كەشە ەلوردادا ەلىمىزدىڭ ورتالىق سايلاۋ كوميسسياسى ەقىۇ-نىڭ استاناداعى باعدارلامالارى كەڭسەسىمەن بىرلەسىپ حالىقارالىق بايقاۋشىلارعا ارنالعان «سايلاۋشىلاردىڭ تىزىمدەرىن جاساۋداعى حالىقارالىق بايقاۋدىڭ ەرەكشەلىكتەرى» دەگەن تاقىرىپتا سەمينار-ترەنينگ وتكىزدى.
ونىڭ جۇمىسىنا استاناداعى ەقىۇ باعدارلامالار كەڭسەسىنىڭ وكىلدەرى, ەقىۇ دەموكراتيالىق ينستيتۋتتار مەن ادام قۇقىقتارى جونىندەگى بيۋروسى, ورتالىق مەملەكەتتىك ورگاندار, مينيسترلىكتەر مەن ۆەدومستۆولار, سونداي-اق ۇكىمەتتىك ەمەس ۇيىمداردىڭ وكىلدەرى قاتىستى. سەمينار-ترەنينگكە قاتىسۋشىلارعا ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ جانە ەقىۇ-نىڭ استاناداعى باعدارلامالارى كەڭسەسىنىڭ باسشىسى, ەلشى دەرد سابو قۇتتىقتاۋ ءسوز سويلەدى.
«قازاقستان رەسپۋبليكاسىنىڭ ورتالىق سايلاۋ كوميسسياسى الەۋەتتى باقىلاۋشىلار توبىن قالىپتاستىرۋ بويىنشا جۇمىستار جۇرگىزۋدە. وسى ماقساتتا وسك جىل سايىن استاناداعى ەقىۇ باعدارلامالارى كەڭسەسىمەن بىرلەسىپ سەمينارلار وتكىزەدى. بۇگىنگى سەمينار سايلاۋشىلار تىزىمدەرىن قالىپتاستىرۋ ماسەلەلەرىنە ارنالعان. ءبىز حالىقارالىق ستاندارتتاردى, قالىپتاسقان جاعداي جانە كەيبىر شەت مەملەكەتتەردىڭ تاجىريبەلەرىن قاراستىرۋدامىز», – دەپ اتاپ ءوتتى ك.پەتروۆ. ال وسك مۇشەسى مارات سارسەمباەۆ سايلاۋشىلاردىڭ تىزىمدەرىن قولدانۋ ءتارتىبىن رەتتەيتىن حالىقارالىق جانە ەقىۇ قۇجاتتارىنىڭ نورمالارىن ءتۇسىندىردى. سەميناردا, سونداي-اق «سايلاۋشىلاردى تىركەۋ – حالىقارالىق ستاندارتتار جانە تاجىريبە» تاقىرىبىندا ەقىۇ/دياقب-نىڭ سايلاۋ جونىندەگى كەڭەسشىسى راديۆوە گرۋيچتىڭ تۇساۋكەسەرى ءوتتى.
سەمينار-ترەنينگ جۇمىسى بارىسىندا قاتىسۋشىلار سايلاۋ كۇندەرىندە ەقىۇ/دياقب-نىڭ ميسسياسى قۇرامىندا سايلاۋشىلار ءتىزىمىن جاساۋ مەن پايدالانۋدىڭ حالىقارالىق بايقاۋدىڭ ەرەكشەلىكتەرىن دە تالقىلادى. وزبەكستان رەسپۋبليكاسىنداعى جانە قىرعىز رەسپۋبليكاسىنداعى سايلاۋدى بايقاۋعا قاتىسۋ, سونىڭ ىشىندە سايلاۋ كۇندەرىندە سايلاۋشىلار تىزىمدەرىن ءىس جۇزىندە قولدانۋ پروتسەسىن بايقاۋ تاجىريبەسىمەن ءبولىستى.
جيىن سوڭىندا 2018 جىلى ەقىۇ/دياقب ميسسيالارىنىڭ قۇرامىندا بايقاۋ جۇرگىزۋ تاجىريبەسىن ودان ءارى جەتىلدىرۋ جونىندە پىكىر الماسىلدى.
ءاليسۇلتان قۇلانباي, «ەگەمەن قازاقستان»