قىسقا عۇمىر كەشكەنىمەن ارتىندا وشپەستەي ءىز قالدىردى. وتان الدىنداعى اسكەري بورىشىن وتەۋگە اتتانعان دوسبول ساپار اقتوبە قالاسىنداعى №6655 اسكەري بولىمدە جاۋىنگەرلىك قىزمەت اتقارا ءجۇرىپ, 2016 جىلدىڭ 6 ماۋسىمىندا بولعان لاڭكەستەرمەن ۇرىستا قازا تاپتى.
بۇل وقيعا ەل ەسىندە. امان-ساۋ جۇرگەندە دوسبول 20 جاسقا تولاتىن ەدى. شاردارا اۋدانىنداعى كوكسۋ اۋىلدىق وكرۋگىنە قاراستى ايدارقۇل-قاشار ەلدى مەكەنىندە ومىرگە كەلگەن باتىر ۇلدى تۋعان-تۋىستارى مەن دوس-جاراندارى, ۇستازدارى مەن اۋىلداستارى جاقىندا س.ەرۋباەۆ اتىنداعى جالپى ورتا مەكتەبىندە وتكەن ءىس-شارا بارىسىندا ەسكە الدى.
«بەيبىت كۇننىڭ باتىرى» تاقىرىبىمەن وتكىزىلگەن كەشتە دوسبول تۋرالى ارنايى فيلم كورسەتىلدى. مەكتەپ ديرەكتورى ءبيبىماريام قارساقباەۆا الدىمەن قوناقتاردى دوسبول ساپارعا ارناپ جاسالعان بۇرىشپەن تانىستىردى. ۇستازدارى ۇنەمى جىميىپ جۇرەتىن, تاپسىرمالاردى تىندىرىمدى ورىندايتىن تىلالعىش شاكىرتىن تەبىرەنە ەسكە الدى. جۇرەكتەن شىققان جىر شۋماقتارىن ارنادى. قىرشىن كەتكەن ۇلىنا دەگەن ساعىنىشىن اناسى جۇلدىز قۇداباەۆا دا جىر شۋماقتارىمەن جەتكىزدى. اكەسى ەركىنبەك ابدىقادىروۆ مەكتەپ ۇجىمىنا العىس ايتا وتىرىپ, اقتوبە قالاسىنداعى №6655 اسكەري ءبولىم شىعارعان كىتاپتى سىيعا تارتتى.
– ءبىز دوسبولدى نەلىكتەن باتىر دەپ ايتامىز؟ سەبەبى ول قارا نيەتتى قاسكويلەردىڭ العاشقى شابۋىلىنا تويتارىس بەردى. ەگەر دوسبول مەن قاسىنداعى سەرىكتەرى جاۋعا قارسى تۇرماعاندا ولار قارۋ-جاراق بولمەسىنە باسىپ كىرىپ, مىڭداعان ادامنىڭ ءومىرىن قياتىن ەدى. سوندىقتان دا بۇگىنگى ءىس-شارانىڭ ماڭىزى وتە زور. الداعى ۋاقىتتا مۇنداي ەسكە الۋ كەشىن اۋداندىق دەڭگەيدە ۇيىمداستىرسا, جاس ۇرپاق ءۇشىن تاربيەلىك ءمانى جوعارى بولادى دەپ ويلايمىن, – دەدى اۋىل تۇرعىنى تۇرسىنقۇل بايتۇرعانوۆ.
جيىن سوڭىندا دوسبول ساپاردى ەسكە الۋعا ارنالعان ۆولەيبول جارىسى ۇيىمداستىرىلىپ, ارنايى اس بەرىلدى.
عالىمجان ەلشىباي, «ەگەمەن قازاقستان»