قاراعاندى وبلىسىنداعى «ارسەلورميتتال تەمىرتاۋ» اق قاراستى سەگىز شاحتانىڭ قىزمەتكەرلەرى جۇمىس شارتتارىنا نارازىلىق ءبىلدىرىپ, كومپانيا باسشىلىعىنا بىرقاتار تالاپتار قويدى.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا, بارلىعى 684 شاحتەر بەلسەندى نارازىلىق تانىتتى. وبلىس اكىمدىگى مەن كومپانيا باسشىلىعى جاعدايعا ارالاسقان سوڭ, ءار شاحتادان ءتورت ادامنان 32 وكىل شىعىپ كەلىسسوزدەرگە قاتىستى.
قاراعاندى وبلىسى اكىمى ءباسپاسوز قىزمەتىنىڭ حابارلاۋىنشا, 12 جەلتوقسان كۇنى وبلىس اكىمى ەرلان قوشانوۆپەن كەزدەسۋ ءۇشىن «ارسەلورميتتال تمد» كومپانياسىنىڭ باس ديرەكتورى پارامجيت كالون قاراعاندىعا كەلدى.
«كومپانيا ۇسىنعان شارتتاردىڭ تالقىلانۋى 23:00 ۋاقىتىندا اياقتالىپ, ودان سوڭ ءوڭىر باسشىسى «ارسەلورميتتال تەمىرتاۋ» اق اتقارۋشى ديرەكتورى ۆاديم باسينمەن بىرگە شاحتەرلەرمەن كەزدەسۋگە باردى. 00:30 ۋاقىتىندا ەرلان قوشانوۆ «شاحتينسكايا» شاحتاسىنا ءتۇسىپ, ەكى ساعاتتىق كەلىسسوز جۇرگىزىپ, ناتيجەسىندە 59 ادام جوعارى كوتەرىلدى.» - دەيدى ءباسپاسوز قىزمەتى.
ءدال وسىنداي كەلىسسوزدەن سوڭ, «تەنتەك» شاحتاسىنان 76 ادام جوعارى كوتەرىلدى. تۇنگى ساعات ۇشتە وبلىسى اكىمى «تەنتەك» شاحتاسىندا كومپانيا باسشىلىعىنىڭ, كاسىپوداقتاردىڭ, بريگاديرلەردىڭ قاتىسۋىمەن شاحتەرلەردىڭ تالاپتارى مەن كومپانيانىڭ ۇسىنىستارىن تالقىلادى. ءبىر ساعاتتان سوڭ, اكىم «لەنين» شاحتاسىنا بارىپ, 19 ادامدى شاحتادان الىپ شىقتى. تاڭعى ساعات 06:00 دە اكىم «قازاقستان» شاحتاسىنا بارىپ, كەنشىلەرمەن كەزدەستى.
ناتيجەسىندە, جەلتوقساننىڭ 12-نەن 13-نە قاراعان ءتۇنى 154 شاحتەر جوعارى كوتەرىلدى.
سونىمەن قاتار, ءباسپاسوز قىزمەتىنىڭ حابارلاماسىندا, «الەۋمەتتىك جەلىلەردە شاحتينسك ايماعىندا شاحتەرلەردىڭ قاماۋعا الىنعانى جايلى حابارلامالار تاراتىلۋدا. وبلىستىڭ ىشكى ىستەر دەپارتامەنتى شاحتينسك ايماعىندا ەشكىمنىڭ قاماۋعا الىنباعانىن مالىمدەيدى. پوليتسيا ازاماتتاردىڭ ارانداپ قالماۋىن سۇرايدى» دەلىنگەن.