وڭتۇستىك قازاقستان وبلىسى تۇلكىباس اۋدانىنا قاراستى شاقپاق اۋىل وكرۋگىندە وبلىستىڭ تاريحىن تانىتاتىن ستەلا اشىلدى. بۇل قاقپا جامبىل وبلىسىمەن شەكارالاس اۋماقتا ورنالاسىپ وتىر. نىساننىڭ اشىلۋ سالتاناتىنا قاتىسقان وبلىس اكىمى جانسەيىت تۇيمەباەۆ ايماق تۇرعىندارىن تاۋەلسىزدىك كۇنىمەن قۇتتىقتاپ, ستەلانىڭ ماڭىزدىلىعىنا توقتالدى.
«ەلباسىمىزدىڭ ساياساتى ناتيجەسىندە بۇگىندە ەلىمىز بەيبىت عۇمىر كەشىپ كەلەدى. وڭىرلەردە كۇن سايىن وندىرىستەر اشىلىپ, جاڭا جۇمىس ورىندارى پايدا بولىپ جاتىر. ەلدىڭ الەۋەتى جاقسارۋدا. ءبىزدىڭ وبلىستىڭ دا سالالارى قارقىندى ءوسۋ ۇستىندە. ماسەلەن, بۇگىنگى ستەلانىڭ اشىلۋى دا تاريحي وقيعا. ءدال وسى نىساندا وڭتۇستىكتىڭ تىنىس-تىرشىلىگىنەن xاباردار ەتەتىن قاجەتتى مالىمەتتەر دە جاقسى بەرىلىپتى. ەكى وبلىستىڭ شەكاراسىن الداعى ۋاقىتتا تىنىعىپ, دەمالاتىن جايلى ورىنعا اينالدىرۋعا دا بولادى», - دەدى ءوڭىر باسشىسى.
جەرگىلىكتى جۇرت اتىنان ءسوز العان اۋداننىڭ قۇرمەتتى ازاماتى, ارداگەر ءومىرتاي قالىقۇلوۆ تۇرعىندار اتىنان العىسىن ءبىلدىردى. سونداي-اق, وڭتۇستىك قازاقستان وبلىسىنىڭ تۇلكىباس اۋدانى مەن جامبىل وبلىسىنىڭ جۋالى اۋدانى اراسىنداعى جاڭا نىساننىڭ سالىنۋى ەلەۋلى وقيعا ەكەندىگىن ايتتى.
«الاتاۋ مەن قاراتاۋ تۇيىسكەن بۇل ءوڭىر ەلىمىزگە تالاي تالانت پەن باتىردى سىيلاعان قاسيەتتى مەكەن. تۇرار رىسقۇلوۆتاي, باۋىرجان مومىش ۇلىنداي دارا تۇلعالاردى دۇنيەگە اكەلگەن ولكە. التىنقۇرساقتى انالارىمىز باردا تاعى دا حالىققا قايراتكەرلەرىن سىيلاي بەرمەك. مىنە, بۇگىنگى نىساننىڭ اشىلۋى دا ايتۋلى شارا», - دەدى ءومىرتاي قالىقۇلوۆ.
ايتا كەتەرلىگى, ستەلانىڭ قۇرىلىسىنا جەرگىلىكتى بيۋدجەتتەن جالپى سوماسى 70 ملن. تەڭگەگە جۋىق قارجى جۇمسالعان. مەردىگەر مەكەمە «جيگيتا» جشس-ءى نىساندى ۋاقىتىندا تاپسىرىپ وتىر. ستەلا ايماعىنداعى تاقتايشالاردا وڭتۇستىك قازاقستان وبلىسىنداعى 15 اۋدان, قالا جايلى اقپارات جازىلعان. بارلىق ايماقتىڭ تولقۇجاتى بەينەلەنگەن. سونداي-اق, جولاۋشىلارعا ارنايى تىنىعاتىن ورىندىقتار ورنالاسىپتى. الداعى ۋاقىتتا قاقپا اۋماعىندا اس ءىشىپ تاماقتاناتىن, دەمالىپ تىنىعاتىن ورىندار بوي كوتەرەتىن بولادى.