستاننىڭ ەڭبەك سىڭىرگەن قايراتكەرى, كەسكىندەمە, ءمۇسىن جانە ديزاين فاكۋلتەتىنىڭ دەكانى, پروفەسسور باۋىرجان ءبايدىلدا, قازاقستاننىڭ ەڭبەك سىڭىرگەن قايراتكەرى, كەسكىندەمە, ءمۇسىن كافەدراسىنىڭ مەڭگەرۋشىسى, پروفەسسور بولات تۇرعىمباي, ماقسات اليەۆ, كورمەنىڭ قاتىسۋشىسى ەلەنا شاراپوۆا ءسوز الىپ, كورمەنىڭ اشىلۋىمەن قۇتتىقتادى.
كۇندەلىكتى جۇمىسىندا ءوز كورەرمەندەرىن ەلىمىزدىڭ ونەر الەمىنە قوسىلعان جاڭا بۋىن وكىلدەرىمەن تانىستىرۋ ارقىلى تالانتتى جاستاردىڭ شىعارماشىلىعىن قولداپ, قازىرگى كەزەڭدەگى ۇلتتىق ونەر جەتىستىكتەرىن ناسيحاتتاۋعا ۇلەس قوسىپ كەلە جاتقان مۋزەيدەگى بۇل كورمەدە تەمىربەك جۇرگەنوۆ اتىنداعى قازاق ۇلتتىق ونەر اكادەمياسى ستانوكتىق كەسكىندەمە شەبەرحاناسىنىڭ جەتەكشىسى, پروفەسسور جۇماقىن قايرامباەۆتىڭ شاكىرتتەرى ەلەنا شاراپوۆا, مارينا كوركۋت, نازەركە ءىلياسوۆا, نارگيز مۇحامەتقالينا, شاحيزا قۋانىشبەكوۆا, جانات سەيتحامزا ۇلى سىندى سۋرەتشىلەردىڭ بەينەلەۋ ونەرىنىڭ پەيزاج, ناتيۋمورت, گرافيكا جانرىندا ورىندالعان قىلقالام تۋىندىلارى, سونىمەن قاتار ساندىك-قولدانبالى ونەر نۇسقالارى, تەكستيل - قازىرگى كيىم ۇلگىلەرى ۇسىنىلدى.
جۇرتشىلىقتىڭ ۇلكەن قىزىعۋشىلىعىن وياتقان «تۋعان جەر تىنىسى» اتتى اتالمىش كورمەگە سونداي-اق, جوعارعى وقۋ ورىندارىنىڭ وقىتۋشىلارى مەن ستۋدەنتتەرى, ونەرتانۋشىلار, ارحەولوگتار, شىعىستانۋشىلار, فوتوسۋرەتشىلەر, سۋرەتشىلەر مەن باسقا دا عىلىم, مادەنيەت جانە ونەر قايراتكەرلەرى كوپتەپ كەلدى.
كورمە 2018 جىلدىڭ 8 قاڭتارىنا دەيىن جالعاسادى.
ميرا بايبەك,
«ەگەمەن قازاقستان»
الماتى