قازاقستان پرەزيدەنتى تمد ەلدەرى باسشىلارىنىڭ بەيرەسمي سامميتىنە قاتىستى. بۇل تۋرالى akorda.kz حابارلادى.
كەزدەسۋگە ازەربايجان رەسپۋبليكاسىنىڭ پرەزيدەنتى ي.اليەۆ, ارمەنيا رەسپۋبليكاسىنىڭ پرەزيدەنتى س.سارگسيان, بەلارۋس رەسپۋبليكاسىنىڭ پرەزيدەنتى ا.لۋكاشەنكو, قىرعىز رەسپۋبليكاسىنىڭ پرەزيدەنتى س.جەەنبەكوۆ, مولدوۆا رەسپۋبليكاسىنىڭ پرەزيدەنتى ي.دودون, رەسەي فەدەراتسياسىنىڭ پرەزيدەنتى ۆ.پۋتين, تاجىكستان رەسپۋبليكاسىنىڭ پرەزيدەنتى ە.راحمون جانە وزبەكستان رەسپۋبليكاسىنىڭ پرەزيدەنتى ش.ميرزيوەۆ قاتىستى.
مەملەكەتتەر باسشىلارى جيىن بارىسىندا رەسەي فەدەراتسياسىنىڭ تمد-عا 2017 جىلى توراعالىق ەتۋىن قورىتىندىلادى.
نۇرسۇلتان نازارباەۆ ۆلاديمير ءپۋتيندى تمد-عا توراعالىعىنىڭ تابىستى اياقتالۋىمەن قۇتتىقتاپ, رەسەي فەدەراتسياسىنىڭ ەۋرازيالىق كەڭىستىكتەگى ينتەگراتسيانى دامىتۋ جانە دوستاستىقتىڭ حالىقارالىق بەدەلىن نىعايتۋ ءۇشىن اتقارعان جۇمىسىنىڭ ماڭىزدىلىعىن اتاپ ءوتتى.
مەملەكەت باسشىسى بيىلعى قاراشادا مينسك قالاسىندا وتكەن ۇجىمدىق قاۋىپسىزدىك شارت ۇيىمىنىڭ سامميتىندە وڭىرلىك جانە حالىقارالىق كۇن ءتارتىبىنىڭ مەيلىنشە وزەكتى ماسەلەلەرى قاراستىرىلعانىن ايتتى.
– بىزدە كەلىسسوز ارقىلى شەشە الماعان ماسەلە جوق. بارىمىزگە ەگەمەندىك پەن ءوزارا قۇرمەت قاعيداتتارىن نەگىزگە الىپ, ءارى قاراي جۇمىس ىستەۋ قاجەت, – دەدى قازاقستان پرەزيدەنتى.
نۇرسۇلتان نازارباەۆ ۆلاديمير پۋتينگە الداعى رەسەي فەدەراتسياسى پرەزيدەنتىنىڭ سايلاۋىندا تابىس تىلەپ, رەسەيدىڭ كوپۇلتتى حالقى دۇرىس شەشىم قابىلدايتىنىنا سەنىم ءبىلدىردى.
سوڭىندا تاراپتار ءتۇرلى سالالارداعى مەملەكەتارالىق ىنتىماقتاستىقتى ودان ءارى دامىتۋ ماسەلەلەرى جونىندە پىكىر الماسىپ, كەلەسى جىلى تمد-عا توراعالىق ەتۋىنە وراي تاجىكستان رەسپۋبليكاسىنا ساتتىلىك تىلەدى.