ەلباسى نۇرسۇلتان نازارباەۆتىڭ قاتىسۋىمەن وتكەن يندۋستريالاندىرۋ كۇنىنە ارنالعان جالپىۇلتتىق تەلەكوپىر بارىسىندا شىعىس قازاقستان وبلىسىندا ەكى بىردەي جوبانىڭ تۇساۋى كەسىلدى. ونىڭ ءبىرى - «كازتسينك» جشس-نە قاراستى زىريان كەن بايىتۋ كەشەنىنىڭ مالەەۆ كەنىشىندە ىسكە قوسىلعان «Pitram» يننوۆاتسيالىق جوباسى.
اتالعان جوبانى جۇزەگە اسىرۋ كەنىشتەگى باسقارۋ ۇدەرىسىن ءبىرشاما وڭتايلاندىرادى دەپ كۇتىلۋدە. اتاپ ايتقاندا, نىسان اۋماعىندا جەدەل بايلانىس ورناتىپ قانا قويماي, جەر استىنداعى قۇرىلعىلاردىڭ اقاۋلىعى تۋرالى ناقتى اقپارات الۋعا مۇمكىندىك بەرەدى. جاڭا جۇيە, سونىمەن قاتار, جاۋاپتى تۇلعالاردى شاحتاداعى جۇمىس بارىسىنان قۇلاعدار ەتىپ وتىرادى. بۇل ءوز كەزەگىندە تەحنولوگيالىق ۇدەرىستى ۇيلەستىرىپ, رەسۋرستاردى ءتيىمدى پايدالانۋعا جاعداي تۋعىزباق. ۇتقىر پەرسونال مەن قۇرىلعىلاردى باسقارۋدىڭ اۆتوماتتى جۇيەسى كوپتەگەن تەحنيكالىق جابدىقتاردان قۇرالعان. مۇنداي جۇيەنى ەنگىزۋدىڭ نەگىزگى ماقساتتارىنىڭ ءبىرى – كەنىشتەگى قىزمەتكەرلەردىڭ ءجۇرىپ-تۇرۋىن ونلاين رەجيمدە باقىلاۋ مۇمكىندىگى. ارنايى قۇرال كەنشى لامپاسىنىڭ باتارەياسى مەن وزگە قۇرال-سايماندارىنا جالعانىپ, قاۋىپسىز راديوتولقىندار ارقىلى ادامنىڭ قاي جەردە جۇرگەنى تۋرالى دالمە-ءدال اقپارات بەرەدى.
ء«بىز «كازتسينك» بولىمشەلەرىن تەحنيكالىق تۇرعىدان قايتا جاراقتاندىرۋ جونىندەگى ءىس-شارالار جوسپارىن ازىرلەپ, قابىلداپ قويدىق. بۇل جوسپارعا جەتى يننوۆاتسيالىق جوبا كىرەدى. ولارعا تارتىلاتىن ينۆەستيتسيا مولشەرى 12 ميلليارد تەڭگەدەن اسادى. ونىڭ ءبىرى ءتورتىنشى ونەركاسىپتىك رەۆوليۋتسيا ەلەمەنتتەرىنەن قۇرالعانىن ايتا كەتكەن ءجون. ياعني, «Pitram» جۇيەسى مەن «SIC» كونتسەپتسيالارىن ەنگىزۋ ارقىلى مالەەۆ كەنىشىنىڭ وپەراتسيالىق جۇمىسىن اۆتوماتتاندىرۋ. جوبانىڭ جۇزەگە اسىرىلۋى 2018 جىلدىڭ ناۋرىز ايىنا دەيىن اياقتالۋى ءتيىس. وسىنداي جۇمىستىڭ ناتيجەسىندە ەلىمىز تاۋەلسىزدىگىن العان العاشقى جىلدارى ىسكە قوسىلعان زاماناۋي كەنىشتە كوپ تارماقتى اقپاراتتىق جۇيە پايدا بولماق. بۇل ءوز كەزەگىندە كەنىشتەگى جۇمىستى باسقارۋ ۇدەرىسىن جەڭىلدەتىپ, نىسانداعى قاۋىپسىزدىك شارالارىن ودان سايىن كۇشەيتە تۇسەدى دەپ كۇتىلۋدە. وسىنىڭ ءبارى تسيفرلىق تەحنولوگيالاردىڭ ارقاسىندا مۇمكىن بولىپ وتىر», – دەيدى «كازتسينك» جشس-ءنىڭ باس ديرەكتورى يۋري گۋسەۆ.
ازامات قاسىم,
«ەگەمەن قازاقستان»
شىعىس قازاقستان وبلىسى