استانادا يننوۆاتسيالىق جوبالار بايقاۋىنىڭ جەڭىمپازدارى ماراپاتتالدى

جەڭىمپازدار مەن جۇلدەگەرلەردى ماراپاتتاۋ راسىمىنە «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد قاتىستى. NURINTECH جوباسى بىلتىر ەلباسى, پارتيا توراعاسى نۇرسۇلتان نازارباەۆتىڭ تىكەلەي باستاماسىمەن قولعا الىنعان بولاتىن. ونىڭ ماقساتى – جاستاردىڭ عىلىم مەن بىلىمگە جانە يننوۆاتسياعا دەگەن قىزىعۋشىلىعىن ارتتىرۋ.

جيىندا ءسوز سويلەگەن م.قۇل-مۇحاممەد وسىنداي بايقاۋلاردىڭ ەل ءۇشىن ماڭىزى زور ەكەنىنە نازار اۋداردى. ونىڭ ايتۋىنشا, ەلىمىزدەگى جاس عالىمدار مەن ونەرتاپقىشتار ەلباسىنىڭ يننوۆاتسيانى دامىتۋعا باعىتتالعان ساياساتىن قولداپ, جۇزەگە اسىرۋعا اتسالىسۋى كەرەك.

«بيىل وتكەن «ەكسپو-2017» حالىقارالىق كورمەسى ەلىمىزدەگى عىلىم مەن ەكونوميكا سالاسىنا ولشەۋسىز اسەر ەتتى. سونىڭ ءبىر دالەلى بۇگىنگى بايقاۋ. مەكتەپ جاسىنداعى بالالار عىلىمعا قىزىعۋشىلىق تانىتىپ وتىر», دەدى پارتيا توراعاسىنىڭ ءبىرىنشى ورىنباسارى.

بيىلعى بايقاۋعا مىڭنان استام ءوتىنىش كەلىپ تۇسكەن. ۇمىتكەرلەر IT جانە اۋە-عارىش تەحنولوگياسى, ەنەرگەتيكا, ەنەرگيا كوزىن ساقتاۋ, حيميالىق تەحنولوگيا, نانوتەحنولوگيا, اگرويننوۆاتسيا, تابيعي قوردى ءتيىمدى پايدالانۋ, رەسۋرستاردى ساقتاۋ, روبوتوتەحنيكا, 3D يندۋستريا جانە تاعى باسقا ءتۇرلى سالالار بويىنشا وزدەرىنىڭ يننوۆاتسيالىق جۇمىس جوبالارىن ۇسىنعان.

جەڭىمپازداردى انىقتاۋ ءۇشىن ارنايى بايقاۋ كوميسسياسى قۇرىلىپ, ونىڭ قۇرامىنا قازاقستاننىڭ بەلگىلى عالىمدارى, قوعام قايراتكەرلەرى, پارلامەنت دەپۋتاتتارى, مەملەكەتتىك ورگاندار مەن بيزنەس-قاۋىمداستىق وكىلدەرى ەندى. بارلىق جۇمىستى تىڭعىلىقتى زەرتتەۋ ناتيجەسىندە ەڭ ۇزدىك ءارى سۇرانىسقا يە, ەكونوميكالىق جاعىنان ءتيىمدى 25 جوبا تاڭدالىپ الىندى.

بايقاۋ قورىتىندىسىنا ساي, «تەحنوستارت», «جاستاردىڭ يننوۆاتسيالىق جوباسى», «پەرسپەكتيۆا», «الەۋمەتتىك ماڭىزى بار يننوۆاتسيا» اتالىمدارى بويىنشا جەڭىمپازدار انىقتالدى. بۇدان بولەك, «قازاقستاننىڭ ەڭ ۇزدىك جاس عالىمى» اتالىمى بويىنشا مەتاللۋرگيا سالاسىندا رەسۋرستاردى ساقتاۋ تەحنولوگياسىن ويلاپ تاپقان قاراعاندىلىق ەربول شابانوۆ جەڭىمپاز اتاندى. ءتيىمدى كۇن كوللەكتورىنىڭ جوباسىن ۇسىنعان جامبىلدىق گاۋھار سماعۇلوۆا ەكىنشى ورىن السا, كەسۋ قۇرالدارىن بەكىتەتىن يننوۆاتسيالىق تەحنولوگيانى ويلاپ تاپقان شىعىسقازاقستاندىق باۋىرجان راحاديلوۆ ۇزدىك ۇشتىكتى تۇيىندەدى. بايقاۋدىڭ ارنايى سىيلىعى Mbionics كومپانياسىنىڭ نەگىزىن سالۋشى, جاساندى قول جاساۋمەن اينالىساتىن 23 جاستاعى ماۋلەن بەكتۇرعانوۆقا بەرىلدى.

سونىمەن قاتار بيىلعى بايقاۋعا لاتىنشا جازۋعا قاتىستى باعدارلامالار مەن قوسىمشالاردىڭ, «جاسىل» ەنەرگەتيكا مەن ەكولوگيالىق يننوۆاتسيالىق جوبالارى قاتىستى. جەڭىمپازدار مەن جۇلدەگەرلەر قارجىلاي سىيلىقتارمەن ماراپاتتالدى. ءار اتالىمدا توپ جارعان جاسقا – 1 ميلليون تەڭگە, ەكىنشى ورىن يەلەرىنە – 500 مىڭ تەڭگە, ءۇشىنشى ورىن العان جاستارعا 250 مىڭ تەڭگە كولەمىندە سىياقى بەرىلدى.

اباي اسانكەلدى ۇلى, «ەگەمەن قازاقستان»