قازاقستاندا تىركەلگەن ديپلوماتيالىق كورپۋس باسشىلارى «بايقوڭىر» عارىش ايلاعىندا بولىپ, «سويۋز-مس-07» باسقارىلاتىن كولىكتىك عارىش كەمەسىن ۇشىرۋدى تاماشالادى, دەپ حابارلادى ءسىم-ءنىڭ ءباسپاسوز قىزمەتى.
ەلشىلەردىڭ «بايقوڭىرعا» ساپارىن قىزىلوردا وبلىسىنىڭ اكىمدىگى جانە قازاقستاننىڭ سىرتقى ىستەر مينيسترلىگى ۇيىمداستىردى.
عارىش ايلاعىنا ساپار اياسىندا ديپلوماتتار «بايقوڭىر» مۇراجايىنا بارىپ, وندا ايلاق مۇراجايىن, «بۋران» وربيتالىق كەمەسىن جانە س.پ.كورولەۆ پەن يۋ.ا.گاگاريننىڭ مەموريالدىق ۇيلەرىن كوردى. 16 ديپلوماتيالىق ميسسيانىڭ باسشىلارى سونداي-اق «قورقىت اتا» مەموريالدىق كەشەنىن ارالادى.
ساپارعا اۋستريا, ارمەنيا, يندونەزيا, يران, كانادا, كۋبا, ماجارستان, ماروككو, نيدەرلاند, رۋمىنيا, سلوۆاكيا, شۆەيتساريا ەلشىلەرى, سونداي-اق ەۋروپالىق وداق, ەقىۇ, بۇۇ بوسقىندار جونىندەگى جوعارعى كوميسسار باسقارماسى جانە دۇنيەجۇزىلىك دەنساۋلىق ساقتاۋ ۇيىمى وكىلدىكتەرىنىڭ باسشىلارى قاتىستى.
ەلشىلەردىڭ ساپارى مەملەكەتتىڭ قازاقستان وڭىرلەرىنە شەتەلدىك ينۆەستيتسيالاردى تارتۋ, ولاردىڭ تۋريستىك الەۋەتىن نىعايتۋ جانە جاعىمدى ءيميدجىن قالىپتاستىرۋ شارالارى اياسىندا ۇيىمداستىرىلدى.