ەل ءىليا جاقانوۆتى عاجايىپ كومپوزيتور رەتىندە بىلەدى. قازاقستان جانە قىرعىز رەسپۋبليكالارىنىڭ ەڭبەك سىڭىرگەن قايراتكەرى, «پاراسات» وردەنىنىڭ يەگەرى, حالىقارالىق جامبىل سىيلىعىنىڭ لاۋرەاتى سىندى اتاقتارىن تىزبەلەگەندە ونىڭ ونەر زەرتتەۋشىسى, جازۋشى ەكەنىن دە ايتپاي كەتۋگە بولمايدى.
ءسوز بەن ساز قۇدىرەتى قاتار قونعان تۇلعانىڭ تاعى ءبىر قاسيەتى بار, ول – سۋرەتشىلىگى. ءتىپتى جاسى جەتپىستەن اسقاندا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىن ءبىتىرىپ, كاسىبي سۋرەتشى اتانعان. ش.ساريەۆ اتىنداعى وبلىستىق كوركەمسۋرەت جانە قولدانبالى-ساندىك ونەر مۋزەيىندە ەلباسىنىڭ «رۋحاني جاڭعىرۋ» باعدارلاماسى اياسىندا ءىليا جاقانوۆتىڭ «سۇلۋلىقتى جىرلاعان سۋرەتكەر» اتتى جەكە شىعارماشىلىق كورمەسى ءوتتى.
– ءىليا جاقانوۆتىڭ اندەرىن بالا كەزىمىزدەن تىڭداپ, سانامىزعا ءسىڭىرىپ وستىك, – دەدى كورمەنىڭ اشىلۋ سالتاناتىندا وبلىس اكىمىنىڭ ورىنباسارى الىبەك ناۋتيەۆ. – «تالانتتى ادام بارلىق جاعىنان تالانتتى» دەگەن راس. ءبىز كەيىنگى جىلدارى كومپوزيتوردى سۋرەتشىلىك قىرىنان دا تانىپ كەلەمىز. ءار تۋىندىسى كەرەمەت ءبىر اۋەنمەن تەربەلىپ تۇرعانداي اسەر قالدىرادى.
ءىليا جاقانوۆ سۋرەتشى بولۋدى بالا كەزىنەن ارمانداپتى. «قارىنداشپەن انام مەن اكەمنىڭ, اعامنىڭ سۋرەتتەرىن سالاتىنمىن. شىعارماشىلىق ادامى ءبىر جەردە توقىراپ قالماۋى كەرەك. مەن دە ۇنەمى ىزدەنىستە جۇرگەندى قالايمىن. تابيعاتپەن تىلدەسەمىن. كارتينالارىمنىڭ ءبارىن شابىتپەن سالدىم», – دەيدى ءوزى.
كورمەگە قىلقالام شەبەرىنىڭ 70-كە جۋىق تۋىندىسى قويىلدى. قازاقتىڭ كەڭ جازيرا دالاسىن سۋرەتتەگەن «جەرۇيىق» توپتاماسى, جايىققا ارنالعان پەيزاجدىق تۋىندىلار, پورترەتتەر مەن گرافيكالىق جۇمىستار كورمەگە كەلۋشىلەردىڭ كوڭىلدەرىنەن شىقتى. شارادا كومپوزيتوردىڭ اندەرى شىرقالىپ, شىعارماشىلىعى جايلى بەينەفيلم دە كورسەتىلدى.
باقىتگۇل باباش, «ەگەمەن قازاقستان»
اتىراۋ