پرەزيدەنت نۇرسۇلتان نازارباەۆتىڭ ايتۋىنشا, تەحنولوگيالىق جاڭعىرتۋدى ويداعىداي اتقارۋ ءۇشىن ادام كاپيتالىن دامىتۋ قاجەت. كاسىبي مامانداردى تىرنەكتەپ ءجۇرىپ جيناۋ كەرەك. ونسىز العا قويىلعان ماقساتتاردى ىسكە اسىرۋ مۇمكىن ەمەس.
«بىزدە ءبىلىم سالاسى دا, عىلىم سالاسى دا يندۋستريالاندىرۋ ماقساتتارىنا ساي بولۋى قاجەت. كاسىبي ءارى بىلىكتى ماماندار بولماسا, ەشقانداي يندۋستريالاندىرۋ دا, تسيفرلاندىرۋ دا بولمايدى. ال ونداي مامانداردى تىرنەكتەپ ءجۇرىپ جيناپ, ناقتى ماقساتتارعا جۇمىلدىرۋ كەرەك. ولاردىڭ ويلاپ تاپقان تەحنولوگيالارىن قولدانىسقا ەنگىزگەن ءجون. «بولاشاق» باعدارلاماسى دا, نازارباەۆ ۋنيۆەرسيتەتى دە, جالپى بارلىق ۋنيۆەرسيتەتتەر سوعان جۇمىس ىستەۋى كەرەك. زياتكەرلىك مەكتەپتەر دارىندى بالالاردى ىرىكتەپ جاتىر. نەگىزى, قازىر جۇمىستى 25-30 جاستاعى ازاماتتارعا بەرۋ كەرەك. ودان قورقاتىن ەشتەڭە جوق. ءبارىمىزدى العا جەتەلەيتىن سولار. كەدەرگى جاساماي, ولارعا جول بەرۋ كەرەك», - دەدى پرەزيدەنت بۇگىن جالپىۇلتتىق تەلەكوپىر كەزىندە.
مەملەكەت باسشىسى «100 جاڭا ەسىم» جوباسىن دا ەسكە الىپ, دارىندى جاستاردى قولداۋ ماسەلەسىنە توقتالدى.
«جاقىندا مەن «100 جاڭا ەسىم» جوباسىنا كىرگەن ازاماتتارمەن كەزدەستىم. وندا مەن مۇلدەم باسقا ادامداردى كوردىم, ولار زامان تالابىنا ساي ويلايدى, كوزقاراسى دا باسقاشا. 18-20 جاستاعى بالالار ويعا كەلمەيتىن نارسەلەردى جاساپ ءجۇر. مىسالى, ءبىر جىگىت ۋنيۆەرسيتەت جەرتولەسىندە وتىرىپ, ارنايى روزەتكانى ويلاپ تاپتى. سونىڭ ارقاسىندا ەنەرگيانىڭ 30 پايىزىن ۇنەمدەۋگە بولادى. شەتەلدە ونى بىردەن بايقايتىن ەدى», - دەپ اتاپ كورسەتتى نۇرسۇلتان ءابىش ۇلى.