قازاق جەرىنەن تابىلعان «التىن ادام» العاش رەت شەتەلگە شىعارىلدى. ەندى ۇلى دالانىڭ ءتوسىن كەزگەن كوشپەندىلەردىڭ ونەرى كۇللى جاھانعا كورسەتىلەدى, دەپ جازادى حابار 24.
«التىن ادام» الەم مۋزەيلەرىن ارالايدى» دەپ اتالاتىن حالىقارالىق جوبانىڭ الدىمەن ات باسىن بۇرعان ءوڭىرى - بەلارۋس رەسپۋبليكاسى. بۇل ەلدەگى ۇلتتىق كوركەمونەر مۋزەيىندە قازاقستاننان اكەلىنگەن جاۋھار جادىگەرلەر قويىلدى. كورمە اشىلماي جاتىپ-اق جۇرت ونى الەم ونەرىندەگى باستى شارا دەپ باعالاپ ۇلگەردى.
بەلارۋس استاناسىنداعى كوركەم مۇراجايدىڭ باستى زالىنا قويىلعان جادىگەرلەر تەڭدەسى جوق بىرەگەي. مۇندا 232 ەكسپونات پەن ساپ التىننان جاسالعان 120 اشەكەي بار. حالىقارالىق جوبا ەلدىڭ مادەني ومىرىندەگى باستى شاراعا اينالدى. ويتكەنى ءبىزدىڭ زامانىمىزعا دەيىنگى VII عاسىرداعى, ياعني تەمىر داۋىرىندەگى اسىل بۇيىمدار ادامزات تاريحىنداعى ەڭ ەجەلگى جادىگەرلەر بولىپ سانالادى.
«بۇلار - تۇپنۇسقالار. مەنىڭ ويىمشا, ءبىزدىڭ كورەرمەندەر بۇل جادىگەرلەرمەن العاش رەت تانىسايىن دەپ وتىر. ءتىپتى بۇكىل تمد ەلدەرىنىڭ ىشىندە ءبىرىنشى دەسەم دە بولادى. ال مىنا «التىن ادام» - كورمەنىڭ باستى جادىگەرى. ول قازىر قالا كوشەلەرىنىڭ بارلىق جارنامالىق تاقتاسىندا ءىلىنىپ تۇر. ويتكەنى سوعان لايىق. ساق التىندارى 1969 جىلى الماتىعا جاقىن جەردە تابىلدى. ساق كوسەمىنىڭ جەرلەنگەن ورنىن ايگىلى قازاقستاندىق ارحەولوگ كەمال اقىشەۆ باستاعان ەكسپەديتسيا اشتى. قولباسشىنىڭ باس جانە ۇستىڭگى كيىمىنىڭ اشەكەيلەرى سول قالپىندا ساقتالعان. بۇل «التىن ادامدى» جيناپ, قۇراستىرۋعا مۇمكىندىك بەردى», - دەيى بەلارۋس ۇلتتىق كوركەم مۇراجايىنىڭ جەتەكشى عىلىمي قىزمەتكەرى اللا گاۆريلوۆا.