بەينەلەۋ ونەرىنىڭ بەل ورتاسىندا جۇرگەندەر وسى ءبىر كەرەكۋلىك قىلقالام شەبەرىنىڭ بوياۋلار ۇندەستىگىن بىردەن تانيدى. تابيعاتقا ءبىر تابان جاقىن تالانتتىڭ قولتاڭباسىن بىلەتىندەر «ۋاي, مىناۋ شورانوۆتىڭ سالعان سۋرەتتەرى عوي!» دەپ ءدوپ باسادى.
بيىل جىل باسىندا ەلىمىزدىڭ ەڭ تاڭداۋلى 10 سۋرەتشىسى الماتىدا وتكەن ۋنيۆەرسيادا جارىستارىن جارىسا بەينەلەپ, ونى وڭتۇستىك شاھاردىڭ شەجىرەسىنە سىيعا تارتتى. سول سۋرەتشىلەردىڭ اراسىندا پاۆلودارلىق وسەرباي شورانوۆ تا بولدى جانە سپورتتىق دودا اياسىندا وتكەن بايقاۋدا «ستانوكتى كارتينا دەڭگەيىندە اياقتالعان ەتيۋد» اتالىمى بويىنشا جەڭىمپاز اتانعانى ەستە. ونىڭ ۇستىنە سوڭعى جىلدارى سۋرەتشى ەلىمىزدىڭ ونشاقتى قالاسىن اسىقپاي ارالاپ, كەمەلىنە كەلگەن شاقتا كورىكتى مەكەندەرىمىزدى مايلى بوياۋمەن كەنەپكە قالدىردى.
شورانوۆتىڭ سۋرەتكەرلىك الەمىنە ساياحات جاساعان ادام الدىمەن ونىڭ جۇمىستارىنان تاريحقا تاعزىمدى, اتا-بابالار اماناتىنا ادالدىقتى, سالت-داستۇرگە بەرىلگەن سالەمدى, بالالىق شاققا شاقىرعان ساعىنىشتى, اۋىلدىڭ ءيىسىن, سىلدىراپ اققان وزەندەردىڭ داۋسىن جازباي تانيدى. وسىدان كەيىن باستاپقى ەموتسيا جايىنا قالىپ, ورىندالعان جۇمىستاردىڭ تاقىرىپتىق تۇتاستىعىن ءتانتى ەتە باستاماق. سۋرەتشى تۇستەردىڭ ۇيلەسىمىن ءمىنسىز دامىتا وتىرىپ, باياۋ ءبىر ءان سالىپ تۇرعانداي الەمگە باستايدى. بۇل سۋرەتتەر باس-اياعى بار اڭگىمە دە سياقتى, ياكي بولماسا شابىتتان تۋعان مۋزىكالىق شىعارما ىسپەتتەس.
مازمۇنعا باي بوياۋلار كەرەكۋلىك سۋرەتشىنىڭ بۇلجىمايتىن باعدارشامى. كوپتى كورگەن كوسەم, ابىز شەشەن اڭگىمە باستاعانداي اسەر «تەمىر جاۋىنگەر», «كەك», «قاھار», «انا ءتاڭىر», «قوجا احمەت ياساۋي كەسەنەسى» سىندى كەسكىندەمەلەرىنەن تانىلادى.
ال ايەلدىڭ سۇلۋلىعى مەن مەيىرىمىن («تاڭ سۇلۋى») مويىنداماعان قىلقالام شەبەرى تابىلسا, ول دا ءبىر كەم دۇنيە بولارى انىق. بالالىق شاقتىڭ تۇكپىرىندە وشاق باسىندا مازداعان ارماندار («كوبىك ءدامى») ۇلعايا كەلە بۇكىل وتاندىق تاقىرىپتارعا («ەجەلگىنىڭ ءىزى») ۇلاسادى.
بوياۋلارعا ءامىرىن جۇرگىزە الاتىن سۋرەتشى ءوزىنىڭ شەبەرلىگىن ۇلتتىق قولونەردى اسپەتتەۋمەن بەكەمدەي تۇسەتىنىن مويىنداۋ ءلازىم. سوناۋ «باياناۋىل اڭىزدارىنان» باستاپ, «قالىڭدىق جاساۋى», «كەش» سياقتى كارتينالار سۋرەتكەردىڭ عانا ەمەس, ۇلتتىق بەينەلەۋ ونەرىنىڭ ورتاق بايلىعى ەمەس پە؟! تەكەمەت, قۇراق-كورپەلەر مەن باسقۇرلار مىڭ قۇبىلعان تۇستەردەن عانا تۇرمايدى. بۇل سۋرەتتەردە وتكەن كۇننىڭ بەلگىلەرى, سيمۆوليكالىق نىشاندار, پەتروگليفتەر سويلەيدى.
ونەرتانۋشىلار شورانوۆتىڭ ورنامەنتالدىق جۇمىستارىندا تۇتاستىق, بوياۋلار مىنسىزدىگى مەن ىرعاق بار ەكەنىنە ءبىر اۋىزدان كەلىسەدى. سونىمەن الداعى كۇندەرى سۋرەتشىنىڭ ەلوردادا « ۇلى دالا ورنەگى» اتتى ەڭ ۇزدىك جۇمىستارى قويىلاتىن كورمەسى باستالادى. بۇل كۇندەرى ونىڭ ەڭبەكتەرى پاۆلودار كوركەمسۋرەت مۋزەيىنەن, قازاقستان سۋرەتشىلەر وداعى ديرەكتسياسىنىڭ قورىنان, يتاليا, فرانتسيا, يۋگوسلاۆيا, گەرمانيا, رەسەي, گرۋزيا, قىتاي, وڭتۇستىك كورەيا جانە باشقۇرتستان ەلدەرى جەكە كوللەكتسيونەرلەرىنىڭ جيناقتارىنان تابىلادى.
ايناش ەسالي, «ەگەمەن قازاقستان»
الماتى