استانادا مەملەكەت باسشىسى نۇرسۇلتان نازارباەۆتىڭ قاتىسۋىمەن «جاڭا يندۋستريالاندىرۋ: قازاقستاندىق بارىستىڭ قادامى» ۇلتتىق تەلەكوپىرى ءوتىپ جاتىر.
تەلەكوپىر كەزىندە ونلاين رەجيمىندە بۇكىل ەل بويىنشا جاڭا يندۋستريالىق-يننوۆاتسيالىق, ينفراقۇرىلىمدىق, ەنەرگەتيكالىق, اگروونەركاسىپتىك جوبالار ىسكە قوسىلادى.
«قازاقالتىن تەحنولودجي» كومپانياسى اقسۋ اۋىلىندا التىن ءوندىرۋ فابريكاسىن ىسكە قوسسا, اقتوبە وبلىسىندا ماشينا جاساۋ جانە مەتالل وڭدەۋ سەكتورىندا مۇناي-گاز جابدىقتارىن ءوندىرۋ جانە قۇبىرلار شىعارۋمەن اينالىساتىن «قازاقستان مۇناي جابدىقتارى زاۋىتى» جشس زاۋىتى اشىلادى. اتىراۋ وبلىسىندا روبوتتى دانەكەرلەۋ ادىسىمەن مەتالل قۇراستىرمالارى ءوندىرىسى جۇمىسىن باستايدى.
تاماق ونەركاسىبى مەن اۋىلشارۋاشىلىق ونىمدەرىن قايتا وڭدەۋ بويىنشا سولتۇستىك قازاقستان وبلىسىنداعى «ماسلودەل» جشس «تەترا پاك» جشس جوعارى تەحنولوگيالىق قوندىرعىلارمەن جابدىقتالعان ءسۇت زاۋىتىن اشادى.
جامبىل وبلىسىندا «شاعىن جانە ورتا بيزنەستى دامىتۋدىڭ جاڭا سەكتورلارى» باعىتى بويىنشا «ورگستروي» جشس گرانيت, ءمارمار جانە گيپس ءوندىرۋ, جارىلعىش قۇرىلعىلاردى ءوندىرۋدىڭ جاڭا تەحنولوگياسىن وڭدەۋ جونىندەگى وندىرىستىك ورىن اشىلادى.
قاراعاندى وبلىسىندا ەسكى كولىكتەردى قايتا وڭدەۋمەن اينالىساتىن كاسىپورىن «Recycling Company» جشس جۇمىس ىستەي باستاماق. كاسىپورىن جىلىنا توزىعى جەتكەن اۆتوكولىكتەردىڭ 50 مىڭىن قايتا وڭدەۋگە قاۋقارلى.
جالپىۇلتتىق تەلەكوپىر بارىسىندا ەۋروپالىق اۆياتسيالىق قاۋىپسىزدىك اگەنتتىگىنىڭ ستاندارتتارىنا سايكەس ءوز اۆيالاينەرلەرى مەن باسقا دا اۋە كومپانيالارىنىڭ ۇشاقتارىنا تەحنيكالىق قىزمەت كورسەتەتىن «ەير استانا» اۆياتسيالىق تەحنيكالىق ورتالىعى جۇمىس ىستەي باستايدى.
جالپى جىل باسىنان بەرى ەلىمىزدە 1,9 تريلليون تەڭگەلىك 127 جوبا ىسكە قوسىلىپ, 10 مىڭنان استام تۇراقتى جۇمىس ورنى اشىلدى.