بەلگىلى ءانشى, «استانا-وپەرا» تەاترىنىڭ جەتەكشى ءسوليسى سۇندەت بايعوجين قوستاناي قالاسىندا ءوزىنىڭ جەكە كونتسەرتىن بەردى.
«تۋعان جەر» باعدارلاماسى اياسىندا وتكەن بۇل كونتسەرتىن ءانشى «تۋعان جەرگە تاعزىم» دەپ اتاپتى. ونىڭ سەبەبى دە بار. سۇندەت 2018 جىلدىڭ قاڭتارىندا ەۋروپاعا اتتانادى.
يتالياداعى ريم وپەرا تەاترىمەن جاساسقان كەلىسىم-شارت بويىنشا الەمنىڭ تانىمال انشىلەرى ونەر كورسەتەتىن ساحنادا ەكى جىل قىزمەت ىستەيدى. وسى ساپارىنىڭ الدىندا ول تۋعان جەرگە كەلىپ, جەرلەستەرىنە ونەرىن تارتۋ ەتۋدى ءجون ساناپتى.
«مەن ارقالىق قالاسىندا ءوستىم, ءبىلىم الدىم. ونەرگە ۇمتىلدىم. بىراق قازىر وپەرا سەكىلدى ۇلكەن ونەردە بەلگىلى تابىستارعا جەتىپ, ەلورداداعى كەرەمەت «استانا-وپەرا» تەاترىنىڭ جەتەكشى ءانشىسى دارەجەسىنە جەتكەنمەن, تۋعان جەرىمدە ءانىمدى تىڭداتۋعا ىڭعايى كەلمەي جۇرەتىن ەدى. ەندى ۇزاق ساپارعا اتتانار الدىنداعى از ۋاقىتتى پايدالانىپ, جەرلەستەرىمە تۇڭعىش جەكە كونتسەرتىمدى ۇسىنعىم كەلدى. مۇنى الەمدەگى بەدەلدى تەاترداعى قىزمەتىم, ونەردەگى ەڭبەگىم ابىرويلى بولۋعا جەرلەستەرىمنەن, تىلەگىمدى تىلەپ وتىراتىن اۋىلداعى اعايىن-جۇرتىمنان العان باتام دەپ تە تۇسىنەمىن» دەدى سۇندەت بايعوجين.
ە.ومىرزاقوۆ اتىنداعى وبلىستىق فيلارمونيانىڭ كونتسەرت زالىندا سۇندەت بايعوجين تىڭدارمان قاۋىمدى كاۋسار بۇلاقتاي ءان تۇنىعىنا سۋسىنداتتى. ءانشى جەرلەستەرىنە ابايدىڭ, قازاق كومپوزيتورلارىنىڭ جانە حالىق اندەرىنەن باستاپ, «اباي» وپەراسىنداعى اباي ارياسى مەن الەم وپەرا ونەرىندەگى ءىنجۋ-مارجانداردى تارتۋ ەتتى. ءانشىنىڭ كەڭ تىنىستى تالانتى جەرلەستەرىن ءتانتى ەتتى. ءانشى كونتسەرتىنىڭ الدىندا وبلىستاعى بۇقارالىق اقپارات قۇرالدارى ءۇشىن ءباسپاسوز ءماسليحاتىن وتكىزىپ, ءوزىنىڭ جوسپارلارىمەن ءبولىستى.
ءنازيرا جارىمبەت,
«ەگەمەن قازاقستان»
قوستاناي