بۇگىن پارلامەنت ءماجىلىسىنىڭ سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتاتتار قازاقستان-تۇرىكمەن مەملەكەتتىك شەكاراسىن شەگەندەۋگە قاتىستى كەلىسىمدى راتيفيكاتسيالاۋ تۋرالى زاڭ جوباسىن ماقۇلدادى, دەپ حابارلايدى ءماجىلىستىڭ ءباسپاسوز قىزمەتىنەن.
ءماجىلىس توراعاسى قازاقستاننىڭ ىرگەلەس ەلدەرمەن مەملەكەتتىك شەكاراسىن حالىقارالىق-قۇقىقتىق راسىمدەۋى تاۋەلسىزدىكتىڭ تاريحي جەتىستىكتەرىنىڭ ءبىرى سانالاتىندىعىن اتاپ ءوتتى.
ء«بىز بارلىق كورشىلەرىمىزبەن كەلىسىمدەر جاسادىق, وندا بىرلەسكەن شەكارا سىزىقتارىنىڭ قالاي وتەتىنى ناقتى بەلگىلەنگەن. ەندى شەكارالاردى شەگەندەۋ جۇمىستارى جۇرگىزىلۋدە», دەدى ن.نىعماتۋلين.
وسىعان سايكەس ءدال قازىر قىرعىزستان, وزبەكستان ەلدەرى بويىنشا دا قۇجاتتاردى قول قويۋعا دايىنداۋ جۇمىستارى ءجۇرىپ جاتىر, قحر-مەن بۇل ءۇردىس اياقتالدى. سونداي-اق, قازاقستان-رەسەي شەكاراسىن شەگەندەۋ جۇمىسى جالعاسۋدا.
«ەندىگى كەزەكتە قازاقستاننىڭ بارلىق مەملەكەتتىك شەكارالارىن حالىقارالىق-قۇقىقتىق راسىمدەۋ پروتسەسىن بارىنشا جەدەل ءبىتىرۋ قاجەت. ول الداعى ۋاقىتتا كەز-كەلگەن اۋماقتىق داۋلاردىڭ الدىن الۋعا مۇمكىندىك بەرەدى», دەدى ماجىلىس سپيكەرى.