«قايدا جۇرسەڭ اتامەكەن, كوكەيىڭدە جاتادى ەكەن» دەپ ايگىلى اندە ايتىلاتىنداي, قايدا جۇرسە دە وسكەن-ونگەن ورتاسىن ەستەن شىعارماي, اركەز اۋىلىنىڭ ءسۇيىنىشى مەن كۇيىنىشىنە ەلەڭدەپ, الاڭداپ وتىراتىن ازاماتتار از ەمەس.
تارباعاتاي اۋدانى تۇعىل اۋىلىنىڭ تۇرعىندارى وسىدان ءبىراز ۋاقىت بۇرىن تۋعان جەرىن قۇرمەتتەۋدىڭ شىنايى ۇلگىسىن كورسەتكەن تاعىلىمدى ءىستىڭ كۋاسى بولدى. وسى اۋىلدا ۇزاق جىل ابىرويلى قىزمەت اتقارعان قابدىعالي احمەتوۆتىڭ بالالارى ەلدى مەكەن سىرتىنداعى ۇزىندىعى 2 شاقىرىم بەيىت اۋماعىن بيىكتىگى 1 جارىم مەتر تەمىر دۋالمەن قورشاپ, قابىرشىلەرگە شاعىن ءۇي سالىپ بەرىپتى. بۇل ىسكە 15 ميلليون تەڭگەگە جۋىق قارجىلارىن جۇمساپتى.
«كوپ ۋاقىتتان بەرى سىرتتامىز. سىرتتا جۇرسەك تە اۋىلدى, ەلدى ساعىنامىز. بىلتىر تۋعان مەكەنگە ءبىر كەلگەنىمىزدە اۋىل شەتىندەگى بەيىتتەردىڭ كەيبىرىنىڭ قۇلاپ, مال اياعىنا تاپتالىپ, اشىق-شاشىق جاتقانىن كورىپ, جۇرەگىمىز اۋىردى. ءبىزدىڭ اتامىز, تۋعان-تۋىستارىمىز, اۋىلدىڭ تالاي ادامدارى وسى بەيىتتە جەرلەنگەن. ء«ولى رازى بولماي ءتىرى بايىمايدى» دەگەندەي, اعا-ىنىلەرمەن اقىلداسا كەلە وسىنداي شەشىمگە كەلدىك. تۇعىلدان تۇلەپ ۇشىپ, بۇگىندە ەلىمىزدىڭ تۇكپىر-تۇكپىرىندە ەڭبەك ەتىپ جاتقان مىقتى ازاماتتار از ەمەس. سول ازاماتتار تۋعان جەرىنىڭ, اياۋلى اۋىلىنىڭ ءبىر جىرتىعىن جاماۋعا جاردەمدەسسە كىندىك كەسكەن ولكەمىز ودان ءارى كوركەيا تۇسەر ەدى», - دەيدى يگى ىسكە مۇرىندىق بولعان اعايىندىلار مەيرامبەك پەن قايراتبەك احمەتوۆتار.
تۋعان توپىراقتارىنان شالعايدا جۇرسە دە پەرزەنتتىك پارىزدارىن ەستەن شىعارمايتىن قابدىعالي اۋلەتى كەلەشەكتە اۋىلداعى مەكتەپكە قولدان كەلگەن كومەگىن كورسەتپەك نيەتتە.
ازامات قاسىم,
«ەگەمەن قازاقستان»
شىعىس قازاقستان وبلىسى,
تارباعاتاي اۋدانى.