وسكەمەندەگى جىبەك ماتالار كومبيناتى (جمك) ىقشام اۋدانىنداعى ەڭ ۇلكەن كوشەلەردىڭ ءبىرى كارل ماركس داڭعىلىنا قازاقتىڭ ءۇش ءبيىنىڭ ءبىرى, كورنەكتى مەملەكەت جانە قوعام قايراتكەرى قاز داۋىستى قازىبەك ءبيدىڭ ەسىمى بەرىلۋى مۇمكىن. شاھارداعى وبلىستىق سوتتىڭ ۇجىمى مەن جمك ىقشاماۋدانىنىڭ اقساقالدار القاسى قالالىق اكىمدىككە وسىنداي ۇسىنىس ءبىلدىرىپ, حات جولداپتى. وسىعان وراي وسكەمەن قالالىق اكىمدىگىندە قالالىق ءماسليحات دەپۋتتارى مەن شاھار تۇرعىندارىنىڭ قاتىسۋىمەن قوعامدىق تىڭداۋ ءوتتى.
قوعامدىق تىڭداۋدى جۇرگىزگەن قالالىق ءماسليحات دەپۋتاتى, «نۇر وتان» پارتياسى وسكەمەن قالالىق فيليالى توراعاسىنىڭ ورىنباسارى مايراش ەكىباسوۆا جيىن بارىسىندا كوشە اتاۋىن قايتا اتاۋعا قاتىستى ۇسىنىس ءبىراۋىزدان قولداۋ تاپقانىن, تەك ءبىر دەپۋتات تاراپىنان «بۇل جۇمىس سول كوشە تۇرعىندارىنىڭ قالتاسىنا سالماق سالماي ما؟» دەگەن ساۋال قويىلعانىن, وعان قالا اكىمىنىڭ ورىنباسارى ولگا بۋلاۆكينا ءتيىستى جاۋاپ بەرگەنىن ايتتى.
قالالىق ءماسليحات دەپۋتاتتارى تاراپىنان قولداۋ تاپقان ۇسىنىس ەندى رەسپۋبليكالىق ونوماستيكالىق كوميسسيادا قارالادى.
ازامات قاسىم,
«ەگەمەن قازاقستان»
وسكەمەن