قوستانايدا «قوستاناي» يندۋستريالىق ايماعى اشىلدى. ول قالانىڭ باتىس بولىگىنىڭ سىرت جاعىنا ورنالاسقان. 400 گەكتار اۋماقتى الادى. يندۋستريالىق ايماقتىڭ قۇرىلۋى ءۇش كەزەڭنەن تۇرادى دەپ جوسپارلانعان. العاشقى كەزەڭدە 120 گەكتار جەرگە سالىناتىن ءوندىرىس ورىندارى يگەرىلەدى, ينفراقۇرىلىمى سالىنادى. ينفراقۇرىلىمنىڭ قۇنى 2,5 ميلليارد تەڭگەگە باعالانىپ وتىر. قازىر اشىلعان العاشقى كەزەڭىندە ايماقتىڭ اكىمشىلىك-تۇرمىستىق كەشەنى, سىرتقى كوممۋنيكاتسيالىق جۇمىستارى دايىن بولدى. اكىمشىلىك-تۇرمىستىق كەشەندە جالعا الۋشىلار ءۇشىن 10 كابينەت, 40 ورىندىق اسحانا, 11 ورىندىق قوناق بولمەلەر بار. سونىمەن قاتار الداعى ۋاقىتتا ينۆەستورلارعا وڭاي بولۋى ءۇشىن مۇندا بانك كونسۋلتانتتارى, نوتاريۋس, كاسىپكەرلەرگە قاجەتتى باسقا قىزمەت تۇرلەرىنىڭ وكىلدەرى وتىراتىن بولادى.
يندۋستريالىق ايماققا ءبىرىنشى بولىپ ليفت قۇرالدارىن وندىرەتىن زاۋىت سالىنىپ جاتىر. قازىر ونىڭ قۇرىلىسى قىزۋ جۇرگىزىلۋدە. وسى جىلدىڭ قىركۇيەك ايىندا قوستانايلىق «توبىل» الەۋمەتتىك-كاسمىپكەرلىك كورپوراتسياسى ەكاتەرينبۋرگتىك كومپانيامەن «VEK Qazaqstan» اتتى بىرلەسكەن كاسىپورىن قۇرعان بولاتىن. ول كەلەسى جىلدىڭ مامىر ايىنان باستاپ ليفت وندىرە باستايدى.
«كەلەسى جىلدىڭ اقپان ايىندا قۇرال-جابدىقتاردى اكەلەمىز, مامىر-ماۋسىم ايىندا العاشقى ءونىمدى بەرەمىز. ءبىزدى ينۆەستور رەتىندە قوستاناي جاعىنىڭ جاعداي جاساۋى قىزىقتىردى. قوستاناي وبلىسىنىڭ اكىمشىلىگى بارلىق ماسەلەلەردى جەدەل شەشىپ بەردى», دەدى VEK كومپانياسىنىڭ باس ديرەكتورى ميحايل مولوچنيكوۆ. بۇل يندۋستريالىق ايماققا قونىس تەۋىپ جاتقان تۇڭعىش ينۆەستور-كاسىپورىن. تاعى دا رەسەيلىك جانە قازاقستاندىق كاسىپورىنداردان ايماققا ورنالاسۋعا ۇسىنىستار تۇسۋدە.
«الداعى ەكى جىلدا يندۋستريالىق ايماققا كەمىندە 10 ونەركاسىپ كاسىپورنى ورنالاسادى. ءبىز بۇل ايماققا قۇرىلىس ءوندىرىسى, اۆتوبولشەكتەر شىعاراتىن, ازىق-ت ۇلىك وندىرەتىن كاسىپورىندار ورنالاسادى دەپ جوسپارلاپ وتىرمىز. ول ءۇشىن مۇندا بارلىق جاعداي جاسالادى», دەدى وبلىس اكىمى ارحيمەد مۇحامبەتوۆ يندۋستريالىق ايماقتىڭ اشىلۋىندا.
ءنازيرا جارىمبەت, «ەگەمەن قازاقستان»
قوستاناي