پەتروپاۆلدا بۇلدىرشىندەر بالاباقشامەن قامتىلدى

بالالار مەكەمەسى مەملەكەتتىك-جەكەمەنشىك ارىپتەستىك اياسىندا نەبارى 10 ايدىڭ ىشىندە تۇرعىزىلدى.  3200 شارشى مەتر اۋماقتا ورنالاسقان عيماراتتىڭ قۇرىلىسىنا 530 ميلليون تەڭگە جۇمسالدى. جوبانى جەكە كاسىپكەر گاريك بەرنەتسيان جۇزەگە اسىردى. ول وبلىس ورتالىعىندا وسىمەن ءۇشىنشى بالاباقشانى پايدالانۋعا بەردى. وسى باعىتتاعى جۇمىستاردى ودان ءارى جالعاستىرماق نيەتتە.

ايماق باسشىسى قۇمار اقساقالوۆ  الەۋمەتتىك ماڭىزى بار عيماراتتى ارالاپ كوردى. وڭىردە  بالعىنداردى مەكتەپكە دەيىنگى مەكەمەلەرمەن قامتۋ كورسەتكىشى ءجۇز پايىز ورىندالعانىن جەتكىزدى. مۇندا 3-6 جاس ارالىعىنداعى بۇلدىرشىندەر  قازاق, ورىس جانە اعىلشىن تىلدەرىندە ءبىلىم الاتىن بولادى.  بالاباقشا جەكە كاسىپكەردىڭ قاراجاتىنا سالىنعانىمەن,  7 توپتىڭ بارلىعى بيۋدجەت  ارقىلى قارجىلاندىرىلادى. دەمەك شىعىننىڭ ءبىر بولىگىن مەملەكەت وتەيدى دەگەن ءسوز. سونىمەن قاتار 48 جاڭا جۇمىس ورنى اشىلدى.

ءومىر ەسقالي,

«ەگەمەن قازاقستان».

سولتۇستىك قازاقستان وبلىسى.