يۋنەسكو-نىڭ ماتەريالدىق ەمەس مۇرانى قورعاۋ ۇكىمەتارالىق كوميتەتىنىڭ 12-ءشى سەسسياسى شەڭبەرىندە قازاقستاننىڭ ءداستۇرلى اسىق ويىنى ادامزاتتىڭ ماتەريالدىق ەمەس مادەني مۇراسىنىڭ تىزىمىنە ەنگىزىلدى.
سەسسيا اياسىندا ماتەريالدىق ەمەس قۇندىلىقتارعا ارنالعان كورمە ۇسىنىلدى, سونداي-اق اسىق ويىنى كورسەتىلدى. اسىق ويىنى ادامنىڭ وي ءورىسى مەن دەنە ءبىتىمىنىڭ دامۋىنا ىقپال ەتەدى ءارى ۇلتىنا قاراماستان, وسكەلەڭ ۇرپاق اراسىندا ءوزارا جاقىنداسۋعا جول اشادى. بالالىق شاق سيمۆولى رەتىندە اسىق ويىنى قازاقستان حالقىنىڭ بىرلىگىن نىعايتۋدا, سونداي-اق بىرلىك پەن ۇلتتىق سانا-سەزىمىن دامىتۋدا ماڭىزدى ءرول اتقارادى. حالىقارالىق ساراپشىلار اتاپ وتكەندەي, جاس بالالار بۇل مۇرانى ساقتاپ قالۋدىڭ نەگىزگى بۋىنى بولىپ تابىلادى.
نوميناتسيانى دايىنداۋ جۇمىسىن قازاقستاننىڭ يۋنەسكو جانە يسەسكو ىستەرى جونىندەگى حاتشىلىعى, ماتەريالدىق ەمەس مادەني مۇرانى قورعاۋ جونىندەگى ۇلتتىق كوميتەتتىڭ ساراپشىلارى, ەلىمىزدىڭ يۋنەسكو جانىنداعى تۇراقتى وكىلدىگى جانە مادەنيەت جانە سپورت مينيسترلىگى بىرلەسە اتقاردى.
ماتەريالدىق ەمەس مادەني مۇرانى قورعاۋ كونۆەنتسياسىن قازاقستان 2011 جىلى جەلتوقساندا راتيفيكاتسيالاعاننان بەرى ماتەريالدىق ەمەس مادەني مۇرانىڭ رەپرەزەنتاتيۆتى تىزىمىنە قازاقستاننان 7 نوميناتسيا ەنگىزىلدى: «دومبىرامەن كۇي ورىنداۋ ونەرى» (2014 ج.), «قازاق كۇرەسى» (2016 ج.), قىرعىزستانمەن بىرلەسكەن نوميناتسيالار رەتىندە «كيىز ءۇي جاساۋ ماشىقتارى» (2014 ج.) جانە «ايتىس/Aيتىش, سۋىرىپ- سالما ونەرى» (2015 ج.), سونداي-اق كوپۇلتتىق وتىنىمدەر رەتىندە «ناۋرىز» (12 ەل), «قۇس سالۋ» (18 ەل) جانە «تۇرىك ءپاتىر نانى» (5 ەل). سوڭعى ۇشەۋى 2016 جىلى ەنگىزىلدى.
يۋنەسكو-نىڭ حالىقارالىق تىزىمىنە قازاق وتىنىمدەرىن ەنگىزۋ ەلىمىزدىڭ ماتەريالدىق ەمەس مادەني مۇراسىن حالىقارالىق دارەجەدە تانىتۋعا جانە ونى قورعاۋ ءۇشىن جۇيەلى ءىس-شارالاردى جۇزەگە اسىرۋعا وڭ سەپتىگىن تيگىزەدى.
الداعى جىلدارى قازاقستان يۋنەسكو-نىڭ ماتەريالدىق ەمەس مادەني مۇرانىڭ رەپرەزەنتاتيۆتى تىزىمىنە «قازاق جىلقىشىلارىنىڭ ءداستۇرلى كوكتەمگى سالتى» جانە «قورقىت-اتا مۇراسى» اتتى (تۇركيا, ازەربايجان, قىرعىزستانمەن بىرلەسكەن) كوپۇلتتى وتىنىمدەردى ەنگىزۋدى جوسپارلاپ وتىر.
«ەگەمەن-اقپارات»