دەنساۋلىق ساقتاۋ سالاسىن تسيفرلاندىرۋعا بايلانىستى اۋقىمدى جۇمىستار جۇرگىزىلىپ جاتىر.
بۇيىرتسا, الداعى ۋاقىتتا دارىگەرلەردىڭ قاعازباستىلىعى 100 پايىز شەشىلىپ, ولاردىڭ جۇكتەمەسى ازايادى. جۇرتشىلىقتىڭ قولىندا جۇرگەن قاعاز مەديتسينالىق كارتا دا جاڭا فورماتقا اۋىستىرىلىپ, ونىڭ ورنىنا ەلەكتروندى دەنساۋلىق پاسپورتى پايدا بولادى. بۇل تۋرالى ۇكىمەتتە وتكەن ءباسپاسوز ءماسليحاتىندا دەنساۋلىق ساقتاۋ مينيسترلىگىنىڭ وكىلدەرى مالىمدەدى.
دەنساۋلىق ساقتاۋ ۆيتسە-ءمينيسترى الەكسەي تسويدىڭ ايتۋىنشا, مەديتسينا سالاسىن تسيفرلاندىرۋ جۇيەسى قازاقستان ازاماتتارىنىڭ دەنساۋلىعى تۋرالى مالىمەتتەردى جيناقتاپ, بىرىڭعاي جۇيەگە بىرىكتىرۋگە نەگىزدەلگەن.
مينيسترلىك 2008 جىلدان بەرى ەمدەۋ ۇيىمدارىنىڭ قىزمەتىنە جۇگىنگەن حالىقتىڭ سىرقات تاريحى تۋرالى ستاتيستيكا جاساقتاپتى. ەندى وسى ستاتيستيكالىق مالىمەتتەر تسيفرلاندىرۋ جۇيەسىنىڭ اياسىندا ازاماتتاردىڭ جەكە كۋالىگىنە جەكە يدەنتيفيكاتسيالىق كودى (جسن) ارقىلى تىركەلمەك. مۇنداي زاماناۋي تىركەلىم جۇيەسى دارىگەرلەرگە دە, پاتسيەنتتەرگە دە ءتيىمدى. ايتالىق دارىگەرلەر بۇرىنعىداي الدىنا كەلگەن ناۋقاستىڭ سىرقات تاريحىن اۋىزشا سۇراپ, قولمەن جازىپ وتىرمايدى. ازاماتتىڭ جەكە كۋالىگىندەگى شتريح-كودتى كومپيۋتەرگە قوسسا بولدى, بارلىق سىرقات تاريحى اۆتوماتتى تۇردە مونيتورعا شىعا كەلەدى. بۇل دارىگەر مەن پاتسيەنتتىڭ ۋاقىتىن اناعۇرلىم ۇنەمدەيدى, وسى جۇيەنىڭ ارقاسىندا ماماننىڭ ناۋقاستى قاراۋ ۋاقىتى بۇرىنعىداي 20-30 مينۋت ەمەس, 3-5 مينۋتقا دەيىن قىسقارادى, دەيدى ماماندار.
ۆيتسە-مينيستر سونداي-اق دەنساۋلىق سالاسىن تسيفرلاندىرۋعا بايلانىستى دارىگەرلەردىڭ جۇكتەمەسى مەن قاعازباستىلىعىن ازايتۋعا, ەمدەۋ ۇيىمدارىن كومپيۋتەرلەندىرۋگە ەرەكشە دەن قويىلىپ وتىرعانىن جەتكىزدى. بيىلعى 1 قازانداعى جاعداي بويىنشا دارىگەر مەن مەدبيكەلەردىڭ كومپيۋتەرمەن جابدىقتالۋى 78,4 پايىزدى قۇرايدى. 2018 جىلدىڭ 1 قاڭتارىندا بۇل ماسەلەنى 85 پايىزعا شەشىپ, ال 2019 جىلدىڭ باسىندا 100 پايىزعا جەتكىزۋ كوزدەلىپ وتىر.
الداعى جىلدان باستاپ, ازاماتتاردىڭ وزدەرى دە ەلەكتروندى تسيفرلى قولتاڭبا ارقىلى ءوزىنىڭ جەكە ەلەكتروندى دەنساۋلىق پاسپورتىن اشىپ كورىپ, ونداعى مالىمەتتەرمەن تانىسا الاتىن بولادى.
قىمبات توقتامۇرات,
«ەگەمەن قازاقستان»