استانادا اقىن عالي ورمانوۆتى ەسكە الۋ كەشى ءوتتى

ء«ومىرىمنىڭ ساۋلەسىن, ورەنىمە شاشايىن» اتتى عالي ورمانوۆتىڭ 110 جىلدىق مەرەيتويى مەكتەبىمىزدە باستالىپ,«اقىن عۇمىرى» اتتى رەسپۋبليكالىق ادەبي – سازدى شىعارماشىلىق كەش استانا قالاسى جاستار تەاترىندا  جالعاسىن تاپتى. اتاۋلى ءىس-شاراعا الماتى قالاسىنان ارنايى كەلگەن اقىننىڭ قىزى – جاميعا عاليقىزى, جيەنى ايدار قىرىقباي ۇلى جانە  استانا قالاسىنىڭ زيالى قاۋىمى اقىن, حالىقارالىق «الاش» ادەبي سىيلىعىنىڭ يەگەرى سەرىك تۇرعىنبەك ۇلى, فيلولوگيا عىلىمدارىنىڭ كانديداتى, الاشتانۋشى قايرات ساق, بەلگىلى جۋرناليست «التىن جۇلدىز» سىيلىعىنىڭ يەگەرى, قازاق ۇلتتىق ونەر اكادەمياسىنىڭ كۇرمەتتى پروفەسسورى نۇرتىلەۋ يمانعالي ۇلى قاتىستى. سونىمەن قاتار اقىننىڭ تۋعان جەرىن الماتى وبلىسى  اقسۋ اۋدانى قاپال اۋىلىنداعى عالي ورمانوۆ اتىنداعى ورتا مەكتەپ ۇستازدارى مەن شاكىرتتەرى كەلدى.

كەشتى استانا قالاسى مەملەكەتتىك فيلارمونياسىنىڭ «سارىارقا» فولكلورلىق ءانسامبلى اشتى. سونىمەن قاتار عالي ورمانوۆتىڭ قازاق راديوسىنىڭ التىن قورىندا ساقتالعان 1963 جىلى بەرىلگەن سۇحباتى كورەرمەندەرگە ۇسىنىلدى.

اقىنىن قۇرمەتەگەن قوعام قايراتكەرى, ونەرجاناشىرى «نۇر وتان» پارتياسىنىڭ ءبىرىنشى حاتشىسى قۇل-مۇحاممەد مۇحتار ابرار ۇلى ارنايى قۇتتىقتاۋ حات جىبەردى. "عالي ورمانوۆ ادەبيەتىمىزگە وتكەن عاسىردىڭ 20-جىلدارىنىڭ سوڭىندا كەلىپ, قازاق پوەزياسىنىڭ قالىپتاسۋىنا ۇلكەن ۇلەس قوسقان اسا تالانتتى اقىن. ولەڭ-جىرعا قۇمارتىپ, قيسسا-داستانداردى جاتتاپ وسكەن قالامگەر جاستايىنان ادەبيەتكە جاقىن بولدى. عالەكەڭ ولكەلىك گازەتتەردە جاريالانعان العاشقى ولەڭدەرىمەن-اق قالىڭ وقىرماننىڭ جۇرەگىنە جول تاپتى. جامبىل جاباەۆتىڭ ادەبي حاتشىسى بولا ءجۇرىپ جىر الىبىنىڭ شىعارمالارىن جاس ۇرپاققا جەتكىزۋگە زور ەڭبەك ءسىڭىردى", دەلىنگەن حاتتا. 

كەش سوڭىندا عالي ورمانوۆ اتىنداعى №7 مەكتەپ – گيمنازياسىنىڭ ديرەكتورى ايتوۆا جانات تۇرىسبەكقىزى ءسوز الىپ, اقىننىڭ قىزى – جاميعا عاليقىزىن ساحنا تورىنە شاقىرىپ,سىي – قۇرمەت كورسەتتى. جاميعا عاليقىزى اكەسى تۋرالى ەستەلىكتەر ايتىپ,  كەشتى ۇيىمداستىرۋىنا قولداۋ كورسەتكەن استانا قالاسى مادەنەنيەت باسقارماسىنا, ءبىلىم باسقارماسىنا شەكسىز العىسىن ءبىلدىردى.