قوستانايدا ۇزدىك وقۋشىلار مەن ۇستازدارعا «تريۋمف» سىيلىعى تابىس ەتىلدى

– ءبىز ءبىلىم سالاسىندا, ينتەللەكتۋالدى ۇلت قالىپتاستىرۋدا دامۋ ۇستىندە ەكەنىنىمىزدى كورسەتۋىمىز كەرەك. الەمدە ادامي دامۋ يندەكسىنىڭ رەيتينگىندە قازاقستان 56-ورىندا كەلەدى. بۇل دامۋدىڭ جوعارى ساتىسىنداعى ەلدەر قاتارىندامىز دەگەن ءسوز. وعان جاس ۇرپاقتىڭ دا ۇلەسى مول. بىزدە ءوزىنىڭ جەتىستىكتەرىمەن وبلىس داڭقىن اسىرىپ جۇرگەن جاستارىمىز بار. بالالار تابىسى – ولاردىڭ ۇستازدارىنىڭ ەڭبەگى, جەتىستىگى دەپ بىلەمىز», دەدى سالتاناتتا ءسوز سويلەگەن وبلىس اكىمى ارحيمەد مۇحامبەتوۆ.

بىرنەشە جىل قاتارىنان قوستاناي وبلىسىنىڭ وليمپيادالىق كومانداسى ەلىمىزدە كوش باستاپ ءجۇر. بيىل وقۋشىلار رەسپۋبليكالىق وليمپيادالاردان 24 مەدال الىپ كەلدى. ال وسىدان 4 جىل بۇرىن جۇلدەلى ورىننىڭ سانى 7 عانا بولاتىن. ساباقتا, ونەردە, سپورتتا جەتىستىككە جەتىپ جۇرگەن مەكتەپ وقۋشىلارى ءسوز الدى. مىسالى, قازاق-تۇرىك ليتسەيىنىڭ 11-سىنىپ وقۋشىسى ۆاريس ۋرازباحتەن بيىل حيميا ءپانى بويىنشا رەسپۋبليكالىق وليمپيادادا كۇمىس جۇلدەگە يە بولدى.

– مەن 7-سىنىپتان باستاپ حيميا ءپانى ەرەكشە قىزىقتىرادى, بۇل بويىنشا ءتۇرلى جارىستارعا قاتىسىپ كەلەمىن. رەسپۋبليكالىق وليمپيادالاردا مىقتى باسەكەلەستەر كوپ, وزا شاۋىپ جۇلدە الۋ وڭاي ەمەس, – دەيدى ۆاريس.

«تريۋمف» سىيلىعىن تاپسىرۋدا ۇستازدار دا ەڭبەگىنىڭ ناتيجەسىن كورگەنىنە قۋاندى. ساۋلە مولداباەۆا وبلىس ورتالىعىنداعى «وزات» دارىندى بالالار مەكتەبىندە تاريحتان ساباق بەرەدى. بيىل ونىڭ شاكىرتى ارۋجان كوبەنوۆا تاريح پانىنەن عىلىمي جۇمىس بويىنشا رەسپۋبليكالىق وليمپيادانىڭ قولا جۇلدەگەرى اتاندى.

– تۇڭعىش پرەزيدەنت كۇنى سىيلىق الۋ مەن ءۇشىن ۇلكەن ماقتانىش. ارۋجان «باتىس ەۋروپا اۋماعىنداعى قازاق دياسپوراسى» اتتى عىلىمي جوبانى قورعادى. تاعدىر تالكەگىمەن سول جاقتى مەكەن ەتىپ قالعان قانداستارىمىز جانە قازىر كوپتەگەن تۇلەكتەر وقۋعا سوندا بارادى. ءبىز ەلدەر اراسىنداعى ءوز ارا بايلانىستى زەرتتەپ, مادەنيەتتەردى تۇسىنۋگە تالپىندىق, – دەيدى ساۋلە.

سالتاناتتى جيىندا وبلىس اكىمى مەن وقۋشىلار اراسىندا ەمەن-جارقىن اڭگىمە ءوربىدى. ايماق باسشىسىنا ولار قويعان سۇراقتار ءبىلىم بەرۋ, تاربيە سالاسىنداعى وزەكتى ماسەلەلەردى دە قامتىدى. مىسالى, گىر سپورتىنان قىزدار اراسىندا وبلىستاعى جالعىز سپورت شەبەرى يانا ليتۆينوۆا وبلىس اكىمىنەن:

– اۋىلداعى سپورتشى بالالار ءۇشىن وبلىستا سپورت مەكتەپ-ينتەرناتى بولا ما؟, – دەپ سۇرادى.

– وتە جاقسى سۇراق. راسىندا, بىزدە سپورتشىلارعا ارنالعان مەكتەپ-ينتەرنات جوق. ءبىز ونى مەملەكەت-جەكەمەنشىك ارىپتەستىگى دەڭگەيىندە قاراستىراتىن بولامىز. وسىنداي تاسىلمەن بيىل كاسىپكەر ماحمۇت تۇرسىنوۆ كۇش قولدانىلاتىن سپورت تۇرلەرى اكادەمياسىن سالسا, كەلەر جىلى وبلىستا 50 مەترلىك باسسەين پايدا بولماق. 3000 ورىندىق مۇز سارايىن سالۋدى جوسپارلاپ وتىرمىز. الداعى ۋاقىتتا سەن ايتقان ماسەلەلنى دە ويلاستىراتىن بولامىز. سپورت عيماراتتارىن سالۋ بار دا, وعان بالالاردىڭ قولجەتىمدىلىگىن قامتاماسىز ەتۋ بار. قولجەتىمدىلىك سپورتتىڭ بۇقارالىعىن دامىتۋعا مۇمكىندىك جاسايدى, – دەدى ارحيمەد بەگەجان ۇلى.

وقۋشىلاردىڭ سۇراقتارىنا وراي ارحيمەد مۇحامبەتوۆ تابىسقا جەتۋدىڭ باستى كەپىلى – ەڭبەك ەكەنىن ايتىپ, وعان ناقتى مىسالدار دا كەلتىردى. ول تاياۋ جىلدارى «رەسەيدىڭ ۇزدىك جىل كاسىپكەرى» اتانعان سەرىكباي بيسەكەەۆتىڭ ء«وزىڭدى ءوزىڭ جاسا» كىتابى تۋرالى ايتتى. العا ماقسات قويىپ, ارمانىنا جەتۋگە تىنىمسىز ۇمتىلعان جاس قانا ومردە بيىكتەردى باعىندىرا الادى. وعان ەلباسى نۇرسۇلتان نازارباەۆتىڭ ءومىرى دە, جاستارعا ارنالعان سوزدەرى دە تولىق دالەل بولادى.

«تريۋمف» سىيلىعى تاپسىرىلىپ بولعاننان كەيىن وقۋشىلار مەن ۇستازدار اكىممەن ەسكەرتكىش سۋرەتكە ءتۇستى.

ءنازيرا جارىمبەت

«ەگەمەن قازاقستان»

قوستاناي

سۋرەتتى تۇسىرگەن باعدات احمەتبەكوۆ