قىزىلوردا وبلىسىنىڭ ءۇش اۋدانىندا جاڭا نىساندار اشىلدى (فوتو)

سىرداريا اۋدانىنىڭ ورتالىعى تەرەنوزەك كەنتىندە از قامتىلعان وتباسىلار ءۇشىن 10 ارەندالىق ءۇي پايدالانۋعا بەرىلدى. قىزىلوردا وبلىسىنىڭ اكىمى قىرىمبەك كوشەرباەۆ كەنت تۇرعىندارىن تاۋەلسىزدىك كۇنىمەن جانە قونىس تويلارىمەن قۇتتىقتاپ, باسپانانىڭ  كىلتىن تابىستادى.

«بۇگىن ەڭ ۇلكەن مەرەكە. الەمدە قانشاما حالىق بار مەملەكەتى, جەرى جوق.. ەلباسىمىزدىڭ  سارابدال ساياساتىنىڭ ارقاسىندا تاۋەلسىزدىگىمىز تۇعىرلى بولىپ, قازاقستاندىقتار بولاشاققا ۇلكەن سەنىممەن قارايدى. اسىرەسە, سىر ءوڭىرىن ارقاشان قولداپ كەلگەنى ءۇشىن مىڭ العىس ايتامىز. قىزىلوردالىقتار, ءوز كەزەگىندە, ۇلت كوشباسشىنىڭ سەنىمىن اقتاي ءبىلدى دەپ ايتا الامىن. كەز كەلگەن ايماقتىڭ دامۋىنىڭ ايقىن كورىنىسى – قۇرىلىس جۇمىستارىنىڭ كولەمى. قىزىلوردا وبلىسىندا 5 جىل ىشىندە  3,5 ەسە, ال وبلىس ورتالىندا 8 ەسە ءوستى. سىرداريا   اۋدانىندا كەلەسى جىلى 84 پاتەر سالىناتىن بولادى. تەرەنوزەك كەنتىندە ءۇي كەزەگىندە 350 ادام تۇرسا, 2018 جىلى ولاردىڭ سانى ۇشتەن ءبىر بولىككە ازايماق», - دەپ اتاپ ءوتتى ق.كوشەرباەۆ.

جالاعاش اۋدانىندا وبلىس اكىمى كاسىپكەر بولات ۇزاقوۆتىڭ «باتىس ەۋروپا – باتىس قىتاي» حالىقارالىق ءدالىزىنىڭ بويىندا سالىنعان «س» ساناتتاعى سەرۆيستىك كەشەنىنىڭ اشىلۋ راسىمىنە قاتىستى. بۇل نىسان «بيزنەستىڭ جول كارتاسى-2020» باعدارلاماسى اياسىندا سالىندى, قۇرامىندا ءدامحانا, ساۋدا پاۆيلونى جانە قوناق ءۇيى بار. سونداي-اق, كەشەن اۋماعىندا 12 جەڭىل اۆتوكولىك, 2 اۆتوبۋس جانە 7 جۇك كولىكتەرى قاراستىرىلعان. نىسان تولىق پايدالانۋعا بەرىلگەن سوڭ مۇندا 25 ادام جۇمىسپەن قامتىلاتىن بولادى.

وسىنداي كەشەن قاراشا ايىندا قارماقشى اۋدانىندا دا جۇمىسىن باستادى. جول بويى كەشەنىنىڭ يەسى الي راگيبوۆ ايماق باسشىسىن نىسان جۇمىسىمەن تانىستىردى. 2017 جىلى وڭىردە بارلىعى 36 سەرۆيستىك كەشەن سالىنىپ, 1000 استام جاڭا جۇمىس ورنى اشىلادى.

سونىمەن قاتار, وبلىس اكىمى اۋداندارعا جۇمىس ساپارى بارىسىندا جالاعاش اۋدانىنىڭ تاڭ اۋىلدىق وكرۋگىندەگى «تاڭ بوبەگى» بالاباقشاسىنىڭ جۇمىسىمەن تانىستى. 120 ورىندىق بالاباقشا «تاڭ لتد» جشس قاراجاتىنىڭ ەسەبىنە مەملەكەتتىك-جەكەمەنشىك ارىپتەستىك اياسىندا اشىلدى. كاسىپورىن بۇرىنعى بالاباقشانىڭ ەسكى عيماراتىندا كۇردەلى جوندەۋ وتكىزىپ, ىسكە قوستى. بالاباقشادا 22 ادام جۇمىس ىستەيدى.

سونداي-اق, ايماق باسشىسى اۋدانداردا قوعامداستىق وكىلدەرىمەن كەزدەسىپ, ەلدى مەكەندەردىڭ وزەكتى ماسەلەلەرىن تالقىلادى جانە ءتۇرلى سالا وزاتتارىن العىس حاتتارمەن ماراپاتتادى.