پەتروپاۆل قالاسىنداعى بوتانيكالىق باقتى قىس بويى مەكەندەپ شىعاتىن بىرقازاندى قىزىقتاۋشىلار دا, جابىلا اسىراۋشىلار دا كوپ.
وسىنداعى مامانداردىڭ ايتۋلارىنشا, بىرقازان بۇيرا جانە قىزعىلت دەپ ەكى توپقا بولىنەتىن كورىنەدى. العاشقى توپقا جاتاتىن قۇستى ەسىل اۋدانىنىڭ ءبىر تۇرعىنى كوشەدەن تاۋىپ الىپتى. اسىراي الماسىن سەزگەننەن كەيىن جەرگىلىكتى بوتانيكالىق باققا تاپسىرىپتى. بۇل جاققا قالاي ۇشىپ كەلگەنى بەلگىسىز.
«قىزىل كىتاپقا» ەنگەن ايرىقشا ادەمى بىرقازاننىڭ قازىر قارنى توق, ۋايىمى جوق دەسە دە بولادى. ۇزىندىعى ءبىر مەتر, سالماعى 15 كەلى تارتاتىن قۇستىڭ تاماعىن ەرىكتىلەر مەن جەكەلەگەن ادامدار قامتاماسىز ەتىپ وتىر. كۇننەن- كۇنگە ءوسىپ, جەتىلىپ كەلەدى.
نەگىزىنەن سۋبتروپيكتىك ايماقتاردى قىستايتىن قۇستىڭ تەرىسكەي وڭىرگە كەلۋى وتە سيرەك قۇبىلىس, دەيدى تابيعات قورعاۋشىلار.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى