الماتىدا قازاقستان مۇسىلماندارىنىڭ كەزەكتى VIII قۇرىلتايى ءوتىپ جاتىر. جيىن بارىسىندا قازاقستان مۇسىلماندارى ءدىني باسقارماسىنىڭ جاڭا باس ءمۇفتيى سايلاندى, دەپ حابارلايدى قازاقپارات.
قۇرىلتايعا قاتىسۋشى 300-دەن استام دەلەگات سەرىكباي قاجى وراز ۇلىنىڭ كانديداتۋراسىن ءبىراۋىزدان قولدادى. جاڭا باس ءمۇفتي 4 جىل, ياعني 2018-2022 جىلدار ارالىعىندا قىزمەت اتقاراتىن بولادى. سونداي-اق باس ءمۇفتي ورىنباسارلارى لاۋازىمىنا ناۋرىزباي قاجى تاعان ۇلى, الاۋ Əدىلباەۆ, باۋىرجان ەسماحانوۆ سايلاندى.
قۇرىلتاي جۇمىسىنا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ, قازاقستان مۇسىلماندارى ءدىني باسقارماسىنىڭ تورالقا مۇشەلەرى, عۇلامالار كەڭەسىنىڭ مۇشەلەرى, تەولوگ-عالىمدار, زيالى قاۋىم وكىلدەرى, ەلىمىزدىڭ ءار وبلىسىنان كەلگەن قۇرىلتاي دەلەگاتتارى قاتىسۋدا. قازاقستاننىڭ بۇرىنعى باس ءمۇفتيى ەرجان قاجى مالعاجى ۇلى ءوزى قىزمەت اتقارعان 2013-2017 جىلدار ارالىعىندا ىسكە اسىرىلعان جۇمىستار جونىندە ەسەپ بەردى.