وڭتۇستىك قازاقستاندا وندىرىلەتىن ماقتا تالشىعىنىڭ جوعارى سۇرىپتارى رەسەي, بەلورۋسسيا, گەرمانيا, لاتۆيا, مولدوۆا, قحر, بەلگيا, يران, ۋكراينا, يتاليا جانە وڭتۇستىك كورەيا سىندى 10 مەملەكەتكە ەكسپورتتالۋدا. جىل باسىنان بەرى اتالعان ەلدەرگە 30 مىڭ تونناعا جۋىق ماقتا تالشىعى جونەلتىلگەن.
ەلىمىز بويىنشا «اق التىننىڭ» 100 پايىزى وندىرىلەتىن وڭتۇستىك شارۋالارى جاڭا تەحنولوگيالاردى قولدانۋ مەن ىزدەنىستىڭ ارقاسىندا ماقتا تالشىعىنىڭ 10 سۇرىپىن جاساپ شىعارعان. ماقتانىڭ مۇنداي ەليتالى سۇرىپتارىنىڭ تۇسىمدىلىگى 38-40 تس/گا دەيىن جەتەدى. ماقتا داقىلى ەكسپورتتىق ماڭىزعا يە بولعاندىقتان شارۋاشىلىقتىڭ وسى تۇرىنە قىزىعۋشىلىق تا ارتۋدا, ەگىس كولەمى جىلدان جىلعا ۇلعايىپ كەلەدى. ماسەلەن, بيىل وتكەن جىلمەن سالىستىرعاندا 25 مىڭ گەكتارعا ارتىق, ياعني 134,6 مىڭ گەكتار جەرگە ءشيتتى ماقتا ەگىلگەن بولاتىن. سونداي-اق, ماقتارال اۋدانى عانا ەمەس, ماقتا داقىلىن وسىرۋمەن وبلىستاعى 10 اۋداننىڭ شارۋالارى اينالىسىپ كەلەدى. بيىل 328 مىڭ توننا ءشيتتى ماقتا جينالدى. بۇل وتكەن جىلمەن سالىستىرعاندا 41 مىڭ تونناعا ارتىق. ورتاشا تۇسىمدىلىگى گەكتارىنا 24,5 تسەنتنەردەن جينالعان «اق التىننىڭ» 196,6 مىڭ تونناسى نەمەسە 60 پايىزى تەحنيكامەن تەرىلدى. ماقتا القاپتارىندا 500 دەن استام كومباين جۇمىس ىستەدى.
ايتا كەتەلىك, ماقتا داقىلىن ءوسىرۋ ءۇشىن تىڭايتقىشتار مەن گەربيتسيتتەرگە مەملەكەت تاراپىنان سۋبسيديا بەرىلەدى. ودان بولەك, ەگىلگەن ماقتانىڭ ءاربىر گەكتارىنا 15 مىڭ تەڭگەدەن, ال قايتا وڭدەۋ ءۇشىن وتكىزىلگەن «اق التىننىڭ» ءار تونناسىنا 6 مىڭ تەڭگەدەن قارجىلاي قولداۋ كورسەتىلەدى. وقو اكىمى ءباسپاسوز قىزمەتىنىڭ مالىمەتىنشە, جىل باسىنان بەرى وبلىس بويىنشا 134,6 مىڭ گەكتارعا 2 ملردقا جۋىق, قايتا وڭدەۋ كاسىپورىندارىنا وتكىزىلگەن 140 مىڭ توننا «اق التىنعا» 833 ملن تەڭگە سۋبسيديا تولەنگەن.
عالىمجان ەلشىباي,
«ەگەمەن قازاقستان»